Awař n Arebbi x řexřa n řebḥar
21
1 Řḥukm issaggʷaden x řexřa n řebḥar. “Am mammec ttazzřent tḥaryaḍin di Temmurt n Ljanub, ammu i ɣa iffeɣ netta zi řexřa, zi temmurt issaggʷaden. □ 2 Tusa-dd ɣari ict n tmeẓriwt teqseḥ: ‘Aɣeddar ittegg s řeɣdaret u amteḥḥay ad iteḥḥa. Gaɛɛed-dd, a Ɛilam, ḥṣar, a Maday!’ Necc ad ssbeddeɣ marra anexses nnes. 3 S uyenni tteksent dayi tejɛinnatin inu, u ttᵉṭṭfen ayi řewjeɛ n tarut am řewjeɛ n ict n temɣart ittarwen. Necc ttnezbareɣ xmi d as ttesřiɣ, nnxeřɛeɣ umi t ttwařiɣ. 4 Uř inu innejřef, aqarqeb nnes issenhezza dayi tiggʷudi. Tbambast n tmeddit nni wehhceɣ aṭṭas, igga ayi tt d řɛurret.” ■
5 “Srusa-dd ṭṭabřa, sbedd aɛessas, ecc, su!”
“Kkarem, a ijeǧiden, dehnem taseddart n useřqi!” 6 Maɣar ammu i d ayi inna Sidi: “Uyur, egg ijj n uɛessas, ejj i-t ad ixebbar min ittwařa!” 7 Aqa iẓra ikarruten n umenɣi d tyuyat n yinni ineddhen iysan, ijj n ukaravan n yeɣyař d ijj n ukaravan n iřeɣman. Tuɣa iḥeṭṭa mliḥ, mliḥ aṭṭas. 8 Xenni iřaɣa wenni iẓrin: “A Sidi inu, deg wass ttbeddiɣ břa qeṭṭu x wecbar n tɛessast u kuř ǧiřet ttɛesseɣ. ■ 9 Xzar, diha usin-dd iryazen nni innyin x yeysan, tyuya n imnayen ak-d tyuya nneɣni!” Ɛawed iṭṭef netta deg wawař, inna: “Tewḍa tendint n Babil, tewḍa, d marra řexyařat ineqcen n irebbiten nnes iřbez i-ten x temmurt!” ■
10 A asarwat inu, a mmis n unedrar inu! Min sřiɣ zi SIDI n řɛeskarat, AREBBI n Israil, xebbareɣ kenniw xas.
Awař n Arebbi x Idum
11 Řḥukm issaggʷaden x Duma.
“Zi Saɛir řaɣan ayi-dd: ‘Aɛessas, mecḥař ɛad ɣa tekk ǧiřet? Aɛessas, mecḥař ɛad ɣa tekk ǧiřet?’
12 Inna uɛessas: ‘Yusa-dd uteffu n řḥař, uřa d ǧiřet tusa-dd. Mařa kenniw texsem ad tesseqsam, seqsam! Dewřem-dd, asem-dd!’ ”
Awař n Arebbi x temmurt n Weɛraben
13 Řḥukm issaggʷaden di tmeddit.
“Deg wezɣar di temmurt n Weɛraben ad tessensem, a kenniw, ikaravanen n ayt n Dadan! □
14 Uyurem ɣar wumsagar ak-d wenni iffuden ḥima ad as tawyem aman! Imezdaɣ n temmurt n Tayma ffɣen-dd ɣar umsagar ak-d umarwař s weɣrum.
15 Maɣar nitni arewřen zi řesyuf, zi ssif i dd-ittwajebden u zi řqews ittwameḥden u zi řeɣben n umenɣi.
16 Maɣar ammu i d ayi inna SIDI: ‘Ɛad deg ijj n useggʷas, ɛlaḥsab iseggʷusa n ucewwař, xenni ad iqḍa marra x uɛuǧi n Qidar!
17 Řqedd n ayt n bu-řqews iqqimen, ayt n bu-teɣřudṭ n Iqidariyyen, ad yiři drus waha, maɣar SIDI, AREBBI n Israil d wenni innan aya.’ ”