1 “Min iɛna wenni dd-yusin zi Idum, deg warruḍ s uzzeggwaɣ yuǧřen, iɛuǧen deg warruḍ nnes, wenni igguren di jjehd nnes ameqqran?”

“Necc d wenni issawařen di tsegda, d wenni izemmaren ad issenjem!”

2 “Mayemmi arruḍ nnek d azeggwaɣ u mayemmi arruḍ nnek am werruḍ n wenni iɛeffsen x tsirt n uḍiř?” ^■  

3 “Necc weḥḥdi d wenni iɛefsen tasirt n binu u war din tuɣi uřa d ijj akidi zi řegnus. Ɛefseɣ xasen deg weɣḍab inu, řebzeɣ ten deg wesɛar inu. Idammen nsen ruccen x warruḍ inu, ssfesdeɣ marra arruḍ inu. 4 Maɣar ass n wexřaf aqa-t ɣari deg wuř, u yusa-dd useggʷas i yenni x fdiɣ. ^□  ■  

5 Necc xzareɣ ammu d wammu, maca war din tuɣi uřa d ijj i d ayi iwcin afus. Necc tuɣa ttbehteɣ, minzi uřa d ijjen war kidi ibedd. Ufiɣ mɣir aɣiř inu i d ayi issnejmen uca asɛar inu tuɣa d aɛemmed inu. ^■   6 Necc ɛefseɣ x řegnus deg weɣḍab inu, Necc sscareɣ ten deg wesɛar inu uca ggiɣ idammen nsen ttazzřen ɣar temmurt.”

7 “Necc xseɣ ad idareɣ timegga n tmexsiwt icewwaren n SIDI, timegga iṣebḥen n SIDI, marra min i d aneɣ igga SIDI, uřa d řxir ameqqran i isscen i taddart n Israil ɛlaḥsab arreḥmet nnes d řemraɣet n tmexsiwt nnes icewwaren. 8 Netta inna: ‘Nitni d řgens inu, iḥenjiren nni war issxarriqen!” Uca Netta idweř d Amsenjem i nitni. 9 Di marra řeḥṣaret nsen tuɣa uřa d Netta ittwaḥṣar, uca Lmalak n Uɣembub nnes issenjem i-ten. Di tayri nnes d arḍa nnes ifekk i-ten. Netta issgeɛɛed i-ten uca yarbu ten di marra ussan n wecḥař uya.” ^■  

10 “Nitni maca ɣewwɣen uca ssceḍnen Arruḥ Iqeddsen nnes. S uya idweř asen d řeɛdu i nitni, imneɣ akidsen. ^■  

11 Waxxa amenni iɛqeř x wussan n wecḥař uya, x Musa d řgens nnes. Mani iǧa wenni d asen dd-issgeɛɛden zi řebḥar ak-d imeksawen n wuǧi nnes? Mani iǧa wenni issarsen Arruḥ Iqeddsen di řwest nsen, ^□  

12 wenni iggin afus nnes ittseqsiqen aṭṭas ad yuyur ak-d Musa, wenni ibḍan aman zzat i tiṭṭawin nsen ḥima ad dd-yawi i yixef nnes Isem i řebda, ^□  

13 wenni ten inedhen deg waman yuǧɣen? Am uyis di řexřa war nnqarḍen ca, ^■  

14 am řmař nni dd-ihekkwan di teɣzurt, ammu i issareyyeḥ i-ten Arruḥ n SIDI, ammu tnedhed řgens nnek maḥend ad dd-tawyed i yixef nnek ijj n Isem ittseqsiqen aṭṭas.”

15 “Sijj zeg ujenna, u wařa zi Tzeddiɣt nnek tamqeddast teccur s tessiqt! Mani iǧa wasam nnek u mani ǧant tmegga nnek ijehden? Tessiggʷejed xafi řehnunect nnek d arreḥmet nnek. ^■  

16 Aqa Cek d Babatneɣ, maɣar Ibrahim war d aneɣ issin uca uřa d Israil war d aneɣ issin. Cek, a SIDI, d Babatneɣ, Amefdi nneɣ, Isem nnek aqa-t zi řebda.

17 A SIDI, mayemmi i d aneɣ tejjid netteffeɣ zeg ibriden nnek, mayemmi tesseqseḥed uř nneɣ ařami war Cek neggʷed? Dweř-dd di ṭṭweɛ n imsexxaren nnek, di ṭṭweɛ n tqebbař n tesɣart nnek.

18 Řgens nnek iṭṭef i-tt d řwart mɣir cwayt n řweqt. Iɣrimen nneɣ ɛefsen x Zzawect nnek Iqeddsen. ^■  

19 Aqa nedweř am yenni i war x tḥekmed zeg wecḥař uya u i x war ittwařaɣa Isem nnek. Mři tcarrged ijenwan ḥima ad dd-tehwid, ad arjijen idurar zzat i wudem nnek.”