14
1 “Maɣar SIDI ad iḥinn x Yaɛqub uca ad ifarz Israil ɛad. Netta ad asen iwc řhudnet di temmurt nsen. Abarrani ad kidsen imun u nitni ad dewřen ɣar taddart n Yaɛqub. 2 Řegnus ad ten awyen u ad ten ssidfen ɣar wemcan nsen. Taddart n Israil ad ten tᵉṭṭef d tasɣart di temmurt n SIDI, am imesɣan d tiyya. Ad ḥebbsen inni ten iḥebbsen, uca ad ḥekmen x inni ten iḥeṣṣaren. 3 Deg wass nni ad ac issareyyeḥ SIDI zi řeḥriq nnek u zeg unexřiɛ nnek u zi tsexxart nnek iqesḥen i zi ggin ad asen tsexxared. ■ 4 Xenni ad tessgeɛɛded amettiř-a x ujeǧid n Babil, ad tinid: ‘Mammec issbedd wenni iḥeṣṣaren zi řeḥṣaret nnes, mammec tᵉttwaqḍa temmurt mani nɣeǧi?’ 5 Yarẓa SIDI aɛmud n iɛeffanen, taɣɣarect n ayt n bu-ṣṣulṭa, 6 wenni iwtin řegnus břa qeṭṭu di tefqeḥt tameqqrant, wenni tuɣa iḥekkmen x řegnus s weɣḍab, iḍaffar i-ten břa aziǧez. 7 Marra tammurt tarsa, tesqar. Xenni duqqzen s řefraḥet. 8 Uřa d ticejjura n umerzi farrḥent zzayek u ticejjura n tengelt n idurar n Lubnan qqarent: ‘Zeg wami cek tmedded ɣar temmurt, war da dd-ittis uřa d ijjen ɛad ḥima ad aneɣ yarẓ!’ ” □ 9 “Řaxart swadday ad tenhezz di ṭṭweɛ nnek, maḥend ad ffɣen nitni ɣar umsagar akidek xmi dd ɣa tased. Di ṭṭweɛ nnek ad dd-tessfaq řexyařat n imettan, marra řḥukkam n temmurt, ad tegg marra ijeǧiden n temmurt ad kkaren zi řekrasi nsen igellden.
10 Nitni marra ad ṭṭfen deg wawař, ad ac inin: ‘Uřa d cek tdewřed tarehfed, am neccin, řexxu cek tarewsed dayneɣ!’
11 Aqa tmenḍar nnfaxet nnek di řaxart, řḥess n lharpat nnek. Sadu nnek ttwabezzɛen iwekkiwen am řemtaḥ, u ikeccawen d malta nnek.
12 Mammec teggid tewḍid-dd zeg ujenna, cek, a yitri n řefjar ittseqsiqen, mmis n tuffut n řḥař! Mammec tᵉttwarẓed ɣar temmurt, cek amarniw n řegnus!
13 Tennid deg wuř nnek: ‘Necc ad geɛɛdeɣ ɣar ujenna, ad ssbeddeɣ řɛarc inu tiwa i yetran n Arebbi, ad qqimeɣ x wedrar n umuni ɣar ṭṭrufa n ccamal qaɛ. ■
14 Necc ad geɛɛdeɣ tiwa n tqiccatin n iseynuten, ad arwseɣ deg Umɛuǧi x kuřci!’
15 Lla, ad cek dd-ssehwan di řaxart, di řaǧaɣ qaɛ n wanu!
16 Inni cek i ɣa iẓaren, ad dayek jɛaren, ad fehmen uca ad inin: ‘Ma wa d aryaz nni issarjijjen tammurt, wenni ijjin tigeldin ad nhezzent,
17 wenni yarrin tammurt d řexřa uca yareddeǧ tineddam nnes, wenni war yarxun i imeḥbas nnes ad arekkʷeḥen?’
18 Marra ijeǧiden n řegnus, marra nitni zzřen din di ccan, kuř ijj di taddart nnes.
19 Maca cek tmenḍared, ssiggʷejen cek x wenḍeř nnek, am ict n nnɛi n tɣeddut mmenḍaren tt, ssduřyen tt s imettan ittwassnuqqben s ssif, inni dd ɣa ihwan ɣar iẓra n tesraft n wenḍeř, am řxecbet i x ɛefsen. 20 War kidsen temmarsed deg wenḍeř, maɣar txarrbed tammurt nnek uca tenɣid řgens nnek. Zzariɛet n iɛeffanen ɛemmarṣ war ten ittidaren i řebda. ■ 21 Swejdem ṭṭabřa n tɣarṣt i iḥenjiren nnes x řmuɛṣiyyet n ibabaten nsen, maḥend nitni ɛemmarṣ war ggur ɛad ad bedden, ad warten tammurt uca ad ccuren udem n temmurt s tneddam. ■
22 Necc ad xasen kkareɣ, ammu i iqqar SIDI n řɛeskarat, Necc ad teḥḥiɣ zi Babil kuř isem d marra min iqqimen, am mmis uřa d mmis n mmis, ammu i iqqar SIDI. ■ 23 Necc ad arreɣ Babil d tasɣart n twuct n ǧiřet uřa d iyeřmamen. Ad ten mḥiɣ s tmedwast n ureddeǧ, ammu i iqqar SIDI n řɛeskarat.” ■
Awař n Arebbi x Accur
24 SIDI n řɛeskarat ijjuǧ, inna “S tidett, am mammec Necc i t xarrṣeɣ, ammu i ɣa imsar, am mammec Necc i t uriɣ, ammu i dd ɣa yas, 25 aqa Necc ad arẓeɣ Accur di temmurt inu u ad xas ɛefseɣ x idurar inu, ḥima azayřu nnes ad zzaysen ittwaksi u řeḥmeř nnes ad iwḍa x tɣarḍin nsen. 26 Wa d acawar nni ittwaggen x marra tammurt u wa d afus i isswiẓẓaḍen i marra řegnus. 27 Maɣar SIDI n řɛeskarat ixarreṣ aya, man wen izemmaren ad t ibḍeř? Aqa afus nnes isswiẓẓaḍ i-t, man wen izemmaren ad t yarr ɣar uɣezdis?” ■
Awař n Arebbi x Filicit
28 Deg useggʷas n řmewt n Aḥaz, yusa-dd řḥukm issaggʷaden wanita: ■
29 “War farreḥ, a cem, marra tammurt n Filicit, aqa akeccuḍ nni cem iwtin, ittwarẓ, maɣar zeg weẓwar n ufiɣar ad dd-iffeɣ urefsiw amesmum u řɣiǧet nnes ad tiři d řḥaycet icemḍen iṭṭawen. 30 Imenza n imuqřiřen ad hdan s řhudnet uca imezřaḍ ad zzřen di řaman. Maca ad nɣeɣ aẓwar nnem s řaẓ uca arefsiw ad ineɣ min zzayem iqqimen.”
31 “Ru, a tawwart, sɣuyy, a tandint, aqa fecřen marra imezdaɣ n Filicit! Maɣar zi ccamal ad dd-yas ddexxan uca uřa d ijjen ad yaggʷej zeg iseddiyyen nnes n řɛeskar.”
32 “Min i dd ɣa yarren x ireqqasen n řgens?”
“Aqa SIDI igga dsas n Ṣihyun ḥima řmusakin n řgens nnes ad dinni afen adurri!”