SIDI yarra-dd x Ḥabaqquq i twařa wiss tnayen
2
1 Necc ggiɣ ad beddeɣ deg wemcan n tɛessast inu u ssbeddeɣ ixef inu x ṣṣumɛet n tɛessast,
ṣewḍeɣ maḥend ad ẓareɣ min i d ayi ɣa yini Netta,
u min ɣa yarreɣ x ucetci inu. ■
2 Yarra-dd xafi SIDI uca inna:
Ari tameẓriwt,
ari tt tfarz x teřwiḥin,
maḥend wenni iɛeddun izemmar ad tt iɣar. ■
3 Maɣar tameẓriwt tᵉttraja ɛad ař řweqt nni yuran.
Tᵉttemḥizwar ɣar uqeṭṭu u war tessxarriq ca.
Mařa teqqim war dd-tᵉttis, qqim raja tt,
maɣar ad dd-tas s tidett, war ggur ad tɛeṭṭař.
4 Xzar, aqa ittuff, wah, řeɛmar nnes war iseggem dayes,
maca amsegged s l’iman nnes ad iddar. □
5 S tidett, binu aqa icemmet!
Binu aqa-t am yijj n bu-nnfaxet wenni war ittareyyḥen,
wenni issemɣaran řeɛmar nnes am řaxart.
Netta war ittjjiwin am řmewt
u iyru ɣares marra řegnus
u issmun ɣares marra iyduden. □
6 Ma war dd xas ttiwyen nitni ijj n wawař iweznen
uřa d ijj n yeẓri iccur s řemɛani innufaren, ad inin:
Uct x wenni ijarrwen min war iǧin nnes!
Ař meřmi ɛad?
Uct x wenni issdeqqařen ixef nnes s werhan!
7 Ma war dd-ttekkaren s řɣefřet inni i cek ɣa izeɛfen,
u ma war dd-ttfaqan ca inni cek ɣa yarren tᵉttarjijed,
u ma war d asen tᵉttiřid d takeccaḍt nsen?
8 Maɣar cek tkeccḍed aṭṭas n řegnus,
ad cek keccḍen marra řegnus iqqimen
di ssibbet n idammen n iwdan d lɛunf x temmurt,
u x tendint u x marra inni dayes izeddɣen.
9 Uct x wenni ikessben s řɣecc takeccaḍt i taddart nnes,
maḥend ad ibna řɛucc nnes di řuɛřa,
ḥima ad injem ammu zeg ufus n řɣar.
10 Cek tcawared řefḍiḥet i taddart nnek,
ḥima ad teqḍid x řegnus,
uca ammu i teggid ddenb di řeɛmar nnek.
11 Minzi aẓru isɣuyyu-dd zi řḥiḍ,
u taḥnact tᵉttarra-dd xas zi jar tefrawt.
12 Uct x wenni ibennan ict n tendint s idammen
uřa x wenni issrusan dsas n yict n tendint s řɣecc!
13 Xzar, ma war iǧi zi SIDI n řɛeskarat,
aqa řegnus arebbren ixef nsen i tmessi,
u ccuɛub ttaḥřen i walu?
14 Maɣar tammurt ad tᵉttwaccur
s tussna n uɛuǧi n SIDI,
am mammec ttdařen waman řebḥar.
15 Uct x wenni issessen amqarreb nnes,
wenni ixeǧḍen binu s ssem nnek u xenni isscar i-t,
maḥend ad iẓar tuɛɛaryant nsen.
16 Ad tessyiwned ixef nnek s řefḍiḥet deg wemcan n ccan.
Su cek řexxu ɛawed, uca ejj axtan nnek war iǧin ittban.
Řkas zeg ufus afusi n SIDI ad ɣarek dd-yas,
uřa d řefdiḥet x uɛuǧi nnek.
17 Maɣar řɛunf i teggid ḍidd i Lubnan ad cek ideř
uřa d areddeǧ n řmař i zi ten tessiggʷded,
di ssibbet n idammen n iwdan d lɛunf x temmurt,
u x tendint u x marra inni dayes izeddɣen.
Ggʷedem SIDI, war iǧi laṣnam imettan
18 Ma tizi n ijj n řexyař ineqcen,
umi t inqec uneqqac s yixef nnes,
man tizi n yijj n řexyař ifesyen u n ijj n umseřmed n ixarriqen,
řami wenni t iggin ittceř x min igga,
umi ittegg l’aṣnam igenwen?
19 Uct x wenni iqqaren i ukeccuḍ ‘Faq!’
u i weẓru igenwen ‘Kkar!’.
Ma izemmar ad isseřmed?
Xzar, aqa ittwařeḥḥef s wureɣ d nnuqart
u war dayes qaɛ bu buḥbeř.
20 SIDI aqa-t di Zzawect nnes iqeddsen.
Susem zzat i wudem nnes, marra tammurt!