1 Awař n SIDI nni dd-yusin ɣar unabi Irmiya x řegnus.

2 X Miṣra

Ḍidd n řɛeskar n Firɛun Naxu, ajeǧid n Miṣra, wenni din ɣar yeɣzar n Lfuraṭ, ɣar Karkamic, wenni yarna Nabuxadraṣṣar, ajeǧid n Babil, deg useggʷas wiss arebɛa n Yahuyaqim, mmis n Yuciya, ajeǧid n Yahuda.

3 “Swejdem taseddart n uɛeskari d tseddart nnes tameqqrant uca wadmem i umenɣi!

4 Ḥezzmen i iysan, nyem xasem, a imnayen n yeysan! Sbeddem ixef nwem s lkaskat x izeǧifen nwem. Sqeḍɛem fřitcat uca ḥezzmem s warruḍ n wuzzař! ^■   5 Mayemmi ttwařiɣ Necc aqa nitni nnxeřɛen ařami dewřen ɣar ḍeffar? Ɛad ayt n bu-teɣruḍt nsen ttwarẓen, menɛen di tarewřa uca war dd-nnqeřben ɣar ḍeffar. Aqa din asnexřiɛ di marra iɣezdisen, ammu i iqqar SIDI. 6 Ejj wenni ifsusen war yarekkweř uřa d bu-teɣruḍt war inejjem: nnqarḍen, wḍan di ccamal, ɣar tma n yeɣzar n Lfuraṭ.”

7 “Man wen i din dd-igeɛɛden am iɣezran n Miṣra, aman nnes zehharen am iɣezran? 8 Miṣra tgeɛɛed-dd amecnaw Nil u aman nnes zehharen am iɣezran, teqqar: ‘Necc ad geɛɛdeɣ, ad dřeɣ tammurt, ad qḍiɣ x tendint d yenni dayes izeddɣen. 9 Gaɛɛdem, a iysan, muzzarem, kenniw, a ikarruten n umenɣi! Jjem ayt n bu-teɣruḍt ad ffɣen: ayt n Kuc, ayt n Fuṭ inni yarebbun taseddart n uɛeskari d ayt n Lud inni itteṭṭfen řqews uca meḥḥḍen t. ^■  

10 Ass-a d ijj n wass n Sidi inu, SIDI n řɛeskarat, ijj n wass n wexřaf maḥend ad ixřef i yixef nnes zeg iɣrimen nnes. Ad yecc ssif, ad ijjawen uca ad isscar s idammen nsen, maɣar aqa din ict n tɣarṣt i Sidi inu, SIDI n řɛeskarat, di temmurt n ccamal ɣar yeɣzar n Lfuraṭ.

11 Gaɛɛdem ɣar Jilɛad, awyem-d balsam, a cem taɛzarect, iǧis n Miṣra!. Baṭeř tarennid di ddwawat, war din bu ugenfu i cem. ^■  

12 Sřin řegnus x řefḍiḥet nnem uca teccur temmurt zeg iɣuyyan n řeḥřiq nnem, maɣar bu-teɣruḍt imqarqeb ak-d bu-teɣruḍṭ nneɣni, munen wḍan s tnayen.”

13 Awař nni issiweř SIDI ɣar unabi Irmiya x twasit n Nabuxadraṣṣar, ajeǧid n Babil, ḥima ad iwwet tammurt n Miṣra.

14 “Barrḥem t di Miṣra u jjem ad as sřen di Majdal, jjem ad as sřen di Nuf d Taḥfanḥis. Inim: ‘Bedd abeddi, wjed!’, maɣar ssif icca marra iɣezdisen i d ac dd-innḍen.

15 Mayemmi ttwamḥan ayt n bu-ṣṣulṭa nnek? War izemmar netta ad iqqim ibedd, minzi SIDI iɛarren i-ten.

16 Netta yarra aṭṭas ad nqarḍen, wah, aryaz iwḍa x wenneɣni, uca nitni nnan: ‘Kkarem, jjem aneɣ ad nedweř ɣar řgens nneɣ u ɣar temmurt mani nexřeq zi ssibbet n ssif iwɛaren.’

17 Din i řaɣan nitni: ‘Aqa Firɛun, ajeǧid n Miṣra, ittwareddeǧ, aqa ijja akud ittwaggen ad iɛdu.’ ”

18 “S tidett am ddareɣ Necc, ammu i iqqar Ujeǧid, SIDI n řɛeskarat d Isem nnes: ‘Netta ad dd-yas, am wedrar n Tabur jar idurar u am idurar n Karmil ɣar řebḥar!

19 Smun řeḥwayej nnem i tmeḥbast, a cem tamezduɣt, iǧis n Miṣra, maɣar tammurt n Nuf ad tedweř d řxirbet uca ad tᵉttwareddeǧ ařami war din iqqim uřa d ijj izeddeɣ.

20 Tammurt n Miṣra d ict n tyenduzt tecna, maca ad ɣares dd-yas ijj n yarezza d adarɣař, ad dd-yas zi ccamal. 21 Uřa d icewwařen nnes di řwest nnes ggin am iyenduzen iṣeḥḥen, maca uřa d nitni ɛeqben-dd, nitni arewřen jmiɛ, war qqimen bedden, maɣar ass n uḍeyyeɛ nsen ad xasen dd-yas, akud n wexřaf nsen. 22 Tmijja nnes tegga amecnaw řḥess n ufiɣar, maɣar ad din uyuren ak-d ijj n řɛeskar u ad ɣares dd-asen s ccwaqar am inezdamen n ukeccuḍ. ^□   23 Nitni ad qessen azɣar nnes, ammu i iqqar SIDI, maɣar řɛeskar war izemmar ad ittwaḥseb, minzi nitni aqa aten deg waṭṭas x iburexsen, war zemmaren ad ttwaḥesben. ^□   24 Tseḍḥa yeǧis n Miṣra, aqa tᵉttwagg deg ufus n ijj n řgens zi ccamal.’ ”

25 “SIDI n řɛeskarat, AREBBI n Israil, inna: ‘Xzar, Necc ad ɛaqbeɣ Amun zi temmurt n Nu, u Firɛun d Miṣra, irebbiten nnes d ijeǧiden nnes, wah, Firɛun d yenni xas ittcařen. 26 Necc ad ten wceɣ deg ufus n yinni yarezzun tudart nsen řa deg ufus n Nabuxadraṣṣar, ajeǧid n Babil, uřa deg ufus n imsexxaren nnes. Awarni i uya ad tedweř temmurt s imezdaɣ ɛawed am deg wussan n zic, ammu i iqqar SIDI.’ ”

27 “War teggʷed, a cek amsexxar inu Yaɛqub, war tefciř, Israil, maɣar xzar, Necc ad cek ssnejmeɣ zi timmura iggʷejen u zzariɛet nnek zi tmeḥbast nsen. Ad yareggʷeḥ Yaɛqub uca ad ɣares tiři řhudnet, ad iddar di řaman uca uřa d ijj war iqqim ad t issnexřeɛ ɛad. ^■   28 War tteggʷed, a cek amsexxar inu Yaɛqub, ammu i iqqar SIDI, maɣar Necc akidek, minzi Necc ad qḍiɣ x marra řegnus nni mani kenniw ssiggʷejeɣ, maca ɛemmarṣ war xak qeṭṭiɣ, maca ad cek webbxeɣ s řeɛbar iseggden u war cek heṣṣbeɣ d amezdag.’ ” ^■