1 “Arruḥ n Sidi, SIDI, xafi minzi idhen ayi SIDI inu maḥend ad awyeɣ řexbar aṣebḥan i imwaḍɛen. Netta issekk ayi-dd, maḥend ad jbareɣ inni umi ittwarẓ uř nsen, maḥend ad barrḥeɣ s třelli i imeḥbas d unufseř zi řeḥbes i yenni icarfen, ^■   2 maḥend ad barrḥeɣ aseggʷas n arḍa i SIDI d wass n wexřaf n AREBBI nneɣ, maḥend ad ssfewwjeɣ marra inni iceḍnen, 3 maḥend ad ggeɣ i yenni iceḍnen di Ṣihyun aqa ad asen wcen řehzuṭ deg wemcan n yiɣɣeḍ, zzect n řefraḥet deg wemcan n wecḍan, arruḍ n usemɣar deg wemcan n buḥbeř ittwarẓen, ḥima ad asen řaɣan ‘Ticejjura n yigg n tsegda!’, tenni ittwaẓẓun zi SIDI, i řɛezz nnes!

4 Ad ssbedden řxirbat n wecḥař uya, ad ɛedřen řebniyyat ihedmen n řejdud nsen, uca ad ssbedden ɛawed tineddam ixarrben nni tuɣa ihedmen zi jjiř ař jjiř nneɣni. ^■   5 Ibarraniyyen ad iřin wejden ḥima ad arewsen uǧi nwem uca ibarraniyyen ad iřin d ifeǧaḥen nwem d ayt n tzayart nwem. 6 Ad awem řaɣan maca ‘Ikehhanen n SIDI!’ uca ad awem inin ‘Imsexxaren n AREBBI nneɣ!’. Ad teccem agřa n řegnus uca ad tfeyycem s uɛuǧi nsen. ^■  

7 Deg wemcan n useḍḥi nwem, ad tᵉṭṭfem tnayen n tseqqar, u deg wemcan n řefḍiḥet, ad sřiwřewen nitni x tesɣart nsen: ammu i ɣa ṭṭfen tnayen n tseqqar di temmurt nsen. Řefraḥet ittduman ad ɣarsen tiři. 8 Maɣar Necc, SIDI, ttexseɣ řḥeqq, carrheɣ tukkarḍa s lɛunf. Necc ad asen wceɣ řmunet di řaman, ad kidsen qqneɣ ijj n Řɛahd ittduman. 9 Zzariɛet nsen ad tedweř tᵉttwassen jar řegnus uca tarwa nsen di řwest n řegnus. Marra wi ten i ɣa iẓaren, ad qenɛen aqa ina d zzariɛet i ibarek SIDI.”

10 “Farḥeɣ aṭṭas di SIDI, řeɛmar inu ifarḥ di AREBBI inu minzi Netta issyarḍ ayi arruḍ n usenjem, u s useřham n tsegda i d ayi iřeḥḥef, am muřay i iqqnen areẓẓet n ukehhan u am tesřit izewwqen ixef nnes s temrist nnes.

11 Maɣar am temmurt tᵉttejja aɣemmuy nnes ad dd-iffeɣ u am weḥwic issɣemmay min dayes izarrɛen, ammu i dd isseɣmay Sidi inu, SIDI, tasegda d ccan zzat i tiṭṭawin n marra řegnus.”