1 “Ammu i iqqar SIDI: ‘Ḥḍam řḥeqq uca ggem tasegda, minzi asenjem inu yudes-dd, ad dd-yas deɣya, uca tasegda inu tiweḍ-dd ḥima ad tᵉttwasargeb. 2 Sseɛd n weryaz nni itteggen ammu uřa d mmis n bnadem nni imennɛen di man aya, wenni iḥeṭṭan ass n ssebt ḥima war ittwasɛiǧit, d wenni iḥeṭṭan afus nnes ařami war ittegg zi marra min war iḥřin.

3 War ttejji abarrani wenni iqqnen ɣar SIDI ad yini: ‘SIDI iɛzeř ayi qaɛ x řgens nnes!’, uca war ttejji amsexxar wenni umi ttwaddzen imeǧařen ad yini: ‘Xzar, necc d tacejjart yuẓɣen!’ ^□  

4 Maɣar ammu i iqqar SIDI x imsexxaren inni umi ttwaddzen imeǧařen, inni iḥeṭṭan ussan inu n ssebt u ttixḍaren min iǧan i arḍa inu u ttᵉṭṭfen di Řɛahd inu: 5 ‘Necc ad asen ggeɣ amcan di Taddart inu u jar řeḥyuḍ inu uca ad asen wceɣ isem ḥsen x yisem n iḥenjiren d tḥenjirin. Kuř ijjen zzaysen ad as wceɣ isem n řebda nni ɛemmarṣ war imeḥḥin.

6 Ibarraniyyen nni i ɣa iqqnen ɣar SIDI ḥima ad as sexxaren u ḥima ad xsen Isem n SIDI, ḥima ad iřin d imsexxaren nnes, marra inni iḥeṭṭan ass n ssebt ḥima war ittwasɛiǧit, uřa d inni imennɛen di Řɛahd inu, 7 ad ten awyeɣ ɛawed ɣar wedrar amqeddes inu u ad ten ssefraḥeɣ di Taddart inu n tẓaǧit. Tiɣarṣa nsen n wecmaḍ d tɣarṣa nsen nneɣni ad iřint i arḍa inu x uɛalṭar inu, maɣar Taddart inu ad as řaɣan Taddart n tẓaǧit i marra řegnus.’ ” ^■  

8 “Sidi inu, SIDI, wenni d issmunan inni x yuẓẓřen n Israil, issawař: ‘Necc ad ɣares dd-ssmuneɣ ktar x yenni dd-ittwasmunen.’ ”

9 “Marra řewḥuc n řexřa, asem-dd i macca, wah, marra řmař n wezɣar! ^□  

10 Iɛessasen nnes ddarɣřen marra, war ssinen walu. Marra nitni d iṭan ibekmen, war zemmaren ad zun, ṭṭsen, zzřen, ttexsen anudem.

11 Iṭan-a arjfen ař ṭṭarf, war ssinen tayawant. Nitni d imeksawen war ifehhmen, kuř ijjen zzaysen iḍeffar abrid nnes, kuř ijj yarezzu tizi nnes, ɛad wenni d aneggar zzaysen.

12 Qqaren: ‘Asettiw-dd, ad dd-awyeɣ binu, ad nesscar s ccrab. Am wass-a ammu i ɣa yiři uřa d tiwecca, ad yiři ɛad d ameqqran d icnan xas!’ ”