1 “Deg wass nni ad ixřef SIDI zi ‘Liviyatan’, afiɣar itteḥruǧuḍen s tazřa, s ssif nnes iqseḥ u imɣar u ijhed, wah ad ixřef zi ‘Liviyatan’, afiɣar itteḥruruden, uca ad ineɣ řhaycet nni iǧan di řebḥar.”

2 “Deg wass nni ...

ad din yiři ijj n umarjuɛ n uḍiř s binu icnan.

Ɣennjem xas s nnubtat.

3 Necc, SIDI, ad tt iḥḍa,

ad tt ssbezzgeɣ,

ḥima war tt ijarreḥ ḥed,

Necc ad xas ɛesseɣ s wass d ǧiřet.

4 Tafqeḥt war dayi teǧi qaɛ,

maca mařa ca n yijjen izɛem ad issars zzati tazeggʷart d isennanen,

Necc ad kidsen mmenɣeɣ, ad ten ssarɣeɣ munen!

5 Ɣar mařa iṭṭef bnadem di jjehd inu,

uca ad yegg řehna akidi,

ad yegg řehna akidi!”

6 “Deg wussan i dd ɣa yasen ad iwwet Yaɛqub aẓwar, Israil ad innuwar, ad iɣemmi, u nitni ad ccuren tammurt s řɣiǧet.” ^■  

7 “Ma iwta i-t Netta, am mammec wenni iwtin, iwta i-t? Ma ittwaneɣ netta, am mammec ttwanɣen inni zzayes ittwanɣen? ^□   8 Cek tarebbid tt s řeqyas řami tt tenḍared, Netta issuzzar i-tt s usemmiḍ nnes iqesḥen, deg ijj n wass n usemmiḍ zi manis i dd-tneqqar tfuct. ^■   9 S uyenni ad tᵉttwafdi řmuɛṣiyyet n Yaɛqub s man aya uca ad yiři aya d řɣiǧet tekmeř zeg uḥeyyed x ddnub nnes: aqa netta ad yarr marra iẓra n iɛalṭaren d iẓra n jjar ttwařebzen u war din ttbeddint ɛad trebbin n cwarti d ipilaren n arebbi n tfuct.”

10 “Maɣar tandint ittwasjehden ad tedweř ḥafi, am ict n tzeddiɣt ittwajjen, ixřan am řexřa. Dinni ad hdan iyenduzen ad din jnan, ad ccen qaɛ tiseḍwin nnes. ^□  

11 Xmi i ɣa yaẓɣen řefruɛ nnes, ad ttwaqeḍɛen. Ad dd-asent temɣarin, ad ten ssarɣent, maɣar war iǧi d ijj n řgens dayes řefhamet. S uya wenni t iggin, war d asen izziǧiz, u wenni t ikewwnen, war d as yareṭṭa.”

12 “Deg wass nni ad izweḍ SIDI tidrin zi mani iǧa yeɣzar n Lfuraṭ ař Teɣzart n Miṣra. Maca kenniw ad ttwařeqḍem, ijjen awarni i wenneɣni, a ayt n Israil. ^■  

13 Deg wass nni ad ṣuḍen deg uyicc ameqqran n icarri. Xenni ad dd-asen inni isswejden ad hellken di Accur uřa d yenni ittwaɛarrnen ɣar temmurt n Miṣra. Nitni ad sejden i SIDI deg wedrar iqeddsen di Urcalim.”