1 “Sřem ɣari, a kenniw inni iḍaffaren tasegda, kenniw inni yarezzun SIDI! Xzarem ɣar Teṣḍart manis tᵉttwaneqcem u ɣar wexbuc n wanu manis dd-tᵉttwaɣzem. 2 Xzarem ɣar Ibrahim, babatwem, u ɣar Sara, tenni kenniw i dd-yurwen. Maɣar tuɣa-t ɛad ḥafi umi t řaɣiɣ, maca Necc barkeɣ t u arzfeɣ as aṭṭas n wara. 3 Maɣar SIDI ad issfewwej Ṣihyun, ad issfewwej marra řxirbat nnes uca ad tt yarr am jjennet n Ɛadn u řexřa nnes am weḥwic di jjennet n SIDI. Arcaq d řefraḥet ad dayes ten afen, aqadi d řḥess n uɣennej.”

4 “Sřem-dd ɣari, a cceɛb inu, u wcem ayi amezzuɣ, a řgens inu, maɣar ad zzayi teffeɣ Ccariɛa u Necc ad ḍemneɣ řḥeqq inu ař ɣa yiři řḥeqq inu d tafawt i řegnus. 5 Tasegda inu tudes-dd, asenjem inu itteffeɣ-dd u iɣaǧen inu ad carrɛen řegnus, ad ayi rajant tegzirin uca ad ssitment x uɣiř inu.”

6 “Sgeɛɛdem tiṭṭawin nwem ɣar ujenna, xzarem tammurt da swadday, maɣar ajenna ad iffarfar am ddexxan, tammurt ad tedduysar am warruḍ, uca ammu i ɣa mmten uřa d imezdaɣ nnes, maca asenjem inu ad iqqim i řebda, tasegda inu ɛemmarṣ war tt qeṭṭin.”

7 “Sřem-dd ɣari, a kenniw inni issnen tasegda, a cek řgens nni yarebbun Ccariɛa inu deg wuř. War tteggʷdem zi řḥegra n yewdan u war ten ttejjim ad cem arẓen s uɛeyyeb nsen!” ^■   8 Maɣar tacinda ad ten tecc am tᵉttett arruḍ, uca akiccu ad ten yecc am taḍuft, maca tasegda inu ad teqqim i řebda u asenjem inu zi jjiř ař jjiř.” ^■  

9 “Faq, faq, arḍ s jjhed, a Aɣiř n SIDI! Faq am deg wussan n zic, am di jjiřat n wecḥar uya. Ma war iǧi d Cek, wenni iqessen Rahab, d wenni issnuqqben řhaycet?

10 Ma war iǧi d Cek wenni issiẓɣen řebḥar, aman n řḥemřet n waman imeqqranen yuǧɣen? Ma war iǧi d Cek wenni yarrin aman yuǧɣen n řebḥar d abrid ařami zemmaren ad ẓwan inni ittwafekken? ^■  

11 Inni ifda i-ten SIDI ad dd-dewřen, ad dd-asen ɣar Ṣihyun s usřiwřew. Řefraḥet n řebda ad tiři x izeǧifen nsen, nitni ad sswiẓẓḍen ifassen nsen ɣar warcaq d řefraḥet, am i ɣa yarweř zzaysen wecḍan d wesḥissef.”

12 “D Necc, wah d Necc wenni kenniw issfewwjen. Min teɛnid cek, aqa cek tᵉtteggʷeded zeg weryaz ifennan, zi mmis n bnadem nni iǧan am arrbiɛ, ^■  

13 tᵉttettud SIDI wenni cek iggin, wenni ibezzɛen ajenna d wenni issarsen dsusa n temmurt, aqa cek tᵉtteggʷeded řebda, ass ikmeř, zi ssibbet n wesɛar n wenni iḥeṣṣaren umi issewjad ixef nnes maḥend ad yareddeǧ? Mani iǧa xenni wesɛar n wenni iḥeṣṣaren? ^■  

14 Wenni icarrfen s ssnaseř am ittefriɣ ad ittwafekk daweḥda. War ittmetti di tesɣaft n imeḥbas, war zzayes ineqqes weɣrum.

15 Maɣar Necc d SIDI, AREBBI nnek, wenni issehwařen řebḥar ař ɣa hajan řemwaj nnes, SIDI n řɛeskarat d Isem nnes.

16 Necc ggiɣ ac awařen inu deg uqemmum nnek u ssdurryeɣ cek di tiři n ufus inu, maḥend ad ẓẓuɣ ajenna, ad ssarseɣ dsusa n temmurt u ad iniɣ i Ṣihyun: ‘Cek d řgens inu!’ ”

17 “Faq, faq, kkar-dd a Urcalim! Zeg ufus n SIDI teswid zi řkas n wesɛar nnes ameqqran. Teccid řexmira zi řkas nni issdewwaxen, wah tẓemmed tt. ^■  

18 War tt ittgewwid uřa d ijjen zi marra iḥenjiren nni dd-turuw, u zi marra iḥenjiren nni tessyem, war tt yeṭṭif uřa d ijj zeg ufus.

19 Tnayen n tmesřayin-a řeqfent cem, maca wi xam i ɣa iḥinnen? Xzar, axarreb d weřbez d řaẓ d ssif! Mammec cem i ɣa ssfewwjeɣ? ^■   20 Wḍan iḥenjiren nnem, ɣacan, zzřen ɣar marra tiɣemmar n ibriden am tɣayḍin n wezɣar di tracca. Nitni jjiwnen s wesɛar n SIDI, s usiggʷed n AREBBI nnem.” ^■  

21 “S uyenni seř aya, a kenniw řmusakin, d imescaren, maca war iǧi s binu! 22 Ammu i iqqar Sidi nnem, SIDI, AREBBI nnem, wenni iccaten ddeɛwet x řgens nnes: ‘Xzar, Necc ad kkseɣ řkas issdewwaxen zeg ufus nnem, war tsessed ɛad ktar zi řexmira n řkas n wesɛar inu. 23 Necc ad t ggeɣ deg ufus n yinni dayem iɣezzan, inni innan i řeɛmar nnem: Saḍar ixef nnem ɣar temmurt, neccin ad xam neẓwa! Ammu i teggid aɛrur nnem amecnaw mammec teǧid d tammurt, uca tuɣa cek d abrid di ṭṭweɛ n yinni xam iẓwan.’ ”