Taẓaǧit n Ḥabaqquq
3
1 Taẓaǧit n Ḥabaqquq, anabi, deg waṭṭas n tmijjiwin. 2 A SIDI, umi sřiɣ řexbar nnek, tuɣa tteggʷedeɣ.
A SIDI, sneddar řxedmet nnek ɛawed di řwest n iseggʷusa,
seccen i-tt di řwest n iseggʷusa,
deg weɣḍab ɛqeř x řeḥnunect nnek.
3 AREBBI yusa-dd zi Tayman u Amqeddas zeg wedrar n Faran. Silah.
Lɛaḍama nnes tedřa ijenwan
u aṣebbeḥ nnes iccur tammurt.
4 Tuɣa din amecnaw tissiqt n tfawt,
tuɣa ɣares fřitcat n wassam deg ufus nnes,
u dayes tnuffar tzemmar nnes.
5 Ṭṭaɛun ittizwar i wudem nnes,
řḥaduq n tmessi iffeɣ-dd zeg iḍaren nnes.
6 Netta ikkar uca yarra tammurt tᵉttenhezza,
Netta iẓra u igga ad arjijen řegnus,
idurar n zic ttwařebzen ařami dewřen d taɛejjajt,
tiwririn zi mecḥař uya ɣensent!
Ibriden ittduman i řebda aqa aten nnes.
7 Necc ẓriɣ iqiḍan n Kucan ttwaḥṣaren,
tijartiřin n iqiḍan n temmurt n Midyan ittawi tent usemmiḍ s jjehd.
8 Ma yarɣa weɣḍab n SIDI x iɣezran?
Ma tuɣa aɣḍab nnek ḍidd i iɣezran?
Ma tuɣa tedduqqzed s ufugem ḍidd i řebḥar,
řami tnedhed x yeysan nnek,
x ikarruten nnek n usenjem?
9 Řqews nnek ittwaɛarra marra,
tijaǧitin i tessiwřed aqa-ten d iɛumad i useqsaḥ. Silah.
Tfeǧqed tammurt s iɣezran.
10 Řami Cek ẓrin idurar, iřqef i-ten řewjeɛ,
řḥemřet n waman tuɣa tɛeddu,
aman yuǧɣen arrin tmijja nsen tᵉttwaseř,
geɛɛden ifassen nsen ɣar ujenna.
11 Tafuct, uřa d uyur, qqimen bedden di tzeddiɣt nsen.
Aqa ruḥen zi ssibbet n tfawt n fřitcat n řqews nnek,
zi ssibbet n tissiqt n lansa nnek itteḥduduqen.
12 S wesxeḍ teṣṣurufed tiwa i temmurt,
s weɣḍab nnek tɛefsed x řegnus.
13 Cek teffɣed i usenjem n řgens nnek,
i usenjem n Umedhun nnek.
Aqa cek tqeǧɛed tazeqqa n taddart n uɛeffan,
tɛarrid dsas ař iri. Silah.
14 Cek tessnuqqbed azeǧif n arrays nnes s iɛumad nnes.
Nitni usin-dd ɛeřfen-dd maḥend ad ayi zeǧɛen.
Aqa d meẓri nsen
mařa zemmaren ad ccen řmeskin s tnuffra.
15 Ak-d iysan nnek tᵉṭṭfed abrid di řebḥar,
akuffu n waman imeqqranen.
16 Řami sřiɣ, yarjij uɛeddis inu.
Umi sřiɣ řḥess nni, arjijen iyencicen inu,
axessar yudef ɣar ixsan inu,
u necc arjijeɣ deg wemcan inu.
Iři ad rajiɣ di řxaḍar x wass n řeḥṣaret,
xmi i ɣa issgeɛɛed x řgens,
u ad aneɣ iḥṣar.
Řefraḥet n Ḥabaqquq di SIDI
17 Waxxa war ittnuwwar wartu,
u war din tᵉttiři ɛad řɣiǧet ɣar tzayart,
waxxa řɣiǧet n zzitun ad tefceř
uřa d iyyaren war ttɣimin tticen řmacuř,
u ad ttwaqeḍɛen wuǧi zi řkuři
u war ttiřin ɛad ifunasen d tfunasin di řkurit,
18 ɛad amenni necc ad sřiweřweɣ i SIDI,
ad farḥeɣ zi AREBBI n usenjem inu.
19 SIDI, Sidi inu, Netta d jjhed inu.
Netta ittegg iḍaren inu fsusen am iḍaren n tudadin,
u Netta ittejja ayi ṣṣurufeɣ x řegɛudi.
I umeqqran n imeɣnajen. Ak-d uzenzun.