1 “Uct xak, a amteḥḥay, wenni simant nnes war ittwateḥḥi, u wenni ittkeccḍen, waxxa nitni war cek keccḍen. Mařa tkemmřed ateḥḥi nnek, ad tᵉttwateḥḥid simant nnek, mařa tkemmřed takeccaḍt, ad tᵉttwakeccḍed simant nnek.”

2 “A SIDI, ḥinn xaneɣ, aqa nessitim ac. Iři d aɣiř nsen ijehden di kuř ṣṣbeḥ, wah, di řweqt n řeḥsaret iři d asenjem nneɣ.”

3 “X řḥess n zzhir ad arewřen řegnus. Mařa Cek tessgeɛɛded ixef nnek ad ttwazeǧɛen řegnus ɣar marra iɣezdisa.

4 Xenni ad tᵉttwakkes zzardet nwem, amecnaw tamurɣi iṣarrḍen ttekksent ṣṣabet. Am mammec ttazzřent tmurɣi ssa d ssa, ammu i ttazzřen uřa d nitni ɣar zzardet.”

5 “Ittwasuɛřa SIDI maɣar Netta izeddeɣ qaɛ sennej. Netta iccur Ṣihyun s řḥeqq d tsegda. 6 Ad yiři řaman deg ikuden nnek i dd ɣa yasen, ijj n ubarru n isenjamen, tiɣit d tussna. Ad tiři tiggʷudi n SIDI d řkenz nnes.”

7 “Xzar, ayt n bu-teɣruḍt nsen sɣuyyun barra, ireqqasen n řehna ttrun s imeṭṭawen imerzagen. 8 Ibriden iseggmen ttwajjen, wenni innumen ad yekk x umesruq, ismeḥ dayes. Aqa yarẓa řɛahd, isseḥqar tineddam, war iḥesseb bnadem. 9 Tecḍen u tisřaw temmurt. Lubnan isseḍḥa, yuẓeɣ. Řewḍa isseɣmayen n Carun tedweř d řexřa uca Bacan d Karmal seǧḍen afar nsen.”

10 “Řexxu ad kkareɣ, řexxu ad ttwasgeɛɛdeɣ, řexxu ad ttwasɛuǧeɣ, iqqar SIDI.”

11 “Kenniw teksim ddeyset s uřum, ad tarwem iɣeǧ. Buḥbeř nwem d timessi i kenniw ɣa yeccen.

12 Řegnus ad dewřen am jjar ssarɣen t, am řḥarrac s isennanen ittwaqessen ad ten sscemḍen s tmessi.

13 Kenniw i iǧan di řaggʷaj, sřem min ggiɣ, uca kenniw di řadas, snem ṣṣulṭa inu!

14 Imednab di Ṣihyun tteggʷeden, imnafqen ttqefqafen, qqaren: ‘Man wen zzayneɣ izemmar ad izdeɣ di tmessi ittetten, man wen zzayneɣ izemmar ad izdeɣ di řḥaduq n řebda?’ ”

15 “Wenni igguren di tsegda u iqqar řḥeqq, wenni inḍaren arbeḥ s ubeɛɛej, wenni imennɛen ifassen nnes zeg wuḍuf n terzifin n arrecwet, wenni ittbellaɛen amezzuɣ nnes maɛlik yufa ad iseř x usizzeř n idammen, wenni itteqqnen tiṭṭawin nnes maɛlik yufa ad itwařa min iǧan d aɛeffan, ^■  

16 d wanita i ɣa izedɣen x řegɛudi. Ad yiři lburj nnes yuɛřa di lqelɛat di řejruf, ad as immewc weɣrum nnes, aman nnes ad ttwaḍemnen.

17 Tiṭṭawin nnek ad twařant Ajeǧid deg weẓri nnes, nitenti ad ẓarent ict n temmurt dayes ttasiɛ aṭṭas.

18 Uř nnek ad iɛqeř x usnexřiɛ. Mani iǧa umarir? Mani iǧa wenni iweznen? Mani iǧa wenni isseṭṭen lburjat?

19 Cek war tẓarred ɛad řgens iqesḥen nni, řgens s yiřes ideqřen ařami war izemmar ad as iseř bnadem, řgens nni issṭewṭiwen s yiřes ařami war izemmar ad as ifhem uřa d ijj.”

20 “Xzar ɣar Ṣihyun, tandint n umuniten nneɣ. Tiṭṭawin nnek ad ẓarent Urcalim, tazeddiɣt nni di iǧa řaman, Aqiḍun i war ssmuṭṭuyen, i zi řewtad nnes ɛemmarṣ ad ttwaqeřɛen uřa d imurar nnes war ggur ad ttwaqeṭṭsen. ^■   21 Maɣar dinni ad ɣarneɣ yiři SIDI s řɛezz. Aya ad yiři d amcan n iɣezran d tseǧyawin imiriwen. War xasen nedhen iɣarruba imeqqranen n řemqadef, uřa d ijj n uɣarrabu s řejwad ad din iɛdu. 22 Minzi SIDI d Řqaḍi nneɣ, SIDI d Amgewwad nneɣ, SIDI d Ajeǧid nneɣ. Netta ad aneɣ issenjem.”

23 “Řexxu maca arxun iseɣwan nnem, war mennɛen ɛad tisenyanin deg uḍar nnes, war ttbezzaɛen ɛad řbacc. Maca xenni ad tᵉttwabḍa zzardet tameqqrant, ɛad ineɛḍab ad keccḍen takeccaḍt. 24 Uřa d ijj n umezduɣ ad yini: ‘Necc heřceɣ!’, maɣar řgens i din izeddɣen, ad as ittwaɣfar řmuɛṣiyyet nsen.”