1 “A, marra inni iffuden, asem-dd ɣar waman, wenni war ɣar ǧint tenɛacin, asem-dd, ssɣem uca ccem, wah asem-dd uca sɣem binu d uɣi, břa tinɛacin u břa ttaman. ^■   2 Mayemmi twezznem nnuqart i min war iǧin d aɣrum u mayemmi tjehdem i min war ijjiwnen? Sřem-dd ɣari mliḥ, ccem min icnan uca ejj řeɛmar nwem ad iɣebba tadunt. 3 Wcem amezzuɣ uca asem-dd ɣari, sřem, xenni ad iddar řeɛmar nwem, maɣar Necc ad akidwem ggeɣ ijj n Řɛahd i řebda, timegga n tmexsiwt u n řaman icewwaren i Dawud. ^■  

4 Xzar, ggiɣ t d acehhad i ccuɛub, d řḥakem d bab n řumur i ccuɛub. 5 Xzar, ad třaɣid ijj n řgens i war tessined, u řgens i war cek issinen ad ɣarek dd-yas di ṭṭweɛ n SIDI, AREBBI nnek, u di ṭṭweɛ n Umqeddas n Israil, minzi Netta issɛuǧa cek.”

6 “Arzum x SIDI řami Netta ittejja ixef nnes ad ittwaf, řaɣam as řami dd-yudes Netta. 7 Ejj aɛeffan ad ismeḥ deg webrid nnes uca aryaz n řɣecc deg ixarriṣen nnes. Ejj i-t ad dd-idweř ɣar SIDI, xenni Netta ad as izziǧez, u ɣar AREBBI nneɣ, maɣar Netta iɣeffar aṭṭas n twařawin.

8 Maɣar ixariṣṣen inu war ǧin am ixariṣṣen nwem u ibriden inu war ǧin am ibriden nwem, inna SIDI. 9 Maɣar am mammec uɛřan ijenwan x temmurt, ammu i yuɛřan ibriden inu x ibriden nwem u ixarriṣen inu x ixarriṣen nwem.

10 Maɣar am mammec i dd-ihekkwa wenẓar d wedfeř zeg ujenna u war ɣares dd-iddikkwiř ca, maca issuff tammurt d amezwaru uca ittarra i-tt ad tewc řɣiǧet, ad tawi aɣemmuy, uca awarni as ittic zzariɛet i wenni iẓarrɛen d weɣrum i wenni ittetten,

11 ammu i ɣa yiři uřa d awař i dd-itteffɣen zeg uqemmum inu. War dd ɣari iddikkwiř ixwa, maca ad yegg min xseɣ u ad yaweḍ marra min ɣar t ssekkeɣ.

12 Maɣar ad teffɣem s řefraḥet uca ad kenniw ssqebbḍen di řehna. Idurar d tewririn ad dduqqzen s usřiwřew zzat i wudem nwem u marra ticejjura n yeyyar ad wtent camxa s ifassen. ^■  

13 Deg wemcan n usennan ad teɣmi tcejjart n umerzi, deg wemcan n tzeggʷart ad teɣmi tcejjart n tariḥant. Aya ad yiři i SIDI, i ccan n Yisem nnes, i řeɛřamet n řebda i war imeḥḥin ɛemmarṣ.” ^□