1 “Di ṭṭweɛ n Ṣihyun war zemmareɣ ad sseɣdeɣ, di ṭṭweɛ n Urcalim war ttesqiriɣ, ɣares ař dd ɣa tenqar tsegda nnes am tissiqt u asenjem nnes am wesfeḍ yareqqen. 2 Ad ẓaren řegnus tasegda nnem u marra ijeǧiden ad ẓaren aɛuǧi nnem. Ad am řaɣan s yijj n yisem n jdid nni d am i ɣa igga uqemmum n SIDI. ^■   3 Ad tiřid d ttaj icewwaren deg ufus n SIDI, uřa d areẓẓet igellden deg ufus n AREBBI nnem. 4 War d am qqaren ɛad ‘Tenni di semḥen!’, u war d as qqaren ɛad i temmurt nnem ‘Tammurt ixřan!’, maca ad am inin ‘Řxaḍar inu!’, u tammurt nnem ‘Tanemřact!’, maɣar tusid-dd x řxaḍar n SIDI u tammurt nnem ggur ad tᵉttwamřec. 5 Maɣar am uɛezri imřec taɛzarect, ammu i kidem ɣa meřcen iḥenjiren nnem, uca am muřay ifarreḥ i tesřit, ammu i d am ɣa ifarḥ AREBBI nnem.”

6 “A Urcalim, ssbeddeɣ iɛessasen x řeḥyuḍ nnem nni war ssɣidin řebda, deg wass d ǧiřet. A kenniw inni iɛeqqřen x SIDI, war ttareyyḥem! 7 War ttareyyḥem di ṭṭweɛ nnes, ɣares ař dd issbedd Urcalim uca igga i-tt d aṣebbeḥ x temmurt. 8 SIDI ijjuǧ ɣar ufus nnes afusi u ɣar uɣiř nnes ijehden: ‘Ɛemmarṣ ɛad ad wceɣ imendi nnem d macca i řɛedyan nnem, u ɛemmarṣ ɛad ad ssesweɣ ibarraniyyen binu nnem n jdid i x teksid tamara! 9 Maɣar wi t ɣa issmunen, ggur ad zzayes ccen u ad ssemɣaren SIDI, u wi i ɣa iřeqḍen aḍiř, ad zzayes swen di řemraḥat n Zzawect inu Iqeddsen.’ ”

10 “Ɛdum, ɛdum zi tewwura uca swejdem i řgens abrid. Sgeɛɛdem, sgeɛɛdem abrid iwaṭan, kksem iẓra, sgeɛɛdem taɛeǧant i řegnus! ^■  

11 Xzar, SIDI igga ad sřen, ař ṭṭarf n temmurt. Inim i yeǧis n Ṣihyun: ‘Xzar, asenjem nnem yusa-dd, xzar, řmunet nnes ɣares uca řexřaṣ nnes ɣar zzates.’

12 Ad asen qqaren: ‘Řgens amqeddas, imefdiyyen n SIDI!’, uca ad am qqaren: ‘Tenni x tuɣa arezzun!’ d ‘Tandint i war ittwajjen!’.” ^□