1 Řḥukm issaggʷaden x Teɣzurt n Tmeẓriwt.

“Min cem yuɣin ařami tgeɛɛded cem ak-d marra iwdan x tzeɣwin? 2 A cem, tenni iccuren s ddriz, a cem tandint izruddḥen, tandint ineggzen s řefraḥet: inni dayem ittwanɣen, war ttwanɣen s ssif uřa war mmten deg umenɣi. 3 Marra imgewwaden nnem munen arewřen, maca ttwaḥebbsen nhřa uřa d ict n tecti n řqews, marra inni dayem ufin, ttwacarfen, waxxa arewřen ɣar řaggʷaj.

4 S uyenni qqareɣ: ‘Saggʷejem xafi řxezrat, ejj ayi ad ruɣ s imeṭṭawen imerzagen. War d ayi ḥeṣṣarem ḥima ad ayi tɛezzam x wareddeǧ n yeǧis n řgens inu!’ ^■   5 Maɣar d ijj n wass n wezruddeḥ d uɛfas d uxarweḍ i dd-issekk Sidi inu, SIDI n řɛeskarat, di Teɣzurt n Tmeẓriwt, ass n weɣdař n řḥiḍ u n iɣuyyan i x dd-ttarran idurar. 6 Maɣar Ɛilam iṭṭef aqrab nnes s fřitcat, jmiɛ ak-d ukarru n umenɣi u ak-d aryaz nni t ineddhen d yenni inyin x yeysan, u Qir iɛarra taseddart n uɛeskari. ^□  

7 Ad imsar aqa řemxeyyer n teysarin nnek ad ttwaccuren s ikarruten n umenɣi u imnayen ad sedden ixef nsen i umenɣi arendad n tewwart n tendint. ^□   8 Ad issɛarra arruḍ n Yahuda. Deg wass nni ad texzared ɣar řesnaḥ i iǧan di Taddart n Wezɣar. ^□   9 Ad tẓarem tizzeyyin di tendint n Dawud, minzi aqa atent deg waṭṭas. Ad tessmunem aman n Uyeřmam n Wadday.

10 Ad tḥesbem tudrin n Urcalim uca ad thedmem tudrin ḥima ad tessjehdem řḥiḍ.

11 Ad teggem ijj n uyeřmam jar řeḥyuḍ, ḥima ad tessmunem aman n Uyeřman Aqdim, maca war txezzarem ɣar wenni t iggin, u war tḥeṭṭim wenni t iṣennɛen zeg wecḥař uya.”

12 “Deg wass nni ad iřaɣa Sidi inu, SIDI n řɛeskarat, maḥend ad trum, ad tesɣuyyem, ad tḥeffem azeǧif u maḥend ad tyarḍem taxencet n wecḍan.

13 Maca xzar, arcaq d řefraḥet, neqqen ifunasen, ɣarṣen i wuǧi, ttᵉtten aysum u sessen binu, am qqaren: ‘Ejj aneɣ ad necc, ad nsu, maɣar tiwecca ad nemmet!’ ^■  

14 Maca SIDI n řɛeskarat issargeb ayi x uya deg imezzuɣen inu, inna: ‘Řmuɛṣiyyet-a war tᵉttwafdi ca i kenniw ɣares ař ɣa temmtem!’, ammu i iqqar Sidi inu, SIDI n řɛeskarat.”

15 “Ammu i iqqar Sidi inu, SIDI n řɛeskarat: ‘Uyur, adef ɣar wewkiř nni, ɣar Cibna, řemqeddem n tzeddiɣt n ujeǧid, uca ini:

16 Min ɣarek iǧan danita, niɣ man wen ɣarek iǧan danita, aqa cek tneqced da ijj n wenḍeř i yixef nnek? Iwa ineqqec anḍeř nnes sennej, ineqqec i yixef nnes tazeddiɣt di jjarf!

17 Xzar, SIDI ad zzayek iḥejjar s ijj n uḥejjar imɣar, Netta ggur ad cek iṭṭef s ijj n wuḍuf iqseḥ.

18 Netta ad cek isseḥnunneḍ qaɛ ařami tdewřed d taqurart, ict n tcamma nni tt i ɣa nḍaren ɣar ict n temmurt temɣar. Dinni i ɣa temmted u dinni i ɣa iřin xenni ikarruten nnek icuwwaren, a cek řefḍiḥet n taddart n bab nnek!

19 Necc ad cek dd-ssuffɣeɣ zi řfusina nnek, uca ammu i cek dd ɣa iqřeɛ zeg wemcan nnek.’ ”

20 “Deg wass nni ad řaɣiɣ i umsexxar inu Alyaqim, mmis n Ḥilqiya. ^■   21 Necc ad as ssyarḍeɣ arruḍ nnek u Necc ad as beyseɣ abyas nnek u ad wceɣ tizemmar nnek deg ufus nnes. Netta ad yiři d babatsen i imezdaɣ n Urcalim d taddart n Yahuda. 22 Necc ad as ssarseɣ řmeftaḥ n taddart n Dawud x teɣruḍt nnes. Mařa netta ad yarzem, war izemmar uřa d ijj ad ibelleɛ, mařa netta ibelleɛ, war izemmar uřa d ijj ad yarzem. 23 Necc ad t wteɣ am řewted deg ijj n wemcan imten u netta ad yiři d řɛarc n uɛuǧi i taddart n babas. 24 Ad xas ayřen marra aɛuǧi n taddart n babas, iɣedduyen imeẓyanin d tɣeddutin, zi marra tiqcuɛin timeẓyanin, zi ṭṭbaṣi ař marra tiqnucin. 25 Deg wass nni ad ittwakkes řewted i ittwawten deg wemcan imetnen, iqqar SIDI n řɛeskarat. Ad dd-ittwaqḍeɛ u xenni ad iwḍa uca ddqeř i tuɣa ɣares yuyřen, ad ittwaqess, maɣar ammu i inna SIDI.”