1 “ ‘Sekkem ddmani ccuren s izmaren n řḥakem n temmurt, zi Salaɛ ɣar řexřa, ɣar wedrar n tyeǧit Ṣihyun!’ 2 Am ijḍaḍ yarewřen, ittwasseḍwen zi řɛucc, ammu i ɣa ggent yessis n Mu’ab ɣar imucan n uẓekkwu n yeɣzar n Arnun. 3 ‘Awyem xenni ccwar, ksim awař, ggem tiři nnek am ǧiřet deg uziř, snuffar imetlaɛ, war znuzi inni yarewřen!’ 4 ‘Jjem inni zzayi x yuẓẓřen ad ɣarem qqimen, a tammurt n Mu’ab! Iři d adurri i nitni zzat i wudem n umteḥḥay!’ ”

“Řeḥṣaret maca ad tbedd, ateḥḥi ad iqḍa, inni iɛeffsen x temmurt ad mweddaren zi temmurt. 5 Řkursi igellden ad ittwacedd s tmexsiwt icuwwaren u Netta ad xas iqqim di tidett deg uqiḍun n Dawud, Netta d wenni iḥekkmen d wenni yarezzun řḥeqq uca issefřeḥ tasegda.” ^■  

6 “Neccin nesřa x nnfaxet n temmurt n Mu’ab, aqa nettat d taɛeffart ař ṭṭarf. Taɛeffart nnes d nnfaxet nnes d zzɛamet nnes: aqa marra řemɛani nnes xwan, war ǧin ca nican. ^■   7 S uyenni i ɣa tru temmurt n Mu’ab x Mu’ab, marra ad run. Nitni ad sɣuyyen x zzbib n Qir-Ḥarisat, dewřen ttwaɣeřben qaɛ. 8 Maɣar isřawent tzayarin deg imarjaɛen n Ḥacbun. Řefruɛ n ḍḍiřect n Sibma arennyen řḥukkam n řegnus. Řefruɛ yiwḍen ɣares ař Yaɛzir, nitni suḥen di řexřa, bezzɛen, aqa ẓwan řebḥar. ^■   9 S uyenni ttruɣ x ḍḍiřect n Sibma, am mammec ruɣ x Yaɛzir. Ssuɣ cem s imeṭṭawen inu, a, tineddam n Ḥacbun d Aliɛala, minzi ruḥen iɣuyyan n usřiwřew zi tini nnem n unebdu u zeg weřqaḍ nnem.

10 Tḥeyyed řefraḥet d zzhu zeg iyyaren isseɣmayen n tfeǧaḥt, war ttɣennijen u war sřiwřiwen ɛad deg imarjaɛen n uḍiř. Wenni yareffsen war yareffes ɛad aḍiř di tsiřt n uḍiř. Ssbeddeɣ Necc řeɛyudat n usřiwřew.

11 S uyenni sɣuyyent tekricin inu am ijj n řgambri x Mu’ab, u daxeř inu x Kir-Ḥaris.

12 Řami i ɣa yaḥeř Mu’ab x řgeɛɛdet nnes n tewhibt uca ad yudef ɣar zzawect nnes iqeddsen ḥima ad iẓẓaǧ, xenni ad ẓaren aqa Mu’ab war ittiweḍ ad igg walu.” ^■  

13 Wa d awař i issiweř SIDI x Mu’ab.

14 Uca řexxu issawař SIDI, iqqar: “Di třata n iseggʷusa ɛlaḥsab iseggʷusa n ucewwař, ad idweř uɛuǧi n Mu’ab ittwasseḥqar ak-d marra abarru nni ameqqran. Min zzayes i ɣa iqqimen, ad yiři drus qaɛ, war iǧi aṭṭas.”