1 Řami dd-ihwa zeg wedrar, ḍfaren t-i-dd aṭṭas n řɣaci. 2 Xzar, yusa-dd ɣares ijjen i di iǧa řbarṣ, iwḍa as ɣar iḍaren, inna: “A Sidi, mařa texsed, tzemmared ad ayi tessizdᵉged!” ^■   3 Yeccu isswiẓẓeḍ afus nnes uca iḥada t, inna: “Necc xseɣ, zdeg!” Uca ittwassizdeg zi řbarṣ nnes řexdenni. 4 Xenni inna as Yeccu: “Xzar, war tteqqar i ḥed, maca ruḥ, scen ixef nnek i ukehhan uca ewc taɣarṣt i Arebbi ɛlaḥsab min zzayes iweṣṣa Musa, aqa-tt d cchadet i nitni.” ^■  

5 Řami yudef Yeccu ɣar Kafarnaḥum, yusa-dd ɣares ijj n řqebṭan x mya, ittar zzayes ammu, ^■   6 inna: “A Sidi, aḥenjir inu izzeř di taddart d aneɛḍab, aqa dayes řeḥriq aṭṭas!” 7 Inna as Yeccu: “Necc ad dd-aseɣ, ad t ssgenfiɣ!” 8 Uca řqebṭan x mya yarra-dd, inna: “A Sidi, necc war sdiheǧeɣ ad tadfed swadday i tzeqqa inu, maca ini ijj n wawař waha, xenni ad iggenfa uḥenjir inu. ^■   9 Minzi uřa d necc ɛawed d bnadem sadu ifassen uca ɣari iɛeskariyyen sadu ufus inu, qqareɣ i wa: ‘Ruḥ!’, xenni ad iraḥ, u i wenneɣni: ‘As-dd!’, xenni ad dd-yas, u i umsexxar inu qqareɣ as: ‘Egg man aya!’, uca ad t igg.”

10 Řami isřa Yeccu man aya, ittebhet, inna i yenni i-t-i-dd iḍfaren: “S tidett Necc ad awem iniɣ, war ufiɣ uřa di Israil l’iman imɣar amecnaw wanita.

11 Necc ad awem iniɣ, belli aṭṭas i dd ɣa yasen zi ccarq u zi řɣarb, ad qqimen ɣar umensi ak-d Ibrahim d Isḥaq d Yaɛqub di Tgeldit n ijenwan, ^■  

12 maca tarwa n Tgeldit ad mmenḍaren barra ɣar ṭṭarf aneggaru n taǧest. Dinni ad iřin imeṭṭawen d uɣezzi n teɣmas.” ^■  

13 Yeccu inna i řqebṭan x mya: “Ruḥ, ad imsar am mammec tumned.” Uca iggenfa uḥenjir nnes di tsaɛɛet nni.

14 Řexdenni yusa-dd Yeccu ɣar taddart n Cimɛun, iẓra taḍekkwač nnes tezzeř, dayes timessi. ^■  

15 Iḥada afus nnes uca truḥ as tmessi, řexdenni tekkar, tsexxar xas.

16 Ɣar uɛecci iwyen-dd ɣares aṭṭas n imaryaḥen. Issuffeɣ řaryaḥ nsen iɛeffanen s yijj n wawař waha, uca issgenfa marra imehřac,

17 ḥima ad ittwakemmeř min ittwannan zeg unabi Icaɛya: “Aqa iksi řeḥriq nneɣ u yarbu řehřac nneɣ.” ^■  

18 Řami iẓra Yeccu řɣaci ameqqran i d as dd-innḍen, yumur i-ten ad ẓwan ɣar ujemmaḍ.

19 Uca yusa-dd ɣares ijj n umseřmad n idlisen, inna as: “A Amseřmad inu, ad Cek ḍfareɣ mani ma i ɣa traḥed!” ^■   20 Inna as Yeccu: “Iceɛban ɣarsen ifran u ijḍaḍ n ujenna ɣarsen řeɛwacc, maca Mmis n bnadem war yufi ca mani i ɣa isenned azeǧif nnes.” 21 Inna as ijjen nneɣni zeg imeḥḍaren nnes: “A Sidi, ejj ayi d amezwar ad uyureɣ ad neḍřeɣ baba!” 22 Inna as Yeccu: “Ḍfar ayi-dd, ejj imettinen ad neḍřen imettinen nsen!” ^■  

23 Řami inya Yeccu di tɣarrabut, ḍfaren t imeḥḍaren nnes. ^■   24 Uca xzar, tekkar-dd ict n tḥaryaḍt di řebḥar ař mani dřint řemwaj taɣarrabut, maca Yeccu tuɣa iṭṭes. 25 Usin-dd ɣares imeḥḍaren nnes uca ssfaqen t-i-d, nnan as: “A Siditneɣ, senjem aneɣ, aqa ad nettwahellek!” 26 Inna asen: “Mayemmi tᵉtteggʷedem, a kenniw i di iǧa drus n l’iman?” Xenni ikkar, iwebbex asemmiḍ d řebḥar uca tusa-dd řhudnet tameqqrant. ^■   27 Tbehten iwdan, nnan: “Min iɛna Wa umi isemmiḍen d řebḥar tteggen as array?”

28 Řami yiweḍ ɣar ujemmaḍ ɣar jjwayeh n Gadarinis, řqan t-i-dd tnayen n imaryaḥen, ffɣen-dd zeg imeḍřan, tuɣa mmuzzaren aṭṭas ař mani uřa d ijj war izemmar ad yekk abrid nni. ^■   29 Xzar, sɣuyyen, nnan: “Min din jar aneɣ d Cek, a Yeccu, Mmis n AREBBI? Ma tusid-dd danita ḥima ad aneɣ tɛeddbed qbeř řweqt?” 30 Tuɣa din ict n tḥimart n iřfan tameqqrant tiggʷej xasen, thedda din. 31 Uca ccwaṭen ttaren zzayes, nnan: “Mařa tessuffɣed aneɣ, ejj aneɣ ad nadef di tḥimart n yeřfan!” 32 Inna asen: “Ruḥem!” Řexdenni ffɣen-dd, udfen deg iřfan. Uca xzar, taḥimart n iřfan amen tmun teḥduddar zi teysart ɣar řebḥar, temmut deg waman. 33 Imeksawen inni ten yarekkwsen, arewřen, uca řami iwḍen ɣar tendint, xebbaren x kuřci min imsaren, uřa x imaryaḥen. 34 Uca xzar, ffɣen-dd aytbab n tendint marra i umsagar ak-d Yeccu. Umi t ẓrin, ttaren zzayes ad iffeɣ zi temmurt nsen.