1 Umi isřa ujeǧid Ḥizqiya aya, icarreg arruḍ nnes, idřa ixef nnes s ict n txancet n wecḍan uca yudef ɣar Taddart n SIDI. 2 Xenni issekk netta Alyaqim, řemqeddem n tzeddiɣt n ujeǧid, d Cabna, amarir, d imɣaren n ikehhanen deg warruḍ n txuncay n wecḍan ɣar unabi Icaya, mmis n Amuṣ. 3 Nitni nnan as: “Ammu i iqqar Ḥizqiya: ‘Ass-a d ijj n wass n řeḥṣaret u n weɛqab u n ubehdeř, maɣar iḥenjiren iwḍen-dd ɣares ař arzam n uɛeddis n yemmatsen, maca war din jjehd i twarut. 4 Ad taɣ SIDI, AREBBI nnek, isřa marra awařen n ukumandar n řɛeskar wenni dd-issekk sidis, ajeǧid n Accur, ḥima ad istehza zi AREBBI iddaren, u ad taɣ SIDI, AREBBI nnek, ad iɛaqeb awařen nni isřa. Sgeɛɛed xenni ict n tẓaǧit di ṭṭweɛ n řbaqi nni i ɣa ittwafen ɛad.’ ”

5 Ammu iwḍen imsexxaren n ujeǧid Ḥizqiya ɣar Icaɛya. 6 Inna asen Icaɛya: “Ammu ittxeṣṣa ad tinim i siditwem: ‘Ammu i iqqar SIDI: War teggʷed ca zeg wawařen i tesřid, i zi i d ayi ceqqfen imsexxaren n ujeǧid n Accur. 7 Xzar, Necc ad dayes ggeɣ ijj n buḥbeř u netta ad iseř ijj n řexbar uca xenni ad iɛqeb ɣar temmurt nnes u Necc ad t nɣeɣ din di temmurt nnes s ssif.’ ”

8 Xenni iɛqeb-dd ukumandar n řɛeskar uca yufa ajeǧid n Accur ittmenɣa ak-d tendint n Libna, maɣar isřa aqa iqřeɛ iqiḍan nnes iffeɣ zi Laxic. 9 Umi isřa aqa nnan x Tirhaqa, ajeǧid n Kuc, “Xzar, iffeɣ-dd ḥima akidek imneɣ!”, umi t isřa, issekk ɛawed ireqqasen ɣar Ḥizqiya, inna:

10 “Ammu i ittxeṣṣa ad tessiwřem ak-d Ḥizqiya, ajeǧid n Yahuda, ad tinim: ‘War ttejji ad cek iɣwa AREBBI nnek wenni x tᵉttcařed am iqqar: Urcalim war tweṭṭi i ujeǧid n Accur deg ifassen!

11 Xzar, tesřid min ggin ijeǧiden n Accur ak-d marra timmura nneɣni, tinni ḥarrmen nitni i uteḥḥi. Ma ittɣiř ac ad tᵉttwasnejmed?

12 Ma ssnejmen ten irebbiten n řegnus nni ittwareddǧen zi řejdud inu? Juzan d Ḥaran d Raṣaf d ayt n Ɛadan inni tuɣa izeddɣen di Talassar?

13 Mani iǧa ujeǧid n Ḥamat d ujeǧid n Arfad d ujeǧid n tendint n Safarwayim uřa d ajeǧid n Hanaɛ d Ɛiwwa?’ ”

14 Ḥizqiya iksi tibratin zeg ufus n ireqqasen uca iɣri tent. Xenni igeɛɛed netta ɣar Taddart n SIDI uca ibezzeɛ i-tent Ḥizqiya zzat i wudem n SIDI,

15 u Ḥizqiya iẓẓuǧ i SIDI, inna:

16 “A SIDI, AREBBI n Israil, wenni ittɣiman sennej i ikiruben! Cek, wah Cek weḥḥdek d AREBBI n marra tigeldiwin n ddunect. Cek teggid ijenwan d temmurt. ^□  

17 Ewc amezzuɣ nnek, a SIDI, arzem tiṭṭawin nnek uca texzared! Seř marra awařen n Sanḥarib wenni dd-issekk netta ḥima ad iɛeyyeb AREBBI iddaren.

18 D tidett, a SIDI, ijeǧiden n Accur qḍan timmura nni, xarrben tammurt nsen

19 u nḍaren irebbiten nsen di tmessi, maɣar tuɣa war ǧin d irebbiten, maca d timegga n ufus n yewdan waha, zeg ukeccuḍ d weẓru uca nitni qḍan ten. 20 Řexxu maca, a SIDI, AREBBI nneɣ, senjem aneɣ zeg ufus nnes, maḥend marra tigeldiwin n ddunect ad ssnen, a SIDI, aqa Cek weḥḥdek d AREBBI.”

21 Xenni issekk Icaɛya, mmis n Amuṣ, ijj n ureqqas ɣar Ḥizqiya, inna: “Ammu i iqqar SIDI, AREBBI n Israil: ‘Necc sřiɣ s minzi teẓẓuǧed-dd ɣari x Sanḥarib, ajeǧid n Accur. 22 Wa d awař i xas inna SIDI: ‘Taɛzarct, tayeǧit Ṣihyun, tesseḥqar i cek, nettat testehza zzayek, tayeǧit Urcalim thezz azeǧif awarni ac. 23 Man wen tɛeyybed u di man wen tceqqfed, man wen ɣar tessgeɛɛded tmijja u x man wen i xef tessgeɛɛded s nnfaxet tiṭṭawin nnek? Cek tᵉttɣennaned x Umqeddas n Israil! 24 S uqemmum n imsexxaren nnek tedɛid Sidi inu, tennid: S ubarru n ikarruten inu geɛɛdeɣ idurar yuɛřan, iɣezdisen n Lubnan. Necc ad zedmeɣ ticejjura nnes n tengelt yuɛřan uřa d ticejjura nnes icnan qaɛ n imerza u necc ad dd-aseɣ ař taqiccat nnes yuɛřan qaɛ, ɣar wezɣar n umarjuɛ nnes n uḍiř. ^□   25 Necc ɣziɣ anuten u swiɣ aman. S třeqqa n iḍaren inu ssiẓɣeɣ marra iɣezran n Miṣra!’ ”

26 “Ma war tesřid aqa aṭṭas zeg wami ggiɣ man aya uca wciɣ as udem deg wussan n mecḥař uya? Řexxu jjiɣ t ad dd-iffeɣ, aqa cek d wenni i ɣa yarren tineddam ifaryen d řxirbat. 27 Imezdaɣ nsen tuɣa arxun, arẓin, sseḍḥan. Nitni tuɣa aten am ufsu deg iyyar, am uɣemmuy aziza, am uřum x tzeɣwin, u am imendi icemḍen s usemmiḍ qbeř i ɣa iffeɣ. 28 Maca Necc ssneɣ aɣimi nnek d uffuɣ nnek d twasit nnek d uɣewweɣ nnek xafi. 29 Minzi cek tɣewwɣed xafi u tuffet nnek tiweḍ-dd ɣar imezzuɣen inu, ad ac dd-ssekkeɣ ict n tsennart deg wenzaren u ad ggeɣ ict n sřimet jar iyencicen nnek u Necc ad cek arreɣ x webrid i di dd-tusid da.”

30 “Ta ad ac tiři d řeɛřamet: deg useggʷas-a ad teccem min ɣa iɣemyen s yixef nnes u deg useggʷas wiss tnayen min zzayes ɣa iɣemyen ɛawed, maca deg useggʷas wiss třata ad tzarɛem u ad temjarem, ad teẓẓum tizayarin deg imarjaɛen uca ad teccem řɣiǧet nnes. 31 Maɣar min inejmen, min iqqimen zi taddart n Yahuda, ad iwwet ɛawed iẓewran ɣar swadday u sennej ad yawi řɣiǧet. 32 Maɣar zi Urcalim ad dd-iffeɣ min iqqimen u zeg wedrar n Ṣihyun ad iffeɣ min innejmen, cḍaret n SIDI n řɛeskarat ad tt igg.”

33 “S uyenni, ammu i iqqar SIDI x ujeǧid n Accur: ‘Netta war dd-ittidef ca ɣar tendint-a u war dayes iccit ca uřa d ict n fřitca u war ɣares dd-iqarreb ca s uřa d ict n tseddart n uɛeskari u war xas ittbeqqiḍ uřa d ijj n lbaraj i řeḥṣaret. 34 X webrid i x dd-yusa, ad dd-iɛqeb. War ittidif ca ɣar tendint-a, inna SIDI. 35 Necc ad sseřqiɣ x tendint-a ḥima ad tt ssnejmeɣ di ṭṭweɛ inu u di ṭṭweɛ n umsexxar inu Dawud.’ ” ^■  

36 Xenni iffeɣ Lmalak n SIDI uca inɣa mya u-xemsa u-tmenyin-ařef n yeryazen di řmargeḥ n řɛeskar n Accur. Umi dd-kkaren nitni tiwecca nnes, xzar, aqa aten marra idsen d řxecbat. ^■  

37 Uca ifsi Sanḥarib, ajeǧid n Accur, iqiḍan nnes, iruḥ, iɛqeb ɣar temmurt nnes. Iqqim izeddeɣ di Ninwa.

38 Umi yuḍar ijj n wass di taddart n arebbi nnes Nisrux, imsar, aqa iḥenjiren nnes Adrammilik d Caraṣar nɣin t s ssif. Nitni arewřen ɣar temmurt n Ararat. Mmis Asarḥaddun idweř d ajeǧid deg wemcan nnes.