1 “Xzar, SIDI ad issexwa tammurt, ad tt issxarreb, ad iqeǧeb udem nnes uca ad ibezzeɛ imezdaɣ nnes. 2 Am mammec iǧa řgens, ammu i ɣa yiři uřa d akehhan, am umsexxar uřa d sidi nnes, am tayya uřa d llalas, am umsewweq uřa d amzenzi, am areṭṭař uřa d wenni zzayes iksin arḍař, am bab n umarwas uřa d bu-umarwas nnes. 3 Ad ssexwan tammurt marra, ad tt keccḍen qaɛ, maɣar SIDI inna awař-a!”

4 “Tammurt tecḍen, tisřaw, ddunect teftuttes, tisřaw. Imcennɛen n řgens n temmurt teftuttusen. 5 Tammurt tᵉttwasɛiǧet zeg imezdaɣ nnes, maɣar nitni ttɛeddan x izerfan, ttbeddařen tiweṣṣa, ttareẓẓan Řɛahd n řebda. 6 S uyenni tᵉttett nneɛřet tammurt u yenni xas izeddɣen aqa daysen řɛib. S uyenni ad ttwasscemḍen imezdaɣ n temmurt, ad ceṭṭen drus n iwdan waha.” ^■  

7 “Binu n jdid icḍen, tazayart teftuttes, marra inni tuɣa ifarḥen deg wuř, zehharen. 8 Ṣafi ticti issfarraḥen n ibendiren, ddriz n yinni ineggzen s řefraḥet, ṣafi tinext issfarraḥen n řgambri. ^■   9 War sessen binu ɛad di řweqt n uɣennej, ccrab ad yiři d amerzag i yenni t isessen. ^■  

10 Tandint ittwareddǧen d řxarbet, marra tudrin bellɛent i wadaf.

11 Deg imesraq ttweɛɛḍen iwdan x binu, marra řefraḥet tweddar, asřiwřew iffeɣ zi tammurt.

12 Min iqqimen n tendint d řxirbet waha uřa d tawwart tᵉttwařbez.

13 Ammu i ɣa tiři din di řwest n temmurt, jar řegnus. Ad tiři am ɣar wezwaḍ n uzemmur, am ɣar weřqaḍ n uḍiř xmi i ɣa teɛdu ṣṣabet.” ^■  

14 “Nitni ad ssgeɛɛden tmijja nsen, ad sřiwřewen. Umi SIDI iɛuǧen aṭṭas, ad t ssɛuǧan zi mani tɣeǧi tfuct.

15 Sɛuǧem xenni SIDI di temmura n tfawt, di tegzirin n řebḥar sɛuǧem Isem n SIDI, AREBBI n Israil!” ^□  

16 “Zi tmuwwa qaɛ n temmurt nettesřa i izřan, i uɛuǧi n Umsegged!”

Xenni nniɣ: Necc fenniɣ, fenniɣ necc, uct xafi! Imkeccaḍen ttkeccaḍen, u imkeccaḍen ttkeccaḍen min ma xsen ad keccḍen.

17 Tiggʷudi d tesraft d řfex ad xak iřin, aya amezduɣ n temmurt! ^■  

18 Wenni dd-yarewřen zi ddriz issaggʷaden, ad iwḍa di tesraft, d wenni dd ɣa igeɛɛden zi tesraft, ad innaɣ di texceft, maɣar tiburjatin di řuɛřa ad nnurzment, dsusa n temmurt ad nhezzen. ^■  

19 Tammurt ad tcarreg qaɛ, ad tfeǧeq temmurt d ifeǧaqen, ad tenhezz temmurt aṭṭas. 20 Ad tmeyyeř temmurt ssa ɣar da am ijjen isscar, ad temraywa am ict n tnewwact i tmensiwt. Iɛeddiyen nnes ad xas ziyyaren aṭṭas, uca nettat ad tewḍa, war tzemmar ad tekkar ɛad.” ^■  

21 “Deg wass nni ad ixřef SIDI zi řɛeskar yuɛřan di řuɛřa, uřa d ijeǧiden nni iǧan x wudem n temmurt ad zzaysen ixřef x wudem n temmurt. 22 Ad ttwasmunen am imeḥbas deg ict n tesraft u ad ttwaḥebsen di řeḥbes u awarni i waṭṭas n wussan ad ɣarsen arzfen. 23 Taziri ad tezweɣ s useḍḥi u tafuct tesseḍḥa xmi i ɣa yiři SIDI n řɛeskarat d ajeǧid x wedrar n Ṣihyun u di Urcalim, uca zzat i imɣaren nnes ad dinni yiři uɛuǧi.” ^■