1 “Ammu i iqqar SIDI: ‘Mani teǧa tebrat n waǧaf tenni zi ssqebbḍeɣ yemmatwem? Niɣ i man wen zeg aytbab n wareṭṭar inu kenniw zzenzeɣ? Xzar, zi ssibbet n řmuɛṣiyyet nwem temmenzem u zi ssibbet n iɛeddiyen nwem temmenz yemmatwem. 2 Mayemmi dd-usiɣ, war din iǧi uřa d ijj, mayemmi i řaɣiɣ, war dd-yarri uřa d ijj? Ma afus inu d aquḍaḍ ařami war izemmar ad ifekk, ma war dayi iǧi jjhed ḥima ad fekkeɣ? Xzar, s usiggʷed inu ad ssiẓreɣ řebḥar, ad ggeɣ iɣezran d řexřa uca ad aẓɣen ařami i ɣa-y-arṣuḍen iseřman nsen maɣar war din iǧi ɛad waman, uca ad mmten zeg ufadi. ^■   3 Ad ssyarḍeɣ ajenna s tubbarcent, ad ten řeḥḥfeɣ s txencet n wecḍan am warruḍ nsen.’ ”

4 “Sidi inu, SIDI, iwca ayi iřes n umeḥḍar, maḥend Necc ad ssneɣ mammec i ɣa ssmeḥdeɣ wenni yuḥḥřen s ijj n wawař. Qaɛ tuffut Netta issfaqa ayi-dd, issfaqa ayi amezzuɣ, maḥend Necc ad ɣares sřiɣ am umeḥḍar. 5 Sidi inu, SIDI, yarzem ayi amezzuɣ u Necc war ɣewwɣeɣ ca, war dd-ddwiřeɣ ɣar ḍeffar. ^■   6 Necc wciɣ aɛrur inu i yenni d ayi iwtin, u iɣemmizen inu i yenni d ayi issnecfen tmart. Aɣembub inu war t ssnuffareɣ zzat i useḥqar d ususef. 7 Maca Sidi inu, SIDI, ad ayi iwc afus, s uyenni war qeṭṭiɣ di řefḍiḥet, s uyenni jjiɣ aɣembub inu iqseḥ am sseǧaḥ, minzi ssneɣ, aqa Necc war ttseḍḥiɣ ca. 8 Wenni d ayi ittseggden, aqa-t yudes. Man wen i ɣa izeɛmen ad kidi icarreɛ? Jjem aneɣ ad nbedd nmun! Man wen kidi ittemcarraɛen? Ejj i-t ad ɣari dd-yas. ^■   9 Xzar, Sidi inu, SIDI, ad ayi iwc afus. Man wen izemmaren ad ayi igg řɛib? Xzar, nitni marra am warruḍ idduysaren, ad ten tecc tcinda.”

10 “Man wen i din jar awem itteggʷed zi SIDI, man wen jar awem ittesřan i tmijja n Umsexxar nnes? Wenni igguren di taǧest d wenni umi war ɣar teǧi tafawt, ejj i-t ad ittceř x Yisem n SIDI, ejj i-t ad iɛemmed x AREBBI nnes.

11 Xzar, kenniw marra tessarɣem timessi, tbeysem ixef nwem s fřitcat i usecmaḍ. Iwa, uyurem xenni di tfawt n tmessi nwem u ɣar tfawt n fřitcat yareqqen nni tessarɣem. Aya ad xawem dd-yas zeg ufus inu, s řeḥriq ad tezzřem dinni.”