1 Řḥukm issaggʷaden x Mu’ab.

“Wah, di ǧiřet ittwahdem Ar-Mu’ab, idweř issusem, wah, di ǧiřet ittwahdem Qir-Mu’ab, idweř issusem! ^■   2 Gaɛɛden ɣar Bayit d Dibun, ɣar řegɛudi ḥima ad run. Dinni ad iru Mu’ab x Nabu d Maydaba. Qaɛ azeǧif nsen iřsa d aqeccar, marra timira ttwaḥeffent. ^■   3 Beysen s txuncay n wecḍan deg izniqen nsen, aqa din mɣir tɣuyyit x tzeɣwin nsen u deg izuray nsen, imeṭṭawen weṭṭan-dd x uɣembub. 4 Ḥacbun isɣuyyu, uřa d Aliɛala. Ttesřan i tmijja nsen ař Yahaṣ. S uyenni sɣuyyen uřa d iryazen n Mu’ab nni ɣar iǧa řesnaḥ, buḥbeř n mkuř aryaz ifceř dayes.

5 Uř inu isɣuyyu x Mu’ab. Tarwa nnes n taṣiřet iwḍen ař tandint n Ṣuɣar, tenni iǧan am tyenduzt n třata n iseggʷusa. Maɣar am ttrun ttgeɛɛaden tasawent n Luḥit, wah deg webrid ɣar Ḥurunayim ssgaɛɛaden nitni taɣuyyit n txessart. 6 Maɣar aman n Nimrim ad dewřen imucan xřan. Maɣar arrbiɛ isřaw, aɣemmuy n arrbiɛ iqḍa, war ittiři ɛad uɣemmuy aziza. 7 S uyenni ad arbun min iceṭṭen d min kesben ɣar ujemmaḍ n yeɣzar n Iṣefṣafen. 8 Maɣar tɣuyyit n ucetci ad dd-teffeɣ di temmurt n Mu’ab, aweɛɛeḍ nnes ad dd-iffeɣ ař Ajlayim, aɣuyyi s imeṭṭawen ař Bi’r-Ilim. 9 Maɣar aman n Dimun ccuren s idammen, maɣar Necc ad awyeɣ x Dibun ɛad ktar: ayrad ad dd-yas x yenni yarewřen zi Mu’ab, x min iqqimen di temmurt.”