Ḥabaqquq
Acetci n Ḥabaqquq
1
1 Řḥukm issaggʷaden nni iẓra unabi Ḥabaqquq. 2 “A SIDI, ař meřmi i ɣa qqimeɣ ttřaɣiɣ
u Cek war d ayi tᵉttesřid,
ař meřmi i ɣa qqimeɣ ttřaɣiɣ ‘Lɛunf!’,
u Cek war d ayi tessenjamed!
3 Mayemmi i d ayi tessecned řmuɛṣiyyet
u tᵉttɣimid txezzared ɣar řeɣben?
Maɣar areddeǧ d lɛunf aqa aten arendad inu,
u imsar umcubbec, ikkar-dd uruddez.
4 S uyenni i tedweř Ccariɛa břa jjehd,
u war dd-itteffeɣ ɛemmarṣ řḥeqq,
maɣar aɛeffan ittenneḍ i umsegged.
S uyenni i dd-itteffeɣ řḥeqq ifarɣ.
Twarrit n SIDI x tẓaǧit
5 Xzarem jar řegnus, xzarem,
innurzem uqemmum s utebhet,
maɣar Necc ad ggeɣ ict n řxedmet deg wussan nwem
i war tᵉttimnem mařa tesřim xas. ■
6 Maɣar xzarem, Necc ssekkareɣ Ikaldaniyyen,
řgens iqesḥen u imqeǧqen,
wenni igguren di řewseɛ n temmurt,
ḥima ad iṭṭef tizeddiɣin nni war iǧin nnes.
7 Issaggʷaden u issnexřaɛen iǧan!
Řḥeqq nnes d uɛuǧi nnes tteffɣen-dd zzayes.
8 Iysan nnes fsusen x uɣiřas,
nitni mmuzzaren mahu uccanen n ǧiřet,
imnayen nnes ttrabaɛen.
Imnayen nnes ttasen-dd zi řaggʷaj,
nitni ṭṭawen am ugider nni ittqeǧqen maḥend ad yecc.
9 Aqa netta ittas-dd, amen ikmeř, i lɛunf,
iɣembab nsen xezzaren ɣar zzat,
u netta ad issmun imeḥbas am yejdi.
10 Netta ad iqeṣṣar x ijeǧiden
u inni i ɣar teǧa ṣṣulṭa ad ten yegg d taḍeḥḥact.
Wah, netta ad iḍḥec x marra lburjat,
minzi netta ad issɛurrec ucař uca ad tent iṭṭef.
11 Xenni ad inneɛtar am uṣemmiḍ, u netta ad iɛdu
u ad idweř d amednub, maɣar jjehd nnes wanita ad yiři d arebbi nnes.
Acetci wiss tnayen n Ḥabaqquq
12 Zi mecḥař uya ma Cek war teǧid d SIDI, AREBBI inu, Amqeddas inu?
Neccin war nettmetti ca!
A SIDI, Cek tarrid i-t i řḥukm,
a Taṣḍart, Cek tfarzed t maḥend ad yiři i lɛiqab.
13 Cek d amezdag aṭṭas n tiṭṭawin ḥima ad twařant řɣar.
Cek war tzemmared ad tṣewḍed di tuɛeffna tebḍeř.
Mayemmi i ɣa tṣewḍed deg yenni itteggen s řeɣdaret?
Mayemmi i ɣa tesseɣḍed xmi iṣarreḍ uɛeffan
i wenni i xas iseggden?
14 Mayemmi i teggid iwdan am iseřman n řebḥar,
am immudar nni ittbuɛen x temmurt i war ɣar iǧi řḥakem?.
15 S tsennart issgeɛɛad i-ten-dd marra,
iyarru i-ten s tracca nnes,
uca issmun i-ten di tracca nnes n udellaɛ.
S uyenni ifarreḥ u ittfaja.
16 S uyenni iwehheb tiɣarṣa i tracca nnes,
uca ibexxar tiwhibin n řebxur i tracca n udellaɛ nnes.
minzi zzaysent i tedweř tesɣart nnes temɣar,
uřa d macca nnes aqa tředd.
17 Ma x manaya i ɣa iqqim issekkwa tracca nnes,
uca ad iqqim řebda ineqq řegnus břa ma ad yejj ḥed?