1 “Řaɣa s jjehd, war ttceṭṭar, ejj tmijja nnek ad tgeɛɛed am uyicc n icarri uca barreḥ i řgens inu iɛeddiyen nsen u i taddart n Yaɛqub ddnub nsen! 2 Nitni arezzun xafi ass x wass uca iɛjeb asen tussna n ibriden inu, amecnaw mammec ǧan d řgens nni itteggen tasegda u war ittejji řḥeqq n AREBBI nnes. Nitni ttaren zzayi řeḥkamat iseggden, iɛjeb asen ad dd-qarrben ɣar AREBBI, 3 qqaren maca: ‘Mayemmi nẓumm, uc Cek war t teẓrid? Mayemmi nessecḍan buḥbeř nneɣ am Cek war d as tḥekkared?’ Xzar, deg wass n uẓummi nwem, tarrim meẓri uca tzeyyarem aṭṭas marra ixeddamen nwem.

4 Xzar, aẓummi nwem yiwi kenniw ɣar umcubbec d umenɣi u ɣar tiyyita s řpuniyyet. War ttẓummem amecnaw ass-a maḥend ad tessḥessem ɣar tmijja nwem di řuɛřa! 5 Ma wa d aẓummi nni ixḍareɣ Necc: ijj n wass nni di ɣa iɛeddeb bnadem řeɛmar nnes, wenni x i ɣa imeyyeř bnadem azeǧif nnes am uɣanim, u ad issars taxancet d iɣɣeḍ am qama nnes? Ma teqqared i uya aẓummi, ma aya d ass nni yusa-dd x řxaḍar n SIDI? ^■  

6 Ma war iǧi wa d aẓummi nni ixḍareɣ: afekki n iceddiyyen n řɣar, azeɛwaḍ n tesɣunin n zzayřet, anufseř i yenni ittwaḥṣaren, aqa ad tekksem qaɛ zzayřet? 7 Ma war iǧi wa d aẓummi nni ixḍareɣ, aqa ad tebḍid aɣrum nnek ak-d wenni iǧuzen uca ad tessidfed řmusakin nni ittwadarrcen ɣar taddart? Mařa cek teẓrid aɛaryan, ad t tessyarḍed u war tessnufared ixef nnek zeg wenni iǧan zeg weysum d idammen nnek? ^■   8 Xenni tafawt nnek ad dd-tenqar am tuffut n řḥař uca asgenfi nnek ad dd-yaweḍ deɣya, tasegda nnek ad ac tizwar uca aɛuǧi n SIDI ad yiři d aɣezdis nnek aneggaru.

9 Xenni ad třaɣid uca SIDI ad xak dd-yarr. Ad tesɣuyyed ɣar twiza, uca xenni ad yini Netta: ‘Xzar, aqa ayi da!’ Mařa nican tekksed zzayret zi řwest nnek, uřa d aceyyar s uḍaḍ d wawař aɛeffan,

10 uca ad tarzmed řeɛmar nnek i wenni iǧuẓen u ad tessjjiwned řeɛmar iceḍnen! Xenni ad dd-tenqar tfawt nnek di taǧest uca tubbarcent nnek ad tiři am ṭṭya n uziř.

11 SIDI ad cek ittgewwad řebda u Netta ad issjjiwen řeɛmar nnek di jjwayeh yuẓɣen uca ad issejhed ixsan nnek. Ad tdewřed am weḥwic ittwassun u am řɛunṣar ittazzřen n waman i war ttɣarran aman nnes ɛemmarṣ.

12 Inni zzayek dd-iffɣen ad ɛawden asbeddi i řxirbat n wecḥař uya, ad ɛedřen dsusa n jjiřat iɛdun uca ad ac qqaren: ‘Wenni iɛeddřen tareẓẓitin, d wenni ittarran izubaq ad daysen uyuren!’

13 Mařa xenni tqeřbed aḍar nnek x wass n ssebt, x taggit min d ac itteɛjiben deg wass inu iqeddsen, uca ad třaɣid i wass n ssebt: ‘Ṭṭibet!’, i min iǧan iqeddsen i SIDI: ‘Aɛuǧi!’, uca ad tweqqared ass n ssebt am war tḍeffareḍ ibriden nnek, war tᵉtteggid min d ac itteɛjiben u war tessiwiřid ɣar tizi nnek,

14 xenni ad tafed řefraḥet nnek di SIDI u Necc ad cek jjeɣ ad tnedhed tiwa i řegɛudi n temmurt. Ad cek ssecceɣ zi tesɣart n babac Yaɛqub, minzi aqemmum n SIDI issiweř.”