1 “Xzar, afus n SIDI war iǧi d aquḍaḍ ḥima ad issenjem, amezzuɣ nnes war idduhcar aqa Netta war ittesři, ^■   2 maca řmuɛṣiyyet nwem d min ittemsebḍan jar awem d AREBBI nwem, uca ddnub nwem řeḥḥfen zzaywem aɣembub nnes, aqa Netta war i d awem ittesři. 3 Maɣar ttwasxemmjen ifassen nwem s idammen, iḍewḍan nwem s řmuɛṣiyyet, iyencicen nwem ssxarriqen, iřes nwem inṭeq s min war iḥrin. 4 Uřa d ijj issmuna s tsegda uca uřa d ijj ittwacarreɛ s řḥeqq. Marra nitni ttɛemmden x min iǧan baṭeř uca qqaren ixarriqen. Aqa kessin s ddeyset n řɣecc u ttarwen-dd řmuɛṣiyyet. ^■   5 Ḥebḍen x tmeǧařin n třefsa u zeṭṭen axmař n qundɛa. Wenni iccin zi tmeǧařin nsen, ad immet, u xmi ittareẓẓa ijj icten, tᵉtteffeɣ-dd ict n tfiɣart. 6 Ixmaren nsen war dd-usin i werruḍ uca war zemmaren ad arḍen ixef nsen s min ggin ifassen nsen. Min ggin aqa d řexdayem n řmuɛṣiyyet uřa d řxedmet n řexcunect n ifassen nsen. ^■   7 Iḍaren nsen ttaẓẓřen ɣar řɣar u nitni ttqeǧiqen maḥend ad ssizzřen idammen imezdagen. Ixarriṣen nsen d ixarriṣen ccuren ak-d řmuɛṣiyyet, areddeǧ d ukehheḍ aqa aten x ibriden nsen iwaṭan. ^■   8 Abrid n řehna war t ssinen u řatarat nsen war xasent walu n řḥeqq. Nitni ssfarraɣen izubaq nsen i yixef nsen, marra inni daysen igguren, war ssinen řehna.”

9 “S uyenni ittɣima řḥeqq iggʷej xaneɣ u tasegda war dd aneɣ dd-tᵉttikkwiḍ. Neccin nettraja tafawt, maca xzar, aqa din ṭṭřam, nraja tissiqt n tfawt, maca nuyur di taǧest.

10 Nettfafa am iḍarɣařen ak-d řḥiḍ u nᵉttemhafa ssa ɣar da, axmi war ɣarneɣ ǧint tiṭṭawin. Nweṭṭa di ṭṭḥa n uziř axmi di tbambast x yenni iddaren axmi x imettan.

11 Neccin nzehhar marra am ddubat u nettgergur am ttgergurent tedbirin, nettraja řḥeqq, maca war dd-yusi, nettraja asenjem, maca iggʷej xaneɣ.

12 Maɣar iɛeddiyen nneɣ aṭṭas qibač Nnek u ddnub nneɣ cehhden xaneɣ, minzi iɛeddiyen nneɣ aqa aten ɣarneɣ u řmuɛṣiyyat nneɣ aqa nessen i-tent:

13 aɛeddi d uxarreq x SIDI, uca aḥeyyed zi AREBBI nneɣ, řhard x ddeǧ d uɣewweɣ, aḥaweř d usuffeɣ n ixarriqen zeg wuř.

14 S uya ittwexxar řḥeqq ɣar ḍeffar, uca tᵉttɣima tsegda ɣar řaggʷaj, maɣar tidett tennedref deg webrid, uca min iseggmen war izemmar ad dd-yadef.

15 Tbeṭṭeř tidett u wenni iḥeyyden x tuɛeffna idweř d takeccaḍt.”

“Aya iẓra i-t SIDI uca tuɣa-t d aɛeffan di tiṭṭawin nnes aqa war din iǧi řḥeqq.

16 Iẓra aqa war din uřa d ijjen u tuɣa ittebhet řami uřa d ijj iksi s řmeɛruf i uceffaɛ. S uya yiwi uɣiř nnes d asenjem uca tasegda nnes tuɣa d aɛemmed nnes. ^■  

17 Issyarḍ ixef nnes tasegda am warruḍ n wuzzař uca issars lkask n usenjem x uzeǧif nnes. Netta yarḍ arruḍ n wexřaf uca iřeḥḥef s wasam am iřeḥḥef s useřham. ^■  

18 Am mammec sdahǧent tmegga nsen, ammu i ɣa ixřef i iɣrimen nnes s wesɛar, i řɛedyan nnes min d asen dd-yusin. Tigzirin ad tent iwc řexřef nsent i isdaḥǧen.”

19 “Xenni ad ggʷeden zeg Yisem n SIDI zi manis tɣeǧi tfuct, uca aɛuǧi nnes zi manis dd-tneqqar tfuct. Maɣar ad dd-yas am yeɣzar iḥṣaren, asemmiḍ n SIDI ad t iɛarn. 20 Ad dd-yas Umefdi zi Ṣihyun, i yenni i ɣa ituben zeg iɛeddiyen nsen zi Yaɛqub, iqqar SIDI.” ^■  

21 “Wa d Řɛahd inu akidsen, iqqar SIDI. Arruḥ inu, wenni xak iǧan, d wawařen inu nni ggiɣ deg uqemmum nnek, war xak ttḥeyyiden ca zeg uqemmum nnek, war iǧi zeg uqemmum n tarwa nnek uřa zeg uqemmun n tarwa n tarwa nnek, zi řexxu ař i řebda, iqqar SIDI.”