1 Idweř Ṣidqiya, mmis n Yuciya, d ajeǧid deg wemcan n Kun-Yahu, mmis n Yahuyaqim, wenni tuɣa igga Nabuxadraṣṣar, ajeǧid n Babil, d ajeǧid x temmurt n Yahuda. 2 Wanita war isři ca ɣar wawařen n SIDI nni issiweř Netta s ufus n unabi Irmiya, war iǧi wanita uřa d imsexxaren nnes uřa d řgens n temmurt.

3 Waxxa amenni issekk ujeǧid Ṣidqiya Yahuxal, mmis n Calamya, d Ṣafanya, mmis n Maɛsiyya, ɣar unabi Irmiya maḥend ad as inin: “Ẓaǧ xaneɣ maca ɣar SIDI, AREBBI nneɣ!” ^□  

4 Irmiya tuɣa ɛad izemmar ad yadef u ad iffeɣ di řwest n řgens u nitni tuɣa ɛad war t nḍaren di řḥebs. 5 Iffeɣ-dd řɛeskar n Firɛun zi Miṣra uca umi sřin Ikaldaniyyen nni tuɣa iḥeṣṣaren Urcalim x man aya, ruḥen aggʷejen x Urcalim. ^■  

6 Xenni yusa-dd wawař n SIDI ɣar unabi Irmiya, inna:

7 “Ammu i iqqar SIDI, AREBBI n Israil: Ammu i ɣa tinim i ujeǧid n Yahuda, wenni kenniw ɣari dd-issekken ḥima ad ayi tesseqsam: ‘Xzar, řɛeskar n Firɛun nni dd-iffɣen maḥend ad awem iwc afus, ad dd-iɛqeb ɣar temmurt nnes, ɣar Miṣra! 8 Ad dd-dewřen Ikaldaniyyen, ad mmenɣen ak-d tendint-a uca ad tt ṭṭfen, ad as qqden timessi.’

9 Ammu i iqqar SIDI: ‘War cemmtem ixef nwem xmi i ɣa tinim: Ikaldaniyyen ad xaneɣ aggʷejen, ad uyuren!, minzi nitni aqa war gguren.

10 Waxxa mařa kenniw tɣeřbem marra řɛeskar n Ikaldaniyyen inni akidwem ittmenɣan, uca ad zzaysen qqimen mɣir iryazen iyezmen aṭṭas, aqa nitni ad kkaren, kuř ijj deg uqiḍun nnes, uca ad qqden s tmessi i tendint-a.’ ”

11 Imsar umi dd-issgeɛɛed řɛeskar n Ikaldaniyyen zi Urcalim zi ssibbet n řɛeskar n Firɛun,

12 iffeɣ Irmiya zi Urcalim maḥend ad iraḥ ɣar temmurt n Binyamin ḥima ad dinni iṭṭef ict n tesɣart di řwest n řgens nnes.

13 Řami t tuɣa di tewwart n Binyamin, tuɣa din akumandar n tɛessast, qqaren as Yariyya, mmis n Calamya, mmis n Ḥananya. Netta iṭṭef anabi Irmiya, inna: “Cek texsed ad tarewřed ɣar Ikaldaniyyen!”

14 Yarra-dd xas Irmiya: “Man aya mɣir d axarriq! Necc war xseɣ ca ad arewřeɣ ɣar Ikaldaniyyen!” Maca netta war ɣares isři ca uca iṭṭef Yariyya Irmiya uca yiwyi t ɣar řḥukkam n řgens.

15 Ffugmen řḥukkam aṭṭas x Irmiya, wtin t uca ggin t di řeḥbes, di taddart n umarir Yunatan, maɣar tanita tuɣa arrin tt d taddart n tɛessast.

16 Ammu dd-iwḍa Irmiya deg weḥfur n imeḥbas u deg ixxamen n řeḥbes. Dinni iqqim Irmiya aṭṭas n wussan.

17 Issekk ujeǧid Ṣidqiya ijjen maḥend ad t-i-dd-awyen uca isseqsa t ujeǧid s tnuffra di tzeddiɣt nnes, inna: “Ma aqa din zeɛma ca n wawař n SIDI?” Inna as Irmiya: “Aqa-t din!” Xenni inna: “Cek ad tewḍid deg ufus n ujeǧid n Babil.”

18 Řexdenni inna Irmiya i ujeǧid Ṣidqiya: “Man řɛib i dayek ggiɣ niɣ deg imsexxaren nnek niɣ di řgens-a ařami kenniw d ayi tenḍarem di řeḥbes?

19 Mani ǧan řexxu inabiyyen nwem nni tuɣa ittnabben i kenniw, qqaren: Ajeǧid n Babil war dd-ittis ḍidd nwem u ḍidd i temmurt-a! 20 Xenni řexxu, seř maca, a sidi inu ajeǧid! Iři ad taf tutra inu d arḍa zzat i wudem nnek! War ttejji ad ayi arren ɣar taddart n umarir Yunatan ḥima war dinni ttmettiɣ.” 21 Xenni yumur ujeǧid Ṣidqiya ad ḥḍan x Irmiya di řemraḥ n řeḥbes uca wcin as kuř ass ijj n wengur n weɣrum zi Zzenqet n Ixbayziyyen ařami iqḍa weɣrum zi tendint. Ammu i iqqim Irmiya di řemraḥ n řeḥbes. ^■