1 Awarni řami inya di tɣarrabut, iẓwa řebḥar, yiweḍ ɣar tendint nnes. ^■   2 Uca iwyen as-dd ijj n uneɛḍab i tuɣa izzřen di tassut. Řami iẓra Yeccu l’iman nsen, inna i uneɛḍab: “Egg uř, a mmi, ddnub nnek ttwaɣfaren!” 3 Uca xzar, ca n imseřmaden n idlisen nnan jar asen: “Wanita ittceqqaf di AREBBI.” ^■   4 Yeccu, umi issen min di tuɣa ttfekkaren, inna asen: “Mayemmi tᵉttxemmamem di min war iḥřin deg wuřawen nwem? 5 Min ihewnen ad iniɣ i wanita: ‘Ddnub nnek ttwaɣfaren!’, niɣ ad iniɣ: ‘Kkar, uyur!’? 6 Maca ḥima ad tessnem belli Mmis n bnadem ɣares ṣṣulṭa di temmurt ḥima ad iɣfar ddnub, ad iniɣ i uneɛḍab-a: “Kkar, ksi tassut nnek, tarekkweḥed ɣar taddart nnek!” 7 Xenni ikkar, iruḥ ɣar taddart nnes. 8 Řami iẓra řɣaci man aya, tbehten, ssɛuǧen AREBBI wenni iwcin ṣṣulṭa amecnaw tanita i iwdan.

9 Řami ssenni ikka Yeccu, iẓra aryaz wenni umi qqaren Matta, iqqim ɣar taddart n ḍḍariba. Inna as: “Ḍfar ayi-dd!” Uca ikkar, iḍfar i-t. ^■  

10 Řami iqqim ɣar umensi di taddart, usin-dd waṭṭas n ayt n ḍḍariba d imednab, qqimen ak-d Yeccu d imeḥḍaren nnes.

11 Řami ẓrin Ifarisiyyen man aya, nnan i imeḥḍaren nnes: “Mayemmi ittett Umseřmad nwem ak-d ayt n ḍḍariba d imednab?”

12 Umi isřa Yeccu man aya, inna asen: “Inni iṣeḥḥen, war ḥdijen ca aḍbib, maca imehřac.

13 Ruḥem, ad třemdem min ixs ad yini wawař-a: ‘Xseɣ arreḥmet, maci d taɣarṣt!’, minzi Necc war dd-usiɣ ḥima ad řaɣiɣ x imseggaden, maca x imednab.” ^■  

14 Xenni usin-dd ɣares imeḥḍaren n Yuḥanna, nnan as: “Mayemmi nettẓumma neccin d Ifarisiyyen aṭṭas, maca imeḥḍaren nnek war ttẓummin ca?” ^■  

15 Yeccu inna asen: “Ma izemmar ad ceḍnen řeḥbab n umuřay umi amuřay ɛad akidsen? Ad dd-asen wussan min di xasen i ɣa immeksi Umuřay, xenni ad ẓummen. ^■  

16 Uřa d ijj war ittegg taneqqič zi tcuqqet n jdid x warruḍ aqdim, minzi nettat ad teqřeɛ zeg warruḍ uca arruḍ ad iqqarṣ ktar.

17 Uřa d binu n jdid war ittwagg ca di txuncay tibuřay, ḥima war dduqquzent txuncay, ad izeǧeɛ binu uca tixuncay ad ḍeyyɛent. Ittxeṣṣa ad tteggen binu n jdid di txuncay n jdid, ḥima ad ttwaxemmřen nitni s tnayen.” ^■  

18 Am tuɣa issawař akidsen x tmesřayin-a, yusa-dd ijj n umeqqran isjed as, inna: “Řexxu yeǧi bḥřa temmut, as-dd, sars xas afus nnek uca ad teddar ɛawed.” ^■  

19 Yeccu ikkar, iḍfar i-t ak-d imeḥḍaren nnes.

20 Uca xzar, ict n temɣart, tuɣa ttazzřen zzayes idammen řmijař n tenɛac n iseggʷusa, tekka as-dd ɣar ḍeffar uca tḥada abeḥřuř n ujeǧab nnes, ^■   21 minzi nettat tuɣa tenna deg ixef nnes: “Icfa mɣir ad ḥadiɣ ajeǧab nnes, ad ggenfiɣ!” 22 Maca inneqřeb-dd Yeccu, iẓra i-tt, inna: “Egg uř, a yeǧi, aqa l’iman nnem i cem issnejmen!” Uca tᵉttwassggenfa temɣart nni di tsaɛɛet nni. ^■  

23 Xenni yusa-dd Yeccu ɣar taddart n umeqqran, iẓra iɣeyyaḍen d řɣaci sɣuyyun, ^■   24 inna asen: “Ffɣem ssa! Taḥenjirt war temmut ca, aqa tᵉṭṭeṣ!”. Maca nitni ḍeḥcen dayes. ^■   25 Ařami issuffeɣ řɣaci, yudef ɣar daxeř uca iṭṭef i-tt zeg ufus nnes, xenni tekkar tḥenjirt. 26 Uca iffeɣ řexbar ɣar temmurt nni marra.

27 Řami ssenni ikka Yeccu, ḍfaren t tnayen n idarɣařen, ttřaɣan, qqaren: “Arḥem aneɣ, a mmis n Dawud!” 28 Ařami yudef di taddart, usin-dd ɣares idarɣařen nni. Yeccu inna asen: “Ma tumnem belli zemmareɣ ad ggeɣ man aya?” Nnan as: “Wah, a Siditneɣ!” 29 Řexdenni iḥada tiṭṭawin nsen, inna: “Ad ɣarwem yiři ɛlaḥsab l’iman nwem!” 30 Ttwarezment tiṭṭawin nsen. Xenni iḥarrem i-ten Yeccu, inna: “Ɣarwem, war ssargabem ḥed!” ^■   31 Maca nitni, ařami ruḥen, ssuffɣen xas řexbar di marra tammurt! ^■  

32 Řami dd-ffɣen nitni, iwyen as-dd ijj n umeryaḥ d aynaw. ^■   33 Řami issuffeɣ Netta řaryaḥ aɛeffan, issiweř weynaw. Tuɣa ittebhet řɣaci, nnan: “Ɛemmarṣ war neẓri amecnaw wanita di Israil!” 34 Maca Ifarisiyyen nnan: “S umeqqran n řaryaḥ iɛeffanen issuffuɣ řaryaḥ iɛeffanen!” ^■  

35 Yeccu tuɣa ittenneḍ x marra tineddam d dcurat, isseřmad i-ten di temzidawin nsen, tuɣa ittbarreḥ s Řexbar Aṣebḥan n Tgeldit uca issgenfa marra řehřacat d řeɛyub n řgens. ^■   36 Řami iẓra Yeccu řɣaci, iḥinn xasen, minzi uḥřen nnhewřen am wuǧi inni war ɣar iǧi umeksa. ^■   37 Xenni inna i imeḥḍaren nnes: “Tameyra temɣar aṭṭas, maca aqa din drus n icewwaren. ^■   38 S uyenni ttarem i Bab n tmeyra, ad dd-issekk icewwaren i tmeyra nnes.” ^■