52
1 Faq, faq, arḍ s jjehd a, imezdaɣ n Ṣihyun, arḍ s werruḍ nnem iccuwwaren, a Urcalim, tandint tamqeddast! Zi ssa tsawent war ɣarem t-i-dd-ittidif ɛad wenni war ittwaxetnen d umexmuj. 2 Zerz xam taɛejjact, kkar, qqim cem, a Urcalim! Arxu ssnaseř zeg yiri nnem, a tameḥbust, a tayeǧit Ṣihyun! 3 Maɣar ammu i iqqar SIDI: ‘Temmenzem s baṭeř, ad tᵉttwasfekkem ɛawed břa ttmenyat!’ 4 Maɣar ammu i iqqar Sidi inu, SIDI: ‘Zic ihwa řgens inu ɣar Miṣra maḥend ad dinni iqqim am řbarrani, uca Accur iḥṣar i-t x walu!’ ” ■ 5 “Uca řexxu, min ɣari ɛad xafi ad tt ggeɣ danita, iqqar SIDI, maɣar awyen řgens inu břa ssibbet uca inni xas ittṣellṭen ssɣuyyen, iqqar SIDI, ass marra ttɛeyyben deg Yisem inu. ■ 6 S uya ad issen řgens inu Isem inu, s uya, aqa Necc d wenni iqqaren deg wass nni: Necc aqa ayi da!”
7 “Mecḥař cnan x idurar iṣuraf n umbeccar nni ittbarrḥen s řehna, n umbeccar n řexbar aṣebḥan nni ittbarrḥen s usenjem, wenni iqqaren i Ṣihyun: ‘AREBBI nnem d Ajeǧid!’ ■ 8 Sřem i tmijja n iɛessasen nnem! Nitni ssgeɛɛden tmijja nsen, sřiwřiwen munen, maɣar udem deg udem ak-d SIDI ttwařan mammec i dd-isseɛqeb SIDI Ṣihyun. 9 Sɣuyyent s řefraḥet, sřiwřewent tmunent, a řxirbat n Urcalim, maɣar SIDI issfewwej řgens nnes, issenjem Urcalim.
10 Iɛarra SIDI aɣiř nnes amqeddes zzat i tiṭṭawin n marra řegnus u marra timawwin n temmurt ad ẓarent asenjem n AREBBI nneɣ.” ■
11 “Ruḥem, ruḥem, ffɣem-dd ssenni, war ttḥadam walu n min ixemjen, ffɣem ssenni zi řwest nnes, sizedgem ixef nwem, a kenniw inni yarebbun řeqcuɛ n SIDI! ■
12 Maɣar kenniw war tᵉtteffɣem s tezřa, war tarekkwařem, maɣar SIDI ad yuyur zzat nwem u AREBBI n Israil ad yiři d aɣezdis nwem aneggar.”
Awař wiss arebɛa x Umsexxar n SIDI
13 “Xzar, Amsexxar inu ad yegg s řeɛqeř, ad ittwassɛuǧa u ad ittwassuɛřa, wah ad ittwasɛuǧa ař ṭṭarf.
14 Am zzayek nnxeřɛen aṭṭas — maɣar ammu s waṭṭas ixṣar udem nnes, ktar zeg uřa d ijjen, u addud nnes, ktar zeg uřa d ijj n mmis n bnadem — ■
15 ammu i ɣa issengez Netta aṭṭas n řegnus, wah, ɛad ijeǧiden ad sseɣden, maɣar min war d asen barrḥen, ad t ẓaren, u min ɛemmarṣ war sřin, ad t fehmen.” ■