1 Deg useggʷas amezwaru n Dariyus, mmis n Aḥacwirus, wenni zeg ayt n Maday, wenni idewřen d ajeǧid x tgeldit n Ikaldaniyyen, ^□   2 deg useggʷas amezwaru n tgelda nnes iban-ayi-dd, i necc Daniyal, zeg idlisen, belli řqedd n iseggʷusa i x tuɣa issiweř wawař n SIDI i unabi Irmiya, i ukemmeř n řweqt n řxirbat n Urcalim, tuɣa-t sebɛin n iseggʷusa. 3 Necc arriɣ aɣembub inu ɣar Sidi AREBBI, ḥima ad xas arzuɣ s tẓaǧit d uzaweg, s uẓummi deg weqrab d yiɣɣeḍ. 4 Necc ẓẓuǧeɣ i SIDI, AREBBI inu, u neɛmeɣ ddnub nneɣ, nniɣ

“A Sidi inu, Cek d Arebbi ameqqran d issiggʷiden, wenni iḥeṭṭan Řɛahd nnes d tmexsiwt nnes icewwaren i yinni t ittexsen u i yinni iḥeṭṭan tiweṣṣa nnes. ^■   5 Neccin nexḍa u negga řmuɛṣiyyet d řɣar u nɣewweɣ am neffeɣ zi tiweṣṣa d lfarayiḍ nnek. ^■   6 War nesři i imsexxaren nnek, inabiyyen, inni tuɣa issawařen deg Yisem nnek i ijeǧiden nneɣ d řḥukkam nneɣ d řejdud nneɣ uřa i marra  řgens n temmurt.

7 Cek, a Sidi inu, ɣarek tasegda, maca neccin ɣarneɣ řeḥya deg uɣembub, am mammec teǧa ass-a, ɣar iryazen n Yahuda d imezdaɣ n Urcalim d marra Israil, ɣar yenni yudsen d yenni iggʷejen di marra timmura mani xasen tuẓẓřed Cek di ssibbet n řeɣdar nsen i zi Cek ɣḍaren. 8 A SIDI, dayneɣ řeḥya deg uɣembub nneɣ, aqa-t deg ijeǧiden nneɣ di řḥukkam nneɣ deg ibabaten nneɣ maɣar neccin nexḍa akidek.

9 Ɣar Sidi inu, AREBBI nneɣ, arreḥmet d weɣfar waxxa neccin nɣewweɣ xas. ^■  

10 War nesři i tmijja n SIDI, AREBBI nneɣ, maḥend ad nuyur di lqawanin nnes nni i d aneɣ iwca s ufus n imsexxaren nnes, inabiyyen.

11 Marra Israil tuɣa ittɛedda x Ccariɛa nnek u itteffeɣ zeg webrid maḥend war ittesři i tmijja nnek. U ammu i xaneɣ tᵉttwazeǧeɛ nneɛřet i ittwaḍemnen s tjaǧit i ittwarin di Ccariɛa n Musa, amsexxar n AREBBI, minzi neccin nexḍa akides. ^■  

12 Netta igga awařen nnes ttbeddan, awařen nni issiweř akidneɣ u ak-d řquḍat nneɣ nni tuɣa i xaneɣ iḥekkmen, am dayneɣ igga ijj n řɣar d ameqqran i war imsaren ɛemmarṣ sadu ujenna, amecnaw min igga i Urcalim.

13 Am mammec tura di Ccariɛa n Musa, ammu yusa-dd xaneɣ marra řɣar nni, u neccin xenni war nzaweg ca zzat i wudem n SIDI, AREBBI nneɣ, maḥend ad nḥeyyed x řmuɛṣiyyet nneɣ u maḥend ad narzu ad nefhem tidett nnek.

14 SIDI iḥḍa řɣar uca issars i-t-i-dd xaneɣ, maɣar SIDI, AREBBI nneɣ d amsegged di marra řefɛayeř nnes nni igga umi war nesři ɣar tmijja nnes.

15 U řexxu, a SIDI, AREBBI nneɣ, wenni issuffɣen řgens nnek zi temmurt n Miṣra s yijj n ufus ijehden u wenni iggin i yixef nnes ijj n Yisem, am mammec iǧa ař ass-a. Neccin nexḍa u negga řɣar. ^■  

16 A Sidi inu, zi ssibbet n tsegda nnek, sḥeyyed aɣḍab nnek d wesɛar nnek x tendint nnek Urcalim, x wedrar nnek iqeddsen. Maɣar zi ssibbet n ddnub nneɣ d řmuɛṣiyyet n ibabaten nneɣ tedweř Urcalim d řgens nnek d řɛar i marra inni d aneɣ dd-innḍen.

17 U řexxu, a AREBBI nneɣ, seř ɣar tẓaǧit n umsexxar nnek u ɣar uzaweg nnes, ejj udem nnek ad yegg tafawt x Zzawect nnek Iqeddsen, tenni idewřen d řxarbet, di ṭṭweɛ n Sidi inu.

18 Ewc amezzuɣ nnek, a AREBBI, seř. Arzem tiṭṭawin nnek u xzar řxirbat d tendint nni ittwařaɣan s Yisem nnek, minzi neccin war newḍi zzat i wudem nnek maḥend ad nzaweg x usdaheǧi n tsegda nneɣ, maca x usdaheǧi n arraḥmet nnek tameqqrant.

19 A Sidi inu, seř! A Sidi inu, ɣfar! A Sidi inu, ḥḍa uca egg, war tɛeṭṭař ca, di ṭṭweɛ n yixef nnek, a AREBBI inu, maɣar tandint nnek d řgens nnek ttwařaɣan s Yisem nnek.”

20 Am tuɣa ssawařeɣ ɛad u ttẓaǧiɣ u neɛɛmeɣ s ddnub inu d ddnub n řgens inu Israil u ttzeǧɛeɣ azaweg inu zzat i wudem n SIDI, AREBBI inu, di ṭṭweɛ n wedrar iqeddsen n AREBBI inu, 21 am tuɣa ssawařeɣ ɛad ammu, ttẓaǧiɣ, yusa-dd weryaz Jibril nni ẓriɣ deg umezwaru di tmeẓriwt, iḍwa-dd zeg ujenna ɣari uca iḥada ayi ɣar řweqt n tɣarṣt n tmeddit. ^□   22 Netta issefhem u issiweř akidi, inna: “Daniyal, necc ffɣeɣ-dd ɣar řweqt-a maḥend ad cek ssargbeɣ x řmeɛna. 23 Ɣar umezwaru n uzaweg nnek iffeɣ-dd yijj n wawař u necc usiɣ-dd ḥima ad ac t nniɣ, maɣar cek d ijj n weryaz iɛizzen aṭṭas. Fhem awař-a u arzu řefhamet di tmeẓriwt-a.

24 Ttwaggent sebɛin n simanat x řgens nnek u x tendint nnek iqeddsen, ḥima ad tᵉttwasbedd ttaɛeddu u ad ittwacemmeɛ ddenb u ad tᵉttwaṣřeḥ řmuɛṣiyyet u ḥima ad tᵉttwawi tsegda u ḥima ad tᵉttwacemmeɛ tmeẓriwt d unabi u ḥima ad ittwadhen aqdas n uqeddes. 25 Ssen u fhem, aqa zeg wami dd-iffeɣ wawař ḥima ad ɛedřen u ad bnan Urcalim ɛawed ɣares ař Amedhun, min ixs ad yini Lmasiḥ, Řḥakem, aqa sebɛa n simanat u ɛad tnayen u-settin n simanat. Ad tᵉttwabna Urcalim ɛawed ak-d wazzay d řḥiḍ deg ikuden yewɛaren.

26 Awarni i tnayen u-settin n simanat nni ad ittwakkes Umedhun u war ɣares ittiři walu. U tandint d Zzawect Iqeddsen ad ttwareddǧent s yijj n  řgens n ijj n řḥakem wenni i dd ɣa yasen u taneggarut nnes ad tiři di sseḥřet uca ad din yiři umenɣi ɣares ař aneggar, areddeǧ nni aqa yura ad yiři. 27 Netta ad igg ijj n řɛahd ak-d waṭṭas s uɣiř u deg wezyen n simana ad issbedd taɣarṣt d tewhibt n řɣiǧet u x wafriw n nnɛawat ad dd-yas ijj n umteḥḥay ɣares ař ɣa ittwafarreɣ řeḥkam i yurin x wenni ittwateḥḥan. ^□  ■