1 Řami Cafaṭya, mmis n Mattan, d Jadalya, mmis n Facḥur, d Yuxal, mmis n Calamya, d Facḥur, mmis n Malkiya, sřin i wawařen nni issiweř Irmiya ɣar marra řgens, umi wanita inna: 2 “Ammu i iqqar SIDI: ‘Wenni i ɣa iqqimen di tendint-a, ad ittwaneɣ s ssif, řaẓ niɣ s ṭṭaɛun, maca wenni i ɣa iffɣen ɣar Ikaldaniyyen, ad iqqim iddar. Netta ad yawi akides buḥbeř nnes am tkeccaḍt, ad iqqim iddar.’ ^■   3 Ammu i iqqar SIDI: ‘Tandint-a ad temmewc deg ufus n řɛeskar n ujeǧid n Babil u netta ad tt iṭṭef.’ ”

4 Xas uca nnan řḥukkam i ujeǧid: “Ittxeṣṣa ad ittwaneɣ weryaz-a, minzi ammu i issefcař ifassen n iɛeskariyyen nni ɛad iqqimen di tendint-a uřa d ifassen n marra řgens umi ɣarsen issawař awařen-a, maɣar aryaz-a war yarezzu ca řehna i tendint-a, maca yarezzu řɣar. 5 Inna ujeǧid Ṣidqiya: “Xzar, netta aqa-t deg ufus nnem, maɣar ajeǧid war izemmar ad awem igg walu.” 6 Uca ṭṭfen nitni Irmiya uca nḍaren t deg wanu n mmis n ujeǧid Malkiya, wenni iǧan di řemraḥ n řeḥbes. Seyyben Irmiya s iseɣwan swadday. Tuɣa war din bu waman deg wanu, maca mɣir abaryuḍ uca iɣḍes Irmiya deg ubaryuḍ.

7 Umi isřa Ɛabd-Malik, Akuci, ijj n umsexxar icenɛen di taddart n ujeǧid, belli aqa nḍaren Irmiya deg wanu, uca iqqim ujeǧid ɣar tewwart n Binyamin, ^□   8 iffeɣ Ɛabd-Malik zi taddart n ujeǧid uca issiweř ak-d ujeǧid, inna: 9 “A sidi inu ajeǧid, iryazen-a ggin min war iḥřin di marra min ggin i unabi Irmiya, wenni nḍaren nitni deg wanu. Tuɣa izemmar ad dinni immet s řaẓ, maɣar ɛad walu aɣrum di tendint.”

10 Xenni yumur ujeǧid Ɛabd-Malik Akuci zi temmurt n Kuc, inna: “Ksi ssenni třatin n yeryazen sadu ufus nnek uca sgeɛɛed-dd anabi Irmiya zeg wanu qbeř i ɣa immet.”

11 Ɛabd-Malik iksi iryazen nni sadu ufus nnes uca yudef ɣar taddart n ujeǧid ɣares ař wadday n wexxam n txubay. Ssenni iksi-dd ikettanen iqdimen d warruḍ iqqarsen uca issehwa i-ten-dd s iseɣwan ɣar Irmiya deg wanu.

12 Xenni inna Ɛabd-Malik Akuci i Irmiya: “Egg ikettanen iqdimen d warruḍ iqqarsen sadu tiddiɣin n iɣaǧen nnek uca egg iseɣwan swadday!” Uca ammu i tt igga Irmiya.

13 Jebden-dd nitni Irmiya s iseɣwan uca ssgeɛɛden t-i-dd zeg wanu. Maca Irmiya iqqim di řemraḥ n řeḥbes.

14 Xenni issekk ajeǧid Ṣidqiya ca n imsexxaren nnes, ijja ad as dd-awyen anabi Irmiya ɣar wadaf wiss třata ɣar Taddart n SIDI. Inna ujeǧid i Irmiya: “Necc xseɣ ad cek sseqsiɣ x ict n řḥajjet, war xafi tt tteffar walu.”

15 Yarra-dd Irmiya x Ṣidqiya: “Mařa necc ssargbeɣ cek, ma war d ayi tneqqed zeɛma? U mařa wciɣ ac ijj n array, cek war ɣari dd-tᵉttesřed!”

16 Xas uca ijjuǧ ujeǧid Ṣidqiya i Irmiya s tnuffra inna: “S tidett am iddar SIDI wenni d aneɣ iwcin tudart-a: Uct xafi, mařa necc nɣiɣ cek niɣ mařa wciɣ cek deg ifassen n yeryazen nni yarezzun tudart nnek!” ^■  

17 Inna Irmiya i Ṣidqiya: “Ammu i iqqar SIDI, AREBBI n řɛeskarat, AREBBI n Israil: Mařa cek ad teffɣed s tidett ɣar řḥukkam n ujeǧid n Babil, ad teqqimed ad teddared, uca tandint-a war tᵉttwasecmaḍ s tmessi u cek ad teqqimed ad teddared, cek d taddart nnek.

18 Maca mařa war teffiɣed ca ɣar řḥukkam n ujeǧid n Babil, xenni ad temmewc tendint-a deg ufus n Ikaldaniyyen. Nitni ad tt sscemḍen s tmessi u cek war tnejjmed zeg ifassen nsen.”

19 Ajeǧid Ṣidqiya inna i Irmiya: “Necc tteggʷedeɣ zeg Wudayen nni yeɛdun ɣar Ikaldaniyyen, ařami nitni war d ayi ssɛeddun ɣar ufus nsen u war zzayi teggen min xsen.”

20 Inna as Irmiya: “Nitni war cek sellmen ca. Seř maca ɣar tmijja n SIDI, ɣar řḥařḍ inu, xenni ad tiřid mliḥ u ad teqqimed ad teddared. ^□   21 Maca mařa tugid ad teffɣed, xenni d wa d awař nni d ayi isscen SIDI: 22 Xzar, marra timɣarin nni tuɣa iqqimen di taddart n ujeǧid n Yahuda, ad ttwanedhent ɣar řḥukkam n ujeǧid n Babil uca nitenti ad inint:

Iryazen nni ak-d tuɣa teddared di řehna,

aqa ɣdaren cek u ggin cek deg ufus.

Nnuɣen iḍaren nnek deg ubaryuḍ,

dewřen ɣar ḍeffar! ^□  

23 Marra timɣarin nnek d iḥenjiren nnek ad ttwanedhen ɣar Ikaldaniyyen, uca uřa d cek simant nnek war tnejjmed zeg ufus nsen, minzi ad tᵉttwaṭṭfed zeg ujeǧid n Babil u tandint-a ad tᵉttwasecmeḍ s tmessi.”

24 Xenni Ṣidqiya inna i Irmiya: “Ittxeṣṣa uřa d ijj war ittessen awařen-a, ammu war ggur ad temmted. 25 Mařa řḥukkam sřin aqa necc ssiwřeɣ akidek u ad ɣarek dd-asen, ad as inin: ‘Ini aneɣ min tennid i ujeǧid! War xaneɣ teffar walu, niɣ aqa ad cek nenneɣ: Min xas kidek issiweř ujeǧid?’ 26 xenni ittxeṣṣa ad asen tinid: ‘Necc wḍiɣ s řqedd inu zzat i wudem n ujeǧid ḥima war ittejji ad ayi arren ɣar taddart n Yunatan maḥend ad dinni mmteɣ.’ ”

27 Řami dd-usin marra řḥukkam ɣar Irmiya, iḥaja ten marra awařen-a inni tuɣa yumur ujeǧid. Xas uca jjin t maɣar uřa d ijj war isři tamesřact simant nnes. 28 Ammu i iqqim Irmiya di řemraḥ n řeḥbes ař ass nni di tᵉttwaṭṭef Urcalim, u netta tuɣa-t ɛad din umi tᵉttwaṭṭef Urcalim.