1 “Sriwřew, cem tenni war ittirwen ɛemmarṣ! Duqqez s usřiwřew uca sɣuyy s řefraḥet, cem tenni war issinen řewjeɛ n tarut, maɣar iḥenjiren n tenni di semḥen d aṭṭas x iḥenjiren n tenni imeřcen, iqqar SIDI. ^■   2 Egg ttasiɛ i iqiḍan nnem u ejj ad bezzɛen arwaqat n tzeddiɣin nnem aṭṭas, war ten menneɛ. Szuggar timurar nnem uca ziyyar řewtad! 3 Maɣar cem ad tiriwed ɣar yeffus u ɣar uzeřmaḍ uca zzariɛet nnem ad tᵉṭṭef řegnus d tasɣart uca nitni ad sszedɣen tineddam yareddǧen.”

4 “War tteggʷed ca, maɣar war tesseḍḥid u war ttwasbarrqed ca, maɣar war tᵉttwafeḍḥed. Ad tᵉttud řefḍiḥet n temẓi nnem u war ggur ɛad ad tɛeqřed x řeḥcumiyyet n iseggʷusa nnem am tajjač. 5 Maɣar aryaz nnem d wenni cem iggin, ‘SIDI n řɛeskarat’ d Isem nnes, uca Amqeddas n Israil d Amefdi nnem. Ad as řaɣan ‘AREBBI n marra tammurt’. 6 Maɣar SIDI iřaɣa xam am i yict n temɣart i di ismeḥ weryaz nnes, i dayes acḍan deg buḥbeř nnes, u am temɣart n iseggʷusa n temẓi, waxxa tuɣa-tt temmenḍar, iqqar AREBBI nnem. 7 Mɣir tazeḥziḥt semḥeɣ dayem, maca s arreḥmet tameqqrant ad cem ssmuneɣ. 8 Umi ggiɣ aduqqez n weɣḍab inu ad isfi, aqa ssnuffareɣ zzayem aɣembub inu i yict tzeḥziḥt waha, maca s tmexsiwt icuwwaren n řebda ad ayi tezziǧzed, iqqar SIDI, Amefdi nnem.”

9 “Maɣar wa ad yiři i Necc am wussan n Nuḥ umi jjuǧeɣ aqa aman n Nuḥ ɛemmarṣ war ssfiyen tammurt. Ammu i jjuǧeɣ řexxu, aqa ɛemmarṣ war tteggeɣ ad xam idduqqez weɣḍab inu u war cem ttɛiqibeɣ ɛad. ^■  

10 Maɣar idurar ad dewřen ɣar uɣezdis u tiwririn ad nnhezzent, maca tamexsiwt inu icewwaren ɛemmarṣ ad xam tḥeyyed uca Řɛahd n řehna inu war ittenhezzi ɛemmarṣ, iqqar SIDI, wenni umi tezziǧzed.”

11 “A, cem tenni ittwaḥṣaren, tenni iqeṭṭeb uṣemmiḍ, tenni nhřa afewwej! Xzar, Necc ad quwwareɣ iẓra nnem s ict n tma tabarcant uca ad ggeɣ dsas nnem x tyaqutin n ṣaffir.

12 Necc ad ggeɣ řekwaza nnem i tfuct zeg ukristal, uřa d tiwwura nnem n řeɛqaq izeggwaɣen d marra řeḥyuḍ nnem i d am innḍen zeg iẓra iɣřan.

13 Marra iḥenjiren nnem ad iřin d imeḥḍaren n SIDI uca řehna n iḥenjiren nnem ad yiři d ameqqran. ^■  

14 Cem ad tiřid tarekkned s tsegda. Aggʷej x řeḥṣaret, maɣar war din min zi ɣa teggʷeded, uřa x unexřiɛ, minzi war dd ɣarem ittikkwiḍ ca.

15 Xzar, ad ssmunen, maca aya war iǧi zzayi. Wi xam i ɣa issmunen, ad zzayem iwḍa.

16 Xzar, Necc xeřqeɣ-dd amziř wenni ittṣuḍen tirjin n tmessi u issuffuɣ-dd ict n řqecɛet i řxedmet nnes. Ammu i dd-xeřqeɣ ɛawed amteḥḥay maḥend ad yareddeǧ.

17 Kuř řesnaḥ nni ittwaggen ḍidd nnem, war ittiweḍ, uca kuř iřes nni xam i dd ɣa igeɛɛden di ddeɛwet, ad t tḥekmed cem. Ta d tasɣart n imsexxaren n SIDI uca tasegda nsen teffeɣ-dd zzayi, iqqar SIDI.”