1 “Xzar, ijj n ujeǧid ad iḥkem di tsegda u řḥukkam ad ḥekmen s řḥeqq. ^■   2 Aryaz nni ad yiři am ijj n udurri zeg wenẓar, am tseddart issřeqqan zi tḥaryaḍt, am řfusi n waman di temmurt yuẓɣen, am tiři n ijj n jjarf ideqřen di temmurt ittfadan.

3 Tiṭṭawin n yinni ittwařan war ttbelliɛent ɛad, u imezzuɣen n yinni ittesřan ad ssḥessen ɛawed, ^■   4 uř n imqeǧqen ad yiři iḥeṭṭa ɛawed maḥend ad yaf tussna, u iřes n yinni isstewtiwen izemmar ad issiweř ɛawed s řfarz.

5 Abuhaři war d as ttřiɣin ɛad ‘Amcenneɛ!’, uca wenni icemmten war d as qqaren ɛad ‘Mmis n řxir!’. 6 Maɣar abuhaři issawař tubbuheřya u uř nnes ittegg řmuɛṣiyyet umi netta ittegg afecceḥ u ittceqqef di SIDI, u umi ittejji řeɛmar n wenni iǧuẓen ad iqqim ixwa, d wenni iffuden war t ittejji ad isu. 7 Taḥraymect n ucemmat tɛeffen. Netta ittxarreṣ di řefḍiḥet ḥima ad iɣḍeř inni ittwaḥṣaren s wawařen ixarriqen, waxxa amezřuḍ iccat x řḥeqq nnes. 8 Maca amcenneɛ ad ixarreṣ deg inwayen icenɛen u ad ikkar di ṭṭweɛ n min icenɛen.”

9 “Kkarent, kennint timɣarin war di iǧi wemnus, sřent i tmijja inu, a kennint tiḥenjirin ittcařen x simant nkent, sřent ɣar wawař inu!

10 Awarni i wussan niɣ aseggʷas, xenni ad tarjijent, a kennint i ittcařen x yixef nkent, maɣar ad teqḍa ṣṣabet n uḍiř, war ittiři weřqaḍ ɛad.

11 Qefqfent, a kennint nbřa amnus, arjijent, kennint tinni ittcařent x yixef nkent, kksent arruḍ, ɛarynent, xenni beysent tijɛinnatin nkent s warruḍ n wecḍan.”

12 “Ad wtent deg idmaren s igejduren x iḥwicen iɛizzen, x tzayarin isseɣmayen.

13 Ad geɛɛden isennanen d tzeggʷart x temmurt n řgens inu, wah x marra tudrin n řefraḥet di tendint ineggzen s usřewřiw.

14 Maɣar řeqṣar ad ittwajj, ddriz n tendint ad ibkem, tawrirt n ‘Ɛufil’ d lburj n tɛessast ad dewřen d ifran i řebda, d amcan n řefraḥet mani ttemzuɛbuḍen iɣyař n řexřa, d ddmani i tḥimriwin.

15 ař i ɣa ittwafarreɣ xaneɣ Arruh zi sennej.”

“Xenni ad idweř řexřa d řɛirst iṣebḥen u řɛirst iṣebḥen ad tᵉttwaḥseb d azɣar. ^□  ■  

16 Řḥeqq ad izdeɣ di řexřa uca tasegda ad teqqim deg iyyar isseɣmayen.

17 Min dd-ittawyen tasegda ad yiři d řehna uca řɣiǧet n tsegda ad tiři d řhudnet d řaman i řebda.

18 Řgens inu ad izdeɣ deg wemcan n řehna, di tzeddiɣin daysent řaman u deg imucan daysen arraḥet.” ^■  

19 “Ad teccat tbrurri ař dd ɣa tessehwa azɣar uca tandint ad tehwa di řewḍa.” ^□  

20 “Sseɛd n kenniw inni izarrɛen tiwa n marra tiɣezratin, inni din ineddhen iḍaren n ufunas d weɣyuř!”