Izři n temmurt n Yahuda
26
1 Deg wass nni ad ɣennjen izři aya di temmurt n Yahuda: Neccin ɣarneɣ ict n tendint ijehden,
Netta issbedd ‘Asenjem’ d řeḥyuḍ d řeqwarat. ■
2 Arzmem tiwwura,
maḥend řgens amsegged ad dd-yadef,
wenni iḥeṭṭan řaman i SIDI řebda.
3 S řbař imten am t iǧa,
Cek tḥeṭṭid t di řehna,
wah di řehna, maɣar řgens ittcařa xak.”
4 “Tecřem x SIDI i řebda,
maɣar di SIDi, SIDI, i teǧa Teṣḍart n řebda.
5 Maɣar Netta ittarra inni izeddɣen dinni di řuɛřa ad aḍaren,
tandint yuɛřan ad tt issehwa,
ad tt issehwa ař tammurt,
ad tt iɛarn deg ucař.
6 Ad xas iɛfes uḍar,
iḍaren n wenni ittwaḥṣaren,
řatarat n iḍaren n imezřaḍ.”
7 “Abrid n umsegged iwaṭa,
nican i iǧa řatar n umsegged,
Cek tᵉttseggamed t.
8 Uřa deg webrid n řeḥkamat nnek, a SIDI,
tuɣa nessitim ac,
řeɛmar nneɣ immeẓri deg Yisem nnek u di řidaret nnek.
9 Tuɣa řeɛmar inu ittweḥḥac i Cek di ǧiřet,
uřa d buḥbeř inu dayi, tuɣa yarezzu xak s jjehd.
Maɣar mařa řeḥkamat nnek usint-i-dd x temmurt,
ad řemden imezdaɣ n temmurt tasegda.”
10 “Mařa isscen bnadem aḥinni i uɛeffan,
wanita war iřemmed tasegda,
maca ad yegg řɣar di temmurt iccuren s tsegda,
u war iẓarr aɛuǧi n SIDI.”
11 “A SIDI, afus nnek ittwasgeɛɛad,
maca nitni war t ttwiřin.
Waxxa amenni ad t ẓaren ɛad,
maca ad sseḍḥan zeg wasam nnek i řgens nnek,
wah, timessi ad tecc iɣrimen nnek.
12 A SIDI, řḥukm nnek xaneɣ ad yiři d řehna,
maɣar Cek tkemmřed marra timegga nneɣ di ṭṭweɛ nneɣ.
13 A SIDI, AREBBI nneɣ, isiditen nneɣni seǧḍen xaneɣ.
Zzayek Cek weḥḥdek aqa nettidar Isem nnek.
14 Imettan war tteddaren ɛawed, řexyařat war ttᵉttnekkaren.
I uya txeřfed asen s řɣar uca teqḍid ten.
Cek tekksed marra řɛeqran xasen.
15 A SIDI, Cek tarnid di řgens-a,
Cek tarnid di řgens-a,
tᵉttwasɛuǧed dayes,
aqa tesswesɛed marra iymiren n temmurt.”
16 “A SIDI, di řeḥṣaret arzun xak,
zeǧɛen tiẓaǧitin nsen s tḥessect
umi xasen dd-yusa uweddeb nnek.
17 Am mammec tᵉttnezbar ict n temɣart s ddeyset,
tenni igguren ad taru aḥenjir nnes
u tesɣuyyu s řewjeɛ n tarut nnes,
ammu i d aneɣ tuɣa neccin, a SIDI, zzat i tiṭṭawin nnek. ■
18 Tuɣa neccin axmi neksi s ddeyset, imneɛ aneɣ řeḥriq n tarwa,
tuɣa neccin axmi nuru asemmiḍ.
War dd-niwi asenjem i temmurt,
u imezdaɣ n ddunect war dd-ttwaxeřqen.”
19 “Imettan nnek ad ddaren!
Řxecbat inu ad beddent!
Faqem, uca sřiweřwem kenniw, inni izeddɣen deg ucař!
Aqa nnda n tfawin am nnda nnek,
uca tammurt ad taru řexyařat n imettan.”
20 “Uyur, a řgens inu, adef ɣar ixxamen nnek n daxeř,
belleɛ tiwwura awarni ac.
Snuffar ixef nnek řqedd n ict n tzeḥziḥt
maḥend ad ixřef i imezdaɣ n temmurt řmuɛṣiyyet nsen,
uca tammurt ad tɛarra idammen i xas ittwassizřen,
war txemmiř ɛad inni xas ittwanɣen.”