1 Řḥukm issaggʷaden x Ṣur.

“ ‘Rum, a iɣarruba n Tarcic, maɣar tehdem tendint n Ṣur umi war teqqim taddart uřa d řmuyyi.’ Wah, ammu i d asen ittwassargeb zi temmurt n ayt n Kittim. ^■   2 ‘Susmem, a kenniw imezdaɣ n tegzirt! Isebbaben n Ṣidun inni iẓekkwan řebḥar s iɣarruba nsen, aqa ccuren cem s sseřɛet!’ 3 Zzariɛet n Sixur, ṣṣabet n yeɣzar n Nil, tedweř d řmunet nnes. Ammu i tedweř tendint n Ṣur d řmarsi n řegnus.”

4 “ ‘Seḍḥa, a cem Ṣidun!’ Maɣar řebḥar iqqar, lburj n řebḥar iqqar: ‘War dayi řewjeɛ n tarut u necc war uriweɣ. Necc war ssɣimiɣ iḥudriyyen u war arebbiɣ tiɛzuray.’ 5 Xmi ɣa yaweḍ řexbar ɣar Miṣra, xenni ad nezbaren nitni s řeḥriq xmi i ɣa sřen i řexbar x Ṣur.”

6 “ ‘Ẓwam ɣar Tarcic, sɣuyyem, kenniw imezdaɣ n tegzirt!’ 7 Ma wa d actab nwem, a tandint ineggzen s řefraḥet, tenni zi ř’aṣeř nnes iǧan zeg wussan n wecḥař uya? Iṣuraf nnes ad tt arbun ɣar řaggʷaj ḥima ad din teqqim am tbarranect. 8 Wi ixarrṣen man aya di řbař nnes ḍidd i Ṣur, tandint nni ibeṭṭan ttajat, aqa zeɛma isebbaben nnes d řḥukkam, ittijariyyen nnes d imcennɛen n temmurt? 9 SIDI n řɛeskarat aqa ɣares di řbař nnes ḥima ad issɛiǧet nnfaxet n marra min iǧan d talwizt, ḥima ad yarẓ řɛezz n marra imcennɛen n temmurt.”

10 “ ‘Sesfiy tammurt nnem am yeɣzar n Nil, a cem yeǧis n Tarcic! War cem tmenneɛ uřa d ict n řḥajjet ɛad!’

11 Netta isswiẓẓeḍ afus nnes x řebḥar, netta issenhezz tigeldiwin. SIDI yumur ḍidd i Kenɛan maḥend ad areddǧen lburjat nnes.

12 Netta inna: ‘Ɛemmarṣ ɛad ad tiřid tfarḥed, tᵉttwasɛiǧted, a taɛzarect, yeǧis n Ṣidun! Ruḥ ɣar Kittim, kkar, ẓwa. Uřa dinni war tᵉṭṭifed řehna.’ ^□  

13 Xzar, tammurt n Ikaldaniyyen, řgens-a i tuɣa war iǧin: aqa řgens nni ineyyec Accur d tammurt i řewḥuc n řexřa. Nitni ssgeɛɛden lburjat nsen i wehjam, ssɛarran řeqṣur nnes, aqa řgens-a yarra i-tt d řxirbet. ^□  

14 Rum, kenniw iɣarruba n Tarcic, maɣar lburj nwem ittwahdem.”

15 “Deg wass nni ad imsar, aqa Ṣur ad tᵉttwattu řqedd n sebɛin n iseggʷusa, am řqedd n wussan n ijj n ujeǧid. Ɣar uneggar n sebɛin n iseggʷusa nni ad imsar i Ṣur am mammec i d as qqaren deg izři n temɣart n farq-ccɣeř:

16 ‘Ksi řgambri, uyur uca nneḍ di tendint, a cem, tamɣart n farq-ccɣeř ittwattun! Irar ijj n ǧɣa mliḥ uca ɣennej aṭṭas, maḥend ad xam ɛeqřen!’

17 Awarni i sebɛin n iseggʷusa SIDI ad yarzef Ṣur uca nettat ad dd-tedweř ɣar řmunet nnes n farq-ccɣeř uca ad tessefsed ixef nnes s marra tigeldawin n ddunect nni iǧan x wudem n temmurt.

18 Maca tasebbabt nnes d řmunet nnes n farq-ccɣeř ad iřint qeddsent i SIDI. War tᵉttwaxemmeř deg ixxamen n txubay u war tᵉttwaxezzen, maɣar sseřɛet nnes ad tiři i yenni izeddɣen zzat i wudem n SIDI, ḥima ad ccen ař i ɣa jjiwnen uca ḥima ad yarḍen arruḍ icuwwaren.”