1 “Ad ifarḥ řexřa d temmurt yuẓɣen, ad tesřiwřew řewḍa, ad tnewwar am tlillect. 2 Ad tnewwar ad tcuwwar, wah ad tesřewřiw řewḍa s řefraḥet d usřiwřew. Ad as immewc uɛuǧi n Lubnan, řɛezz n Karmil u n řewḍa n Carun. Nitni ad ẓaren aɛuǧi n SIDI, řɛezz n AREBBI nneɣ.”

3 “Smeḥḍem ifassen arxun u sjehdem ifadden ittemraywan. ^■   4 Inim i yenni ɣar iǧa uř iggʷed: ‘Iřim d iryazen, war tteggʷedem! Xzarem, AREBBI nwem ad ixřef, ad dd-yas s wexřaf n AREBBI, ad dd-yas, ad kenniw issenjem.’ 5 Xenni ad nnurzment tiṭṭawin n iḍarɣařen uca ad ttwarezmen imezzuɣen n iduhcar. ^■   6 Xenni ad ingez uqiḍar am udad uca iřes n uzinun ad isřiwřew, maɣar ad dduqqzen waman di řexřa uřa d tiɣzarin di řewḍa. ^■   7 Tammurt yuẓɣen ad tedweř d ssarij u tammurt iffuden d tařawin ittbeqbuqen. Di temmurt n wuccanen n řexřa, mani arreyḥen, ad yiři arrbiɛ ak-d uɣanim d wezraf.”

8 “Ad din yiři ijj n webrid iseggmen, abrid nni i ɣa řaɣan ‘Abrid amqeddas!’. Uřa d ijj n umexmuj war xas iggur, maca ad yiři i nitni: man wen ma igguren x webrid-a, ɛad ibuhařiyyen war ttweddirin. 9 War dinni ittiři wayrad u war xas ittgiɛɛid niɣ ad ittwaf din uřa d ijj n řweḥc ittcarreg, maca inni ittwaṣeřḥen ad xas uyuren.

10 Inni ittwaṣeřḥen zi SIDI ad ɛeqben, ad dd-asen sřiwřiwen ɣar Ṣihyun. Řefraḥet n řebda ad tarsa x izeǧifen nsen. Afarrej d řefraḥet ad ɣarsen awḍen, acḍan d wesḥissef ad zzaysen arewřen.” ^■