1 Awarni setta n wussan Yeccu yiwi-dd Buṭrus d Yaɛqub d umas Yuḥanna akides, yiwyi i-ten weḥḥedsen ɣar ijj n wedrar yuɛřa. ^■   2 Uca ittwabeddeř waddud n Yeccu qibač nsen: tuɣa aɣembub nnes ittceɛciɛ am tfuct, idweř warruḍ nnes d acemřař am tfawt. 3 Uřa d Musa d Iliya ḍharen asen-dd, ssawařen akides. 4 Buṭrus yarra-dd, inna i Yeccu: “A Sidi, aqa mliḥ umi i da neǧa! Mařa texsed ad newwet danita třata n iɛuccuten, ijjen i Cek, ijjen i Musa u ijjen i Iliya.” 5 Am tuɣa issawař ɛad, ikka-dd xasen ijj n useynu ittseqsiq, issduři ten s tiři nnes uca xzar, aqa ict n tmijja zeg ujenna tenna: “D wa d Mmi iɛizzen, dayes ufiɣ arḍa inu, sřem ɣares!” ^■   6 Řami sřin imeḥḍaren man aya, wḍan x uɣembub nsen uca ggʷeden aṭṭas. 7 Yusa-dd ɣarsen Yeccu, iḥada ten, inna: “Kkarem, war tteggʷedem ca!” 8 Řami ssgeɛɛden tiṭṭawin nsen, war ẓrin ḥed mɣir Yeccu, Netta waha.

9 Am dd-hwan zeg wedrar, yumur i-ten Yeccu, inna: “War ssiwiřem x tmeẓriwt-a am ɣarwem iǧa ijj nneɣni qbeř i dd ɣa ikkar Mmis n bnadem jar n imettinen.” ^■  

10 Imeḥḍaren sseqsan t, nnan: “Mayemmi qqaren imseřmaden n idlisen aqa Iliya ad dd-yas d amezwaru?” ^■  

11 Yarra-dd Yeccu, inna: “Iliya ad dd-yas d amezwaru, ḥima ad ittwakemmeř marra.

12 Maca Necc ad awem iniɣ belli Iliya aqa yusa-dd, war zzayes steɛtarifen, ggin zzayes min xsen. Ammu uřa d Mmis n bnadem ad zzaysen iweddeb.”

13 Řexdenni fehmen imeḥḍaren, belli tuɣa issawař akidsen x Yuḥanna Amseɣḍaṣ.

14 Řami dd-usin ɣar řɣaci, yusa-dd ɣares ijj n bnadem, iwḍa as ɣar iḍaren, inna as: ^■  

15 “A Sidi, zziǧez i mmi, minzi aqa netta ittbarkikkiḍ, immarni xas řḥar, maɣar aṭṭas n twařawin iwḍa di tmessi u deg waman.

16 Iwyeɣ t ɣar imeḥḍaren nnek, maca nitni war zemmaren ad t ssgenfan.”

17 Yeccu yarra-dd, inna: “A jjiř i war yuminen d imufriɣen, mecḥař i ɣa qqimeɣ ɛad akidwem, mecḥař ɛad i ɣa qqimeɣ ṣbareɣ awem? Awyem t-i-dd ɣari!”

18 Xenni iwebbex i-t Yeccu uca iffeɣ zzayes cciṭan uca idweř uḥenjir iggenfa zi tsaɛɛet nni.

19 Řexdenni usin-dd imeḥḍaren weḥḥedsen ɣar Yeccu, nnan as: “Mayemmi neccin war nzemmar ad t nessuffeɣ?” ^■   20 Inna asen Yeccu: “S minzi war tuminem ca. S tidett ad awem iniɣ, mařa daywem l’iman anect n ict n taḥebbuct n zzariɛet n uxerdel, ad as tinim i wedrar-a: ‘Muṭṭi ssa ɣar diha!’, xenni ad immuṭṭi, uca war din ittiři ɛad uřa d ict n řḥajjet war d as tzemmarem ɛad. ^■   21 Maca ddarb-a war dd-itteffeɣ mɣir s tẓaǧit d uẓummi.”

22 Řami tuɣa ttsaran di Ljalil, inna asen Yeccu i imeḥḍaren nnes: “Mmis n bnadem ad immewc deg ifassen n iwdan. ^■   23 Ad t nɣen uca ad dd-ittwassnekkar deg wass wiss třata.” Xenni ceḍnen aṭṭas.

24 Řami dd-usin ɣar Kafarnaḥum, qarrben-dd ayt n ḍḍariba ɣar Buṭrus, nnan: “Amseřmad nwem, ma war ittxeǧiṣ tapyist n tnayen draxma i Zzawect Tameqqrant?” 25 Inna: “Wah!” Ařami dd-yudef Buṭrus ɣar taddart, izwar as-dd Yeccu, inna: “Cimɛun, mammec twařid cek, wi zi ṭṭfen ijeǧiden n ddunect řeɛcur d tenɛacin i izemmen i kuř azeǧif? Ma zi tarwa nsen niɣ zeg ibarraniyyen?” ^■   26 Inna as Cimɛun: “Zeg ibarraniyyen!” Inna as Yeccu: “S uyenni ǧan tarwa d iḥurriyyen! 27 Maca ḥima war ten nessendrif, ruḥ ɣar řebḥar, nḍar taṣennart uca arzem aqemmum i tesřemt tamezwarut i dd ɣa iffɣen uca ad tafed ijj n tepyist n uṣulḍi n ‘ustatir’. Ksi tt uca ewc i-tt xafi u x yixef nnek.”