57
1 “Ittwahellek umsegged uca war din uřa d ijj wi t ittkessin ɣar wuř. Iryazen daysen tamexsiwt icewwaren mmeksin, břa ma iḥeṭṭa uřa d ijj aqa amsegged immeksi qbeř ma i dd ɣa yas ass n lmuṣiba. ■ 2 Netta ad dd-yadef di řehna, ad arreyḥen nitni di qamat nsen deg imeḍřan, kuř ijj wenni yuyuren abrid nnes iseggmen.” 3 “Qarrbem-dd da, a kenniw iḥenjiren n tbezgiwt, tarwa n yinni izennan u n temɣart n farq-ccɣeř! 4 Wi zi testehezzam ammu, wi x tcarragem aqemmum u wi ɣar tjebbdem iřes ɣar barra? Ma war teǧim d iḥenjiren n uɛeddi, tarwa n řɣecc? □ 5 Kenniw inni itthajen ɣar tcejjura n yigg, sadu kuř tacejjart tazizawt, kenniw inni iɣarrṣen i iḥenjiren imeẓyanen di teɣzurin, swadday di tezziyin n řejruf. □ 6 Tasɣart nnem ɣar iẓra iyuydan n teɣzurin. Din, wah manawya d ac dd-yekkaren. Uřa i nitni tzeǧɛed asen tawhibt n useyyeb, twehhbed tawhibt n řɣiǧet. Ma Necc ad qqimeɣ sqareɣ x man aya?”
7 “X wedrar yuɛřan d ittwasgeɛɛden tessud qama nnem. Uřa dinni tgeɛɛded ḥima ad twehhbed taɣarṣt. 8 Awarni i tewwura d řeḍruf nnes teggid řeɛřamet nnem n řidaret, ‘mzuza nnem’, maɣar cem tenɛezřed xafi d taɛaryant u tgeɛɛded dinni sennej. Tɛedřed i yixef nnem qama d tmiriwt uca tɛahded ixef nnem ak-d ca zzaysen. Tettexsed tassut nsen, teẓrid taryast nsen.
9 Ak-d zzect truḥed ɣar ujeǧid uca tarnid aṭṭas di řeɛṭur ittfuḥen nnem. Tessekked imsexxaren nnem ɣar řaggʷaj uca tesswaḍɛed ixef nnem ař řaxart.
10 Zi ssibbet n waṭṭas n imsagaren nnem tuḥřed, maca ɛemmarṣ war tennid: ‘War din iqqim řayas!’ Tufid jjehd n jdid i tudart. S uya war teḥřiced.
11 Man wen zi tessḥissfed u teggʷeded aqa cem tessxarrqed xafi u war d ayi tidared, war d ayi teggid ɣar wuř nnem? Ma war tuɣi Necc sseɣdeɣ zeg wecḥař uya, ařami cem war zzayi teggʷided ca ɛad?”
12 “Necc ad ɛawdeɣ x tsegda nnem d tmegga nnem: war cem neffɛen ca.
13 Xmi i ɣa třaɣid, ejj xenni agraw nnem i ɣarem tessmuned ad cem ifekk. Nitni marra maca ad ten yawi uṣemmiḍ, ijj n uṣuḍi ad ten iksi, maca wenni xafi ittcařen, ad iwart tammurt d wedrar inu amqeddas d tasɣart.” ■
Asgenfi d usfewwej i imwaḍɛen d yenni s wuř ittwarẓin
14 “Ad yini: ‘Sgeɛɛdem, sgeɛɛdem abrid, ksem min issenqraḍen zeg webrid n řgens inu!’
15 Maɣar ammu i iqqar Wenni yuɛřan u Wenni ittwassgeɛɛden, Wenni izeddɣen di řebda, Wenni umi qqaren aqa Amqeddas i iǧa: ‘Necc zeddɣeɣ di řuɛřa u deg weqdas u ɣar wenni umi ittwarẓ buḥbeř u ɣar umwaḍeɛ n buḥbeř, maḥend ad arreɣ buḥbeř n imwaḍɛen d wuř n inni ittwarẓin ɣar Tudart!’
16 Maɣar Necc war ttemcubbuceɣ i řebda u war tteggeɣ ad idduqqez weɣḍab inu břa qeṭṭu, minzi xenni iři ad yarxu kuř buḥbeř zi zzat n wudem inu, řeɛmur nni ggiɣ.” ■
17 “Necc ffugmeɣ x řmuɛṣiyyet n meẓri nnes deg warbeḥ uca wtiɣ řgens. Necc nnuffareɣ uca idduqqez weɣḍab inu. Maca řgens yuyur, idweř ɣar webrid n wuř nnes.”
18 “Necc ẓriɣ ibriden nnes, ad t ssgenfiɣ, ad t ssqebbḍeɣ, ad as ssfewwjeɣ uca ad as wceɣ ifewwajen, i netta u i yenni iceḍnen nnes.
19 Necc ad dd-xeřqeɣ řɣiǧet n iyencicen nsen. ‘Řehna, řehna i yenni iggʷejen u i yenni yudsen’, iqqar SIDI.”
20 “Maca iɛeffanen ggin am řebḥar inhewřen, wenni war izemmaren ad yarsa, uca aman nnes iwyen-dd abaryuḍ d ubeǧaɛ.
21 Iɛeffanen war ɣar iǧi řehna!, iqqar AREBBI inu.” ■