Izři n uqadi x usenjem
25
1 “A SIDI, Cek d AREBBI inu, necc ad Cek ssɛuǧeɣ, ad ṣebbḥeɣ Isem nnek,
maɣar Cek teggid řeɛjeb,
aṭṭas n ccwar nnek zeg wecḥař uya aqa-t d tidett u dayes řaman.
2 Cek tarrid tandint d aɛurric n yeẓra,
tandint ittwasjehden d řxirbet,
řeqṣar n ibarraniyyen d tandint
nni war ssbeddin ɛemmarṣ ɛawed. ■
3 S uyenni ad Cek issɛuǧa ijj n řgens ijhed,
tandint n řegnus iqesḥen aṭṭas ad zzayek teggʷed.
4 Maɣar tuɣa Cek d lqelɛa i umarxu,
d lqelɛa i umezřuḍ
xmi ittneḥṣar,
Cek d adurri i wenẓar iccaten,
uřa d tiři di řeḥmu
minzi lḥaraj n ayt n bu-řexcunect aqa-t am wenẓar iccaten x řḥiḍ.
5 Am řeḥmu deg ijj n wemcan yuẓeɣ,
ammu i ɣa tesseɣded lḥaraj n ibarraniyyen,
am tiři n useynu tessesmiḍ řehmu,
ammu i ɣa ittwasseɣd izři n ayt n bu-řexcunect.”
6 “SIDI n řɛeskarat ad issewjed x wedrar-a
ict n zzardet s macca teccur s tdunt x wedrar-a
i marra regnus,
ict n zzardet s binu iṣebḥen qaɛ,
s macca teccur s tdunt d waduf,
s binu iṣebḥen iṣfan.
7 Netta ad ibeṭṭeř x wedrar-a ařeḥḥaf
i zi ttřeḥḥafen marra řegnus
uřa d dduri i zi ttwasdurrayen marra řegnus.
8 Netta ad iṣarḍ řmewt i řebda
uca Sidi inu, SIDI, ad imseḥ imeṭṭawen zi marra iɣembab
uca ad ikkes řefḍiḥet n řgens nnes zi marra tammurt,
maɣar ammu i inna SIDI.” ■
9 “Deg wass nni ad inin:
‘Aqa da, Wa d AREBBI nneɣ,
xas i negga asitem nneɣ
u Netta ad aneɣ issenjem.
Wa d SIDI nni x negga asitem nneɣ,
ad nesřiwřew, ad nfarḥ x usenjem nnes!’
10 Maɣar afus n SIDI ad yars x wedrar-a,
maca Mu’ab ad ittwaddez di temmurt nnes,
am mammec ittwaddez uřum, ad idweř d tazubact.
11 Mu’ab ad dayes ibezzeɛ s ifassen nnes,
am ufettaḥ deg weftaḥ.
AREBBI ad issaḍar nnfaxet nnes
jmiɛ ak-d marra min izemmar ad igg s ifassen nnes. ■
12 Netta ad ihdem lburj ak-d řeḥyuḍ nnek yuɛřan,
ad ten issehwa, ad ten immenḍar ɣar temmurt, deg ucař.”