<<    <     Icaɛya     36     >    >> 
Ahuddi n Sanḥarib ḍidd i Urcalim
36
1 Deg useggʷas wiss arbeɛṭac n ujeǧid Ḥizqiya igeɛɛed Sanḥarib, ajeǧid n Accur, x marra tineddam ifaryen n Yahuda uca iḥewwes i-tent. 2 Isekk ujeǧid n Accur akumandar n řɛeskar zi Laxic ɣar Urcalim ɣar ujeǧid Ḥizqiya, ak-d ijj n řɛeskar d ameqqran aṭṭas. Netta ibedd ɣar uqadus n waman n uyeřmam n sennej, wenni iǧan ɣar webrid ameqqran ɣar Weḥwic n Uṣebban.
Tageldit n Accur (Ɛřayen 650 iseggʷusa qbeř i Lmasiḥ)
3 Xenni iffeɣ ɣares Alyaqim, mmis n Ḥilqiya, řemqeddem n tzeddiɣt n ujeǧid ak-d umarir Cibna d Yuwax, mmis n Asaf, amarir n umezruy. 4 Inna asen ukumandar n řɛeskar: “Inim xenni i Ḥizqiya: Ammu i iqqar ujeǧid ameqqran, ajeǧid n Accur: ‘Man atecři wa i x tᵉttacřed? 5 Nniɣ ac, aqa-t d řhard n iyencicen waha. Deg umenɣi ittxeṣṣa ccwar d tzemmar. Man wen x tᵉttacřed řexxu, aqa cek tɣewwɣed xafi? 6 Xzar, tᵉttecřed x Miṣra, x uɣanim nni innḍefsen wenni ittejjun deg ufus nnes umi ḥed xas i ɣa iɛemmed, uca xenni issnuqqeb i-t. Ammu i iǧa Firɛun, ajeǧid n Miṣra, i marra inni xas ittacřen. ■   7 Mařa kenniw ad d ayi tinim: Neccin nettaceř x SIDI, AREBBI nneɣ!, xenni necc ad iniɣ: Ma Netta war iǧi d wenni i zi iḥeyyed Ḥizqiya řegɛudi d iɛalṭaren u xenni inna i Yahuda d Urcalim: Ad taḍarem waha zzat i uɛalṭar-a di Urcalim!?’ 8 Xenni řexxu, egg ijj n umḥarrem ak-d sidi inu, ajeǧid n Accur: ‘Necc ad ac wceɣ ařfayen n iysan mařa cek zeg uɣezdis nnek ad asen-dd tawyed imnayen.’ 9 Mammec texsed cek ad tenqeřbed x wudem n lwali, wenni qaɛ d ameẓyan n imsexxaren n sidi inu, uca ad tᵉttecřed x Miṣra di ssibbet n ikarruten d imnayen?
10 Xenni řexxu, ma necc geɛɛdeɣ-dd ḍidd n wemcan-a ḥima ad t areddǧeɣ břa SIDI? SIDI ini ayi: ‘Gaɛɛed ḍidd i temmurt-a, areddeǧ i-tt.’ ”
11 Uca nnan Alyaqim, mmis n Ḥilqiya d Cibna d Yuwax i ukumandar n řɛeskar: “Siweř ɛafek s Tramit ak-d imsexxaren nnek, minzi nefhem as mliḥ. War kidneɣ ssiwiř s Tyahudect deg imezzuɣen n řgens i iǧan x řḥiḍ.”
12 Maca akumandar n řɛeskar inna: “Ma issekk ayi-dd sidi inu ɣar sidi nnek u ɣarek waha ḥima ad ssiwřeɣ awařen-a, war iǧi ɣar yeryazen nni iqqimen x řḥiḍ, maḥend ad iniɣ aqa aten jmiɛ akidwem ad ccen asuffeɣ nsen u ad swen ibeccicen nsen?”
13 Xenni ikkar ukumandar, iřaɣa s jjhed s Tyahudect uca issiweř, inna: “Sřem i wawařen n ujeǧid ameqqran, ajeǧid n Accur!
14 Ammu i iqqar ujeǧid: ‘Ḥḍam war kenniw ittɣecci Ḥizqiya minzi netta war izemmar ad kenniw ifekk.
15 War ttejjim Ḥizqiya ad kenniw yarr ad tᵉtecřem x SIDI, ad tinim: SIDI ad aneɣ issenjem nican u war tᵉttmewci tendint deg ifassen n ujeǧid n Accur.
16 War ttesřim ca ɣar Ḥizqiya, maɣar ammu i iqqar ujeǧid n Accur: Ggem ayi array uca ffɣem-dd zi tendint ɣari, xenni izemmar kuř ijjen zzaywem ad icc zi tzayart nnes u kuř ijjen zeg wartu n tazart nnes u kuř ijjen ad isu aman zeg wanu nnes,
17 ɣares ař dd ɣa-y-aseɣ u ad kenniw awyeɣ ɣar ict n temmurt amecnaw tammurt nwem: ɣar ict n temmurt teccur s imendi d binu n jdid, ɣar ict n temmurt teccur s weɣrum u s imarjaɛen n uḍiř.
18 War ttejjim Ḥizqiya ad kenniw iɣarr xmi iqqar: SIDI ad aneɣ ifekk. Ma zemmaren xenni irebbiten n řegnus, kuř ijj zzaysen, ad fekken tammurt nsen zeg ufus n ujeǧid n Accur?
19 Mani ǧan irebbiten n Ḥamat d Arfad? Mani ǧan irebbiten n Safarwayim? Ma ssnejmen nitni xenni Samarya zeg ufus inu? 20 Man wen zi marra irebbiten n temmura aya issenjem tammurt nnes zeg ufus inu ařami i ɣa issenjem SIDI Urcalim zeg ufus inu?’ ”
21 Maca nitni sseɣden, war xas dd-arrin s uřa d ijj n wawař, maɣar řumur n ujeǧid tuɣa iqqar: “Kenniw war xas dd-tarrim ca!” 22 Xenni yusa-dd Alyaqim, mmis n Ḥilqiya, řemqeddem n tzeddiɣt n ujeǧid, ak-d Cibna, amarir, d Yuwax, mmis n Asaf, amarir n umezruy, s warruḍ icarrgen ɣar Ḥizqiya. Nitni ḥajan as marra awařen n ukumandar n řɛeskar.