1 Deg wussan nni iḥřec Ḥizqiya s ijj n řeḥřac ineqqen. Yusa-dd ɣares unabi Icaɛya, mmis n Amuṣ, inna as: “Ammu i iqqar SIDI: ‘Ewc řumurat i taddart nnek, maɣar ad temmted, war tᵉttɣimid teddared ɛad ktar.’ ” 2 Xenni inneqřeb Ḥizqiya s uɣembub nnes ɣar řḥiḍ uca iẓẓuǧ ɣar SIDI, 3 inna: “A, SIDI, ɛqeř aqa necc uyureɣ zzat i wudem nnek s řaman u s yijj n wuř ikemmřen u ggiɣ min iǧan nican di tiṭṭawin nnek.” Uca ibda Ḥizqiya ittru s jjhed.

4 Yusa-dd wawař n SIDI ɣar Icaɛya, inna:

5 “Uyur, ini i Ḥizqiya: ‘Ammu i iqqar SIDI, AREBBI n babac Dawud: Necc sřiɣ i tẓaǧit nnek u ẓriɣ imeṭṭawen nnek. Xzar, Necc ad arniɣ xemmesṭac n iseggʷusa i wussan n tudart nnek. 6 Necc ad cek ssnejmeɣ zeg ufus n ujeǧid n Accur, uřa d tandint. Necc ad sseřqiɣ x tendint-a. 7 Aya ad yiři d řeɛřamet n SIDI i cek, aqa SIDI ad igg awař-a nni inna. 8 Xzar, ad ssɛeqbeɣ tiři x treffidin n Aḥaz nni dd-ihwan x treffidin n ddruj n tfuct, ɛecra n treffidin.’ ” Xenni teɛqeb-dd tfuct ɛecra n treffidin x treffidin nni zi dd-tehwa.

9 Tira n Ḥizqiya, ajeǧid n Yahuda, řami tuɣa iḥřec uca iggenfa zi řehřac nnes.

10 “Necc nniɣ: ‘Řexxu deg wezyen n wussan n tudart inu ittxeṣṣa ad uyureɣ x tewwura n řaxart. Min iqqimen n iseggʷusa inu ttwakksen zzayi.’

11 Necc nniɣ: ‘War ẓarreɣ ɛad SIDi, SIDi, di temmurt n yinni iddaren, war ttwiřiɣ ɛad iwdan ak-d imezdaɣ n řaxart.’

12 Ticři n tudart inu ad tt xafi arẓen, ad zzayi tt kksen am kksen aqiḍun n umeksaw. Am bu-uzeṭṭa ḍefseɣ tudart inu. Ad ayi iqess zi ddebbuz n txeyyaḍt: ‘Ad teqḍid tudart inu jar wass d ǧiřet!’ ^□  

13 Rajiɣ s ṣṣbar ař ateffu. Netta ad yarẓ ixsan inu am wayrad: ‘Ad teqḍid tudart inu jar uteffu d ǧiřet!’

14 Ttjiwjiweɣ am tfařǧest ittennḍen am tᵉṭṭaw, ttgergureɣ am tedbirt. Ssgeɛɛdeɣ tiṭṭawin inu: ‘A Sidi inu, necc ttwaḥṣareɣ, iři d aḍman i necc!’ ^■  

15 Min i ɣa iniɣ? Min d ayi inna, aqa igga i-t. Marra iseggʷusa n tudart inu ad kkeɣ x tarzugi n řeɛmar inu.

16 ‘A Sidi inu, x man aya izemmar bnadem ad iddar uca sennej i marra aya dayes teǧa tudart n buḥbeř inu, maɣar Cek ad ayi teggenfid uca ad ayi tarrid ad dewřeɣ ɣar tudart!

17 Xzar, min tuɣa ayi d tarzugi yarezgen, idweř i řehna. Cek třesqed ɣar řeɛmar inu aṭṭas ařami d ayi teḥḍid zeg weḥfur n uhellek, maɣar tenḍared marra ddnub inu awarni i weɛrur nnek.

18 Maɣar řaxart war Cek tqada ca, řmewt war Cek issemɣar. Wi i ɣa ihwan deg weḥfur, war ttrijin řaman nnek.

19 Wenni iddaren, a wenni iddaren, aqa netta ad Cek iqada. Babatsen ad isscen řaman nnek i iḥenjiren nnes.’ ”

20 “SIDI yusa-dd ḥima ad ayi issenjem. S uyenni ad nurar s uzenzun inu marra ussan n tudart nneɣ di Taddart n SIDI.”

21 Aqa inna Icaɛya: “Ejj i-ten ad awyen ijj n weɣrum n tazart uca ad t řetfen x tḥebbuct, xenni ad iggenfa.” ^■  

22 Ḥizqiya aqa inna: “Man i ɣa tiři řeɛřamet aqa necc ad ssgeɛɛdeɣ ɛawed ɣar Taddart n SIDI?”