1 Usin-dd ɣares Ifarisiyyen d Iṣaduqiyyen, sseqsan t ḥima ad t jarrben, ma ad asen isscen ca n řeɛřamet zeg ujenna. ^■   2 Maca Netta yarra-dd xasen: “Ɣar tmeddit ad tinim: ‘Aqa řḥař iffeɣ!’, minzi ajenna d azeggʷaɣ. ^■   3 U ɣar řefjar ad tinim: ‘Aqa ass-a ad dd-iṣuḍ usemmiḍ!’, minzi ajenna d azeggʷaɣ. Kenniw, a imnafqen, tessnem ad tfarzem udem n ujenna, maca řeɛřamat n ikuden n řweqt war tzemmarem ad tent tfarzem. 4 Jjiř aɛeffan izennan yarezzu ict n řeɛřamet, maca war d as ittmewci uřa d ict n řeɛřamet mɣir řeɛřamet n Yunus, anabi!” Xenni ijja i-ten, iruḥ. ^■  

5 Řami dd-iwḍen imeḥḍaren nnes ɣar ujemmaḍ n řebḥar, ttun ad kisen dd-awyen aɣrum. 6 Inna asen Yeccu: “Ḥḍam ixef nwem zeg wentun n Ifarisiyyen d Iṣaduqiyyen.” ^■   7 Nitni ssiwřen jar asen x man aya, nnan: “Aqa inna man aya minzi war d niwi ca aɣrum!” 8 Yeccu, am tuɣa issen man aya, inna asen: “A kenniw i di iǧa drus n l’iman, mayemmi txemmamem jar awem aqa man aya iǧa umi war dd-tiwyem aɣrum? 9 Ma ɛad war tefhimem ca? Ma war teɛqiřem ca x xemsa n iřeqqwaz n weɣrum i xemsa-ařaf u mecḥař n tsuǧatin i tyarwem? ^■  

10 Niɣ x sebɛa n iřeqqwaz n weɣrum i arebɛa ařaf, u mecḥař n tsuǧatin i tyarwem? ^■  

11 Ma ɛad war tefhimen ca belli Necc war kiwem ssiwřeɣ ca x weɣrum umi d awem nniɣ: ‘Ḥḍam ixef nwem zeg wentun n Ifarisiyyen d Iṣaduqiyyen!’ ”

12 Ssenni fehmen aqa Netta war tt inni maḥend ad ḥḍan ixef nsen zeg wentun n weɣrum maca zi tɣuri n Ifarisiyyen d Iṣaduqiyyen.

13 Řami dd-yiweḍ Yeccu ɣar temmurt n Qayṣariya-Filippus, isseqsa imeḥḍaren nnes: “Min ɛniɣ Necc, Mmis n bnadem, ɛlaḥsab min qqaren iwdan?” ^■  

14 Nnan as: “Ca qqaren ‘D Yuḥanna Amseɣḍaṣ’, u wenneɣni: ‘D Iliya’, u wenneɣni ɛawed: ‘D Irmiya’ niɣ ‘D ijjen zeg inabiyyen!’ .” ^■  

15 Inna asen: “Maca kenniw, min xafi teqqarem?”

16 Yarra-dd xas Cimɛun Buṭrus, inna: “Cek d Lmasiḥ, Mmis n AREBBI iddaren.” ^■  

17 Yarra-dd xas Yeccu, inna as: “Sseɛd nnek, a Cimɛun, mmis n Yuna, minzi war iǧi d aysum niɣ d idammen i d ac imřen man aya, maca d Baba i iǧan deg ijenwan. ^■  

18 Necc ad ac iniɣ, aqa cek d Buṭrus, ‘d aẓru’, u x ‘weẓru aya’ ad bniɣ Tamesmunt inu n yinni dayi ittiqqan, uca tiwwura n řaxart war d as zemmarent. ^■  

19 D Necc ad ac wceɣ tisarutin n Tgeldit n ijenwan u marra min ɣa tceddem di temmurt, ad yiři icedd deg ijenwan, u marra min ɣa tfesyed di temmurt, ad yiři ifsi deg ijenwan.” ^■   20 Řexdenni yumur imeḥḍaren nnes, ḥima war xebbaren ḥed belli Netta d Lmasiḥ.

21 Ssenni ibda Yeccu ad isscen i imeḥḍaren nnes belli ittxeṣṣa as ad iraḥ ɣar Urcalim, ad iweddeb aṭṭas zeg imɣaren n řgens u zeg imeqqranen n ikehhanen d imseřmaden n idlisen, ad ittwaneɣ uca ad dd-ittwassnekkar ɛawed deg wass wiss třata. ^■   22 Maca Buṭrus yiwyi t weḥḥdes, ibda ittwebbex i-t, inna: “War ittiři, a Sidi! Man aya war d ac ittemsar ɛemmarṣ.” 23 Maca Netta inneqřeb, inna i Buṭrus: “Ffeɣ xafi, a cciṭan, cek d ict n tɛenkrift i Necc, minzi war cek icqi min iǧan n AREBBI, maca min iǧan n iwdan.” ^■   24 Řexdenni inna Yeccu i imeḥḍaren nnes: “Mařa ca n ijjen ixs ad ayi iḍfar, ad inkar ixef nnes, ad iksi ṣṣalib nnes uca ad ayi iḍfar. ^■   25 Minzi wenni ixsen ad issenjem tudart nnes, ad tt iweddar, maca wenni i ɣa iweddaren tudart nnes di ṭṭweɛ inu ad tt yaf. ^■   26 Minzi man řefḍeř i ɣares ɣar bnadem mařa yarbeḥ ddunect marra, maca iřqef i-t druct di řeɛmar nnes? Niɣ min ɣa iwc bnadem di ṭṭweɛ n řeɛmar nnes? ^■   27 Minzi Mmis n bnadem ad dd-yas s uɛuǧi n Babas ak-d lmalakat nnes, uca xenni ad ixeǧeṣ kuř ijjen ɛlaḥsab min igga. ^■   28 S tidett Necc ad awem iniɣ, aqa ca zeg ina i da ibedden, war ttqisin ca řmewt ař ɣa ẓaren Mmis n bnadem ittas-dd di Tgeldit nnes.” ^■