1 “Deg useggʷas amezwaru n Dariyus, Amaday, beddeɣ Necc akides maḥend ad t ssejehdeɣ u ad as ssendeɣ.

2 Řexxu ad ac iniɣ ijj n wawař d tidett! Xzar, ad kkaren ɛad třata n ijeǧiden di Lfurs uca wenni wiss arebɛa ad igg agřa ameqqran i yixef nnes, ktar x marra inneɣni. U awarni xmi i ɣa iṭṭef tizemmar s wagřa nnes, ad issnekkar marra midden nnes ḍidd i tgeldit n Lyunan. ^□  

3 Xenni ad ikkar ijj n ujeǧid ijhed wenni i ɣa iṣellṭen s ṣṣulṭa tameqqrant u netta ad igg min ixs netta. 4 Xmi i ɣa ikkar, řexdenni ad tareẓ tgeldit nnes, ad tᵉttwamṣebḍa x arebɛa n iɣezdisen n usemmiḍ n ujenna, maca war tᵉttiři tgeldit i tarwa nnes u war ɣares tᵉttiři ṣṣulṭa am tenni i zi tuɣa ittṣelleḍ netta, maɣar tageldit ad tᵉttwaqřeɛ u ad tiři i inneɣni war iǧi i yina.

5 Xenni ajeǧid n ljanub ad idweř ijhed, maca ijj zi řḥukkam nnes ad idweř ijhed xas u wanita ad iṣelleṭ s ṣṣulṭa tameqqrant x ṣṣulṭa nnes. 6 Awarni řami ɛdun ca n iseggʷusa, nitni ad ggen ijj n řɛahd u yeǧis n ujeǧid n ljanub ad dd-tas ɣar ujeǧid n ccamal maḥend ad tt tseggem, maca nettat war tzemmar ad teḥḍa jjehd n uɣiř nnes u netta war izemmar ad iqqim ibedd, u aɣiř nnes am nneɣni. Nettat ad tᵉttwasellem uřa d yinni tt iwyen d wenni i-tt-i-dd yurwen d wenni tt issjehden deg wussan nni.

7 Maca zeg ict n tɣeddut n iẓewran nnes ad ikkar ijjen deg wemcan nnes. Netta ad iffeɣ ḍidd i řɛeskar uca ad yadef lburj ijehden n ujeǧid n ccamal u ad daysen igg min ixs u ad dd-iban ijhed qaɛ. 8 Arebbiten nsen ak-d řexyařat nsen ifesyen d řeqcuɛ nsen iɣřan i ittwaggen s nnuqart d wureɣ ad ten yawi d tkeccaḍt ɣar Miṣra u xenni ad ibeɛɛed ca n iseggʷusa x ujeǧid n ccamal. 9 U netta ad yadef tageldit n ljanub u ad iɛqeb ɣar temmurt nnes.

10 Iḥenjiren nnes ad ḥezzmen i umenɣi u ad ssmunen ijj n ubarru n řɛeskar ameqqran u netta ad dd-yas u ad iɛemmar tammurt u ad xas iɛdu. U awarni řami dd-iɛqeb, ad ḥezzmen ɛawed i umenɣi ad yadef ɣares ař lburj nnes ijehden.

11 Uca ad immuzzar ujeǧid n ljanub uca iggur ad iffeɣ akides imneɣ ak-d ujeǧid n ccamal, wenni i ɣa issmunen ijj n ubarru ameqqran n řɛeskar, maca abarru nni ad ittwasellem deg ufus nnes.

12 Mařa immeksi ubarru nni, xenni uř nnes ad issgeɛɛed ixef nnes u netta ad isseɣdeř ɛecra n řuřuf, maca netta war ittmarni di jjehd.

13 Ajeǧid n ccamal ad dd-idweř u ad issmun ijj n ubarru ameqqran ktar zeg umezwaru. Awarni i ikuden d iseggʷusa ad dd-yas s yijj n řɛeskar ameqqran u s waṭṭas n řesnaḥ.

14 Deg wussan nni ad ɣewwɣen aṭṭas x ujeǧid n ljanub u ayt n bu-řexcunet n řgens nnek ad ssgeɛɛden ixef nsen ḥima ad ssqefřen ict n tmeẓriwt, maca nitni ad wḍan.

15 Xenni ad dd-yas ujeǧid n ccamal, ad issbedd ijj n řḥiḍ i řeḥṣaret u ad iṭṭef ict n tendint ifaryen. Iɣaǧen n ljanub ijehden war zemmaren ad qqimen ttqawamen uřa d řgens n yinni zzayes ittwafarzen lla. War din ittiři jjehd ḥima ad qqimen ttbeddan.

16 Maca wenni dd-yusin ḍidd nnes, ad igg min ixs. Uřa d ijj war izemmar ad ibedd zzat i wudem nnes u netta ad ibedd di Temmurt n Telwizt u areddeǧ ad yiři s ufus nnes.

17 Netta ad yarzu ad issemten tizemmar nnes di marra tageldit nnes u ɣares imtawiyyen iseggden u ad zzaysen igg. Netta ad as iwc yeǧis n temɣarin ḥima ad yareddeǧ tageldit nni, maca nettat war tᵉttbedda u war d as teffiɣ.

18 Xenni ad yarr aɣembub nnes ɣar tegzirin uca ad iṭṭef aṭṭas zzaysent. Maca ijj n ukumandar n řɛeskar ad issbedd řḥegra nnes xas, břa ma izemmar netta ad as ixeǧeṣ řḥegra nnes.

19 Netta ad yarr aɣembub nnes ɣar lburjat n temmurt nnes u xenni ad inqarḍ, ad iwḍa u war ittwifi ɛad. 20 Ad ikkar ijjen deg wemcan nnes wenni i ɣa isseɛdun ijjen x temmurt nni i ɣa issehwan aɛuǧi n tgeldit, maca wanita ad ittwarẓ di ca n wussan, war iǧi s imcubbucen uřa s umenɣi.

21 Xenni ad dd-ikkar ijj n bnadem aḥeggar deg wemcan nnes wenni war d as tticen lɛaḍama igellden. Netta ad dd-yas s řɣefřet u ad iṭṭef tageldit s teḥraymect nnes. 22 Iɣaǧen ijehden nni ifeyyḍen tammurt, ad ttwamḥan zzat i wudem inu u ad ttwarrẓen uřa d řḥakem n Řɛahd. 23 U zeg wami i ɣa ggen ijj n řɛeqd akides, ad igg s řɣecc. Ad issgeɛɛed u ad idweř izemmar xasen s drus n řgens waha. 24 Ad yadef s řɣefřet di jjwayeh issɣemmayen n lɛamala uca ad igg min war ggin ibabaten nnes niɣ ibabaten n ibabaten nnes: ad yacar u ad ikecceḍ u marra agřawen ad ten izeǧeɛ jar asen. Netta ggur ad ixarreṣ deg inwayen ḍidd i tneddam ifaryen, ař ict n řweqt ittwaggen.

25 S yijj n řɛeskar ameqqran ad yarr jjehd nnes d wuř nnes ḍidd i yijj n ujeǧid n ljanub uca ajeǧid n ljanub ad iffeɣ ɣar umenɣi s yijj n řɛeskar ameqqran ijhed, maca war izemmar ad ibedd, minzi ad xas ggen timeɛmač, 26 d yenni ittetten zi macca n ujeǧid, ad t arẓen u řɛeskar nnes ad ittwamḥa u aṭṭas ad ttwanɣen. 27 Uř n tnayen n ijeǧiden-a ad yiři isseggur ɣar řɣar u x ṭṭabřa d ict ad inin ixarriqen, maca man aya war ineffeɛ, maɣar aneggar ittraja ɛad ař řweqt ittwaggen. 28 S ubarru n wagřa ad yareggʷeḥ ɣar temmurt nnes u uř nnes ad yiři ḍidd i Řɛahd iqeddsen u netta ad igg amenni u xenni ad iɛqeb ɣar temmurt nnes.

29 Deg ict n řweqt ittwaggen ad dd-iɛqeb, ad iraḥ ɣar ljanub, maca twařa aya taneggarut war tᵉttiři am twařa tamezwarut. 30 Maɣar iɣarruba n Kittim ad ɣares dd-asen u netta ad ittwasiggʷed, ad iɛqeb u xenni ad isxeḍ x Řɛahd iqeddsen u ad igg amenni. Xmi dd ɣa iɛqeb ad immsefhem ak-d yenni dd-iffɣen zi Řɛahd iqeddsen. ^□   31 Ad zzayes kkaren iɣaǧen n řɛeskar nni i ɣa iɣeṣben Zzawect Iqeddsen, lburj, uca ad kksen taɣarṣt n řebda u ad din ssbedden nnɛi n uxarreb. 32 Iɛeffanen ad ssfeḍḥen Řɛahd s teḥraymect, maca řgens, aqa inni issnen AREBBI nsen, ggur ad iřin jehden u ad ggen. 33 Ifehhamen n řgens ad ssfetnen aṭṭas, maca aṭṭas ad nnqarḍen s ssif d iḥudaq n tmessi d tmeḥbast d ukecceḍ, aṭṭas n wussan. 34 Xmi i ɣa nqarḍen, ad afen ict n twiza tameẓyant u aṭṭas ad ɣarsen dd-munen s teḥraymect. 35 Ca zeg ifehhamen ad nqarḍen maḥend ad ttwaṣeffan u ad ttwassizedgen u ad ttwaṣeffan ař řweqt n uneggar, maɣar ad yiři ař řweqt ittwaggen.

36 Ajeǧid ad igg min ixs netta u ad issgeɛɛed ixef nnes u ad issemɣar ixef nnes sennej x kuř arebbi u netta ad yini řeɛjeb n tmesřayin ḍidd i Arebbi x marra irebbiten. Netta ad ifřeḥ ař ɣa ittwasbedd wesxeḍ, maɣar aqa yura uca ad yiři. ^■   37 Netta war ggur ad t cqan irebbiten n řejdud nnes uřa d řeɣrizet n temɣarin. Netta war d as icqi uřa d ijj n arebbi, maca ad issemɣar ixef nnes sennej x marra. 38 Deg wemcan nnes ad iweqqar arebbi n lburjat. Ad iweqqar arebbi nni war ssinen ca ibabaten nnes, s wureɣ d nnuqart d yeẓra iɣřan d řeqcuɛ iɣřan. 39 Netta ad igg ḍidd i lburjat ifaryen s arebbi aɣrib. Wenni t ɣa iqebřen, ad iksi aṭṭas n ccan u ad iṣelleṭ x waṭṭas u netta ad xasen ibḍa tammurt d řmunet.

40 Di řweqt n uneggaru ad as izdem ujeǧid n ljanub s waccawen nnes u ajeǧid n ccamal ad xas idduqqez s ikarruten d imnayen d waṭṭas n iɣarruba u netta ad yadef timmura am řḥemřet uca xenni ad xasen iɛdu. 41 Netta ad yadef Tammurt n Telwizt u aṭṭas ad nnqarḍen, maca ina ad arewřen zeg ufus nnes: Idum d Mu’ab d umezwar n ayt n Ɛammun. 42 Netta ad isswiẓẓeḍ s ufus nnes ɣar temmura. Uřa d tammurt n Miṣra war tnejjem. 43 Netta ad iṣelleṭ x txubay n wureɣ d nnuqart d marra řeqcuɛ iɣřan n Miṣra. Ayt n Libya d ayt n Kuc ad t ḍfaren deg iṣuraf nnes.

44 maca řexburat zi ccarq u zi ccamal ad t ssnexřeɛen. Xenni ad iffeɣ s wesɛar ameqqran ḥima ad yareddeǧ aṭṭas u ḥima ad ten iteḥḥa. 45 Ad iwwet tixuzan nnes igellden jar řebḥur d wedrar n Telwizt Iqeddsen u netta ad yaweḍ ɣar uneggar nnes u war din ittif ḥed ad t iɛawen.”