1 Deg useggʷas wiss třata n Kurac, ajeǧid n Lfurs, ittwassargeb ijj n wawař i Daniyal, wenni umi qqaren Balṭacaṣṣar, u awař nni tuɣa d tidett, issiweř x yijj n umenɣi ameqqran. Netta ifhem awař nni u tuɣa dayes řefhamet n tmeẓriwt.

2 Deg wussan nni tuɣa ayi, Daniyal, ceḍneɣ třata n simanat ass awarni umas. ^□   3 Macca i d ayi ittřiqan, war t cciɣ, aysum d binu war dd-usin deg uqemmum inu. War dhineɣ ixef inu ɣares ařami ɛdunt třata n simanat kemmřent. 4 Deg wass wiss arebɛa u-ɛicrin n uyur amezwaru, tuɣa beddeɣ ɣar tma n yeɣzar ameqqran wenni umi qqaren Dajla. ^■   5 Necc ssggaɛdeɣ tamuɣři inu uca ẓriɣ, u xzar, tuɣa din ijj n Weryaz yarḍ řeqṭen azdad u ɣar tejɛinna nnes ibyes s wureɣ iɣřan qaɛ zi Ufaz. ^■   6 Arrimet nnes tuɣa amecnaw aẓru n taxrisulit u udem nnes yareqq am wassamen u tiṭṭawin nnes tuɣa amecnaw iṣefḍawen yareqqen u iɣaǧen d iḍaren nnes ttwessgen am nnḥas icellelen u tmijja n wawařen nnes tuɣa-tt am zzhir n ijj n uhimur ameqqran.

7 Mɣir necc, Daniyal, ẓriɣ tameẓriwt nni, maca iryazen nni ɣari iǧan, war ẓrin ca tameẓriwt, maca tewḍa-dd xasen ict n arrehbet d tameqqrant uca arewřen nitni maḥend ad nnuffaren. 8 Necc qqimeɣ weḥḥdi u ẓriɣ tameẓriwt aya u war dayi iqqim jjehd ɛad. Tissiqt n wudem inu tedweř d řɣecc u war mniɛɣ jjehd ɛad. ^■   9 Necc sřiɣ zzhir n wawařen nnes u řami sřiɣ zzhir n wawařen nnes, wḍiɣ x uɣembub inu s yijj n yiḍeṣ yuǧeɣ u aɣembub inu tuɣa yarra ɣar temmurt.

10 U xzar, ijj n ufus iḥada ayi u yarra ayi ttenhezzeɣ x ifadden d třeqqa n ifassen inu.

11 Netta inna ayi: “Daniyal, cek d aryaz iɛizzen aṭṭas, ḥḍa awařen nni i d ac ɣa iniɣ u kkar, bedd din, minzi řexxu ttwasekkeɣ-dd Necc ɣarek.” Řami akidi issiweř s wawařen-a, kkareɣ-dd necc am ttarjijjeɣ.

12 Xenni inna ayi: “War tteggʷed ca, a Daniyal, minzi zeg wass amezwaru i di tarrid uř nnek ɣar tiɣit u maḥend ad tesswaḍɛed ixef nnek zzat i wudem n AREBBI, aqa ttwasřen wawařen nnek uca usiɣ-dd di ṭṭweɛ n wawařen nnek.

13 Maca řḥakem n tgeldit n Lfurs tuɣa ikkar ḍidd inu waḥd u-ɛicrin n wussan. U xzar, Mixayil, ijjen zeg imezwura n řḥukkam, yusa-dd ḥima ad ad ayi iwc afus u Necc qqimeɣ dinni ɣar ijeǧiden n Lfurs.

14 Řexxu usiɣ-dd ḥima ad cek ssfehmeɣ min ɣa imsaren i řgens nnek deg uneggar n wussan, minzi tameẓriwt aqa-t i wussan nni .”

15 Řami tuɣa akidi issawař s wawařen-a, uḍareɣ s uɣembub inu ɣar temmurt, sseɣdeɣ.

16 U xzar, ijjen am yijj n mmis n bnadem iḥada iyencicen inu. Xenni arzmeɣ aqemmum uca ssiwřeɣ, nniɣ i wenni ibedden zzati: “A Sidi inu, umi ẓriɣ tameẓriwt iṭṭef ayi am řewjeɛ n tarut, am war mniɛeɣ jjehd ɛad.

17 Mammec i ɣa izemmar umsexxar n Sidi inu ad akidek issiweř, a Sidi? Aqa necc, war dayi iqqim jjehd niɣ twarrit n nnefs ɛad.

18 Xenni iḥada ayi ɛawed. Netta yarwes deg yijj n bnadem u igga dayi jjehd.

19 Netta inna: “War tteggʷed ca, cek, a aryaz iɛizzen! Ad ɣarek yiři řehna, egg taryast, wah egg taryast!” Umi Netta akidi issiweř ammu, idweř-dd ɣari jjehd ɛawed u nniɣ: “Siweř, a Sidi inu, Cek teggid dayi jjehd.”

20 Xenni inna: “Tessned cek, mayemmi i ɣarek dd-usiɣ? Řexxu ad ɛeqbeɣ ḥima ad menɣeɣ ak-d řḥakem n Lfurs u xmi i ɣa ffɣeɣ i umenɣi, xenni ad dd-yas řḥakem n Lyunan. 21 Maca ad cek ssecneɣ min yurin deg wedlis n tidett, waxxa war din uřa d ijjen i d ayi itteggen twiza, mɣir řḥakem nwem, Mixayil.”