1 “Uct x yenni dd-ihwan ɣar Miṣra ḥima ad afen twiza, inni ittecřen x yeysan u tteggen řaman deg ikarruten, minzi nitni deg waṭṭas, uřa x yenni inyin x yeysan, minzi nitni jjehden, axmi war xezzaren ɣar Umqeddas n Israil u war arezzun SIDI.” ^■  

2 “Maca uřa d Netta d amiɣis, Netta ggur ad yejj řɣar ad dd-yas. War ittdikkwiř deg wawař nnes, ad ikkar ḍidd i taddart n iɛeffanen u ḍidd i twiza n yinni itteggen řmuɛṣiyyet. 3 Maɣar Imiṣriyyen d iwdan, war ǧin d Arebbi, uca iysan nsen d aysum, war iǧi d arruḥ. Ad isarreḥ SIDI afus nnes ař i ɣa inqarḍ wenni iwcin afus u ammu uřa d wenni dayes iwcin afus ad iwḍa. Ammu i ɣa qḍan nitni marra idsen.”

4 “Maɣar ammu i d ayi inna SIDI: ‘Am mammec ittarrujdud wayrad niɣ wayrad ameẓyan x zzardet nnes xmi xas dd-ttřaɣan ijj n ubarru n imeksawen, břa ma ad innexřeɛ zi tmijja nsen u war ixennes zeg ubarru nsen, ammu i ɣa ihwa uřa d SIDI n řɛeskarat ḥima ad imneɣ x wedrar n Ṣihyun u x tewrirt nnes. ^□   5 Amecnaw ijḍaḍ ittfarfiren sennej i řɛucc nsen, ammu i ɣa isseřqa SIDI n řɛeskarat x Urcalim. Ad tt issar, ad tt issenjem, ad xas yekk uca ad tt issenjem. ^■  

6 Dewřem-dd ɣar wenni x ḥeyyden ayt n Israil s waṭṭas. 7 Deg wass nni ad immenḍar kuř ijj l’aṣnam nnes n nnuqart d l’aṣnam nnes n wureɣ, inni yeggin ifassen nwem i yixef nwem, i ddenb. ^■   8 Accur ad iwḍa s ssif, war iǧi ssif n ijj n weryaz, uca ad t yecc ssif, war iǧi n ijj n bnadem. Ad yarweř Accur zzat i ssif uca iḥudriyyen nnes ad dewřen ɣar tesmuɣi. 9 Taṣḍart nnes ad teggʷej s tiggʷudi, uca řḥukkam nnes ad arewřen zi tɛeǧant!’, ammu i iqqar SIDI, wenni ɣar i teǧa tmessi di Ṣihyun uřa d tafqunt di Urcalim.” ^■