1 “Qarrbem-dd, a řegnus, maḥend ad tesřem, kenniw a, ccuɛub, arrem-dd řbař! Seř, a tammurt d marra min dayes, ddunect d marra min zzayes dd-issfuffuyen. 2 Maɣar aduqqez n weɣḍab n SIDI ad dd-yas x marra řegnus u x marra řɛeskar nsen ad dd-yas wesɛar nsen. Netta iḥarrem i-ten i uteḥḥi, aqa igga i-ten i tɣarṣt. 3 Inni zzaysen ittwanɣen ad ten nḍaren, uca arriḥet n řxecbat nsen ad tgeɛɛed. Ad fesyen idurar s idammen nsen. 4 Marra řɛeskar n ujenna ad ifna uca ijenwan ad ttwannḍen am wedlis ittwannḍen u ad iwḍa marra řɛeskar nsen am wafar x tzayart u am mammec dd-tewḍa tazart zeg wartu.” ^■  

5 “Maɣar ssif inu iban-dd deg ijenwan. Xzar, ad dd-ihwa x Idum u x řgens nni ḥarrmeɣ qaɛ i řḥukm. 6 Ssif n SIDI iccur s idammen, idweř itteḥruǧuḍ s tadunt, s idammen n izmaren d iɣayḍen, s tadunt n tiẓẓař n icarriyyen, maɣar SIDI igga ijj n řɛid n tɣarṣt di Buṣra d ict n tɣarṣt tameqqrant di temmurt n Idum. ^□  ■   7 Ad kidsen wḍan ifunasen n řexřa, uca uřa d iyenduzen jmiɛ ak-d iyenduzen ijehden uca tammurt nsen ad tsu idammen u acař n temmurt ad ittwassjiwen s tadunt. 8 Maɣar ad yiři ijj n wass n nneqmet n SIDI, ijj n useggʷas n uxeǧeṣ i ddeɛwet n Ṣihyun. 9 Tiɣzarin n Idum ad dewřent d tizeft u acař nnes ad idweř d řecbariyyet, wah, tammurt nnes ad tedweř d tizeft yareqqen.

10 War ttxessi tmessi nnes s ǧiřet uřa s wass, ddexxan nnes ad igeɛɛed i řebda. Zi jjiř ař jjiř ad tiři temmurt tᵉttwareddeǧ, i řebda n řebdat ɛemmarṣ war tt iẓwi uřa d ijj. ^■  

11 Bu-uɛuqqi d twuct n ǧiřet ad tt ṭṭfen d tasɣart, bu-uṣuḍi n řmewt d ubaɣeř ad dayes zedɣen. Netta ad xas imḥeḍ afiřu n řeɛbar n urebbej u ad issars plumu n řxawi. ^■  

12 Tarwa nnes n taṣiřet? War din teǧi bu tgeldit ařami zzayes i ɣa barrḥen u marra řḥukkam nnes qḍan.

13 Di řeqṣur nnes ad igeɛɛed cbarq ak-d isennanen, irezzazen d tabɣa n usennan ad ɣemyen di lburjat nnes. Tammurt ad tedweř d tazeddiɣt i wuccanen n řexřa, d řemrah i yessis n nnɛamet.

14 Řewḥuc n řexřa ad mmeřqan ak-d ifisen uca amyan ijennen ad iřaɣa i umɛacar nnes, wah, řweḥc n ǧiřet ad yareyyeḥ dinni, ad taf aɣimi i yixef nnes.

15 Dinni ad tessars tfiɣart n fřitca řɛucc nnes, ad tessars timeǧařin u ad tent tessfruriy uca ad thilla deg imeẓyanen nnes, wah, dinni ad munen ijḍaḍ ittkeccaḍen.”

16 “Arzum deg wedlis n SIDI u ɣarem zzayes: ‘Uřa d ijj zi řewḥuc-a izemmar ad zzayes inqes, uřa d ijj war yarezzu x weɛcir nnes!’, maɣar aqemmum inu yura i-t, uca Arruḥ nnes d wenni ten i ɣa issmunen.

17 Netta simant nnes inḍar taqedduḥt di ṭṭweɛ nsen, uca afus nnes ibḍa asen tammurt s ufiřu n řeɛbar. Nitni ad tt warten i řebda, zi jjiř ař jjiř ad dayes zedɣen.”