1 Řḥukm issaggʷaden x Babil nni iẓra Icaɛya, mmis n Amuṣ.

2 “Sgeɛɛdem taɛeǧant x wedrar aqeccar, sɣuyyem ɣarsen, ceyyarem s ufus aqa ad adfen zi tewwura n tarwa n taṣiřet!”

3 “Necc umureɣ imqeddasen inu, Necc řaɣiɣ x ayt n bu-teɣruḍt inu di ssibbet n weɣḍab inu, inni ineggzen s řefraḥet x lɛaḍama inu.”

4 “Aqa zzhir n ijj n ubarru ameqqran x idurar, am n ijj n řgens imɣar, řḥess n ddriz n tgeldawin, n řegnus usin-dd munen. SIDI n řɛeskarat isedd řɛeskar.

5 Ad dd-asen zi temmurt tiggʷej, zi ṭṭarf n ujenna, SIDI d řeqcuɛ n wesxeḍ nnes, ḥima ad xarrben marra tammurt.”

6 “Sɣuyyem, maɣar ass n SIDI yudes-dd, ad dd-yas am ureddeǧ x kuřci zeg Umzemmar. 7 S uyenni dewřen marra ifassen fecřen u wuř n kuř bnadem ifessi. 8 Nitni nnxeřɛen, iřeqqef i-ten weɣnas d řewjeɛ n tarut, ttnezbaren am temɣart ittarun. Kuř ijj ixezzar ɣar wenneɣni, iɣembab nsen ggin am iceɛɛařen n tmessi.”

9 “Xzar, ass n SIDI ad dd-yas, s řeqsaḥet iwɛaren u s řḥaduq n weɣḍab nnes, ḥima ad yarr tammurt d řxirbet u ḥima ad zzayes imḥa imednab.

10 Maɣar itran n ujenna d iwrafen n itran war ttejjin ɛad tafawt nsen ad tarɣ, tafuct ad tebbarcen xmi dd ɣa tenqar uca taziri war ttejji ɛad tafawt nnes ad tceɛceɛ.” ^■  

11 “Maɣar ad xeǧṣeɣ i ddunect tuɛeffna nnes u i iɛeffanen řmuɛṣiyyet nsen u Necc ad ssbeddeɣ nnfaxet n imɛeffaren u ad ssehwiɣ nnfaxet n ayt n bu-řexcunet.

12 Ad arreɣ aryaz ad yiři iɣřa x wureɣ azdad, uřa d bnadem x wureɣ iɣřan zi Ufir.

13 S uyenni ad ssarjijeɣ ijenwan uca ad tenhezz temmurt zeg wemcan nnes zeg uduqqez n ufugem n SIDI n řɛeskarat u zeg wass n řḥaduq n weɣḍab nnes.”

14 “Am tɣayḍet n wezɣar injerfen, am wuǧi war ɣares dd-iksi uřa d ijj, ammu i ɣa nnqeřben nitni, kuř ijj ɣar řgens nnes u kuř ijj ad yarweř ɣar temmurt nnes.

15 Qaɛ wenni i ɣa ittwafen, ad xas ccuqen, u qaɛ wenni i ɣa ṭṭfen, ad iwḍa s ssif.

16 Zzat i tiṭṭawin nsen ad ttwaddzen iḥenjiren nsen, ad ttwakeccḍent tudrin nsen u timɣarin nsen ad ttwasnuqqbent.”

17 “Xzar, Necc ad xasen ssḥarrceɣ Imadiyyen, nitni war d asen tecqi nnuqart u ɣarsen nitni ureɣ war isekkwi.

18 Řeqwas nsen ad xarrgen iḥudriyyen, war areḥḥmen ca x řɣiǧet n uɛeddis, u tiṭṭ nsen war tᵉttziǧiz i iḥenjiren.

19 Tandint n Babil, talwizt jar tgeldatin, tenni d řɛezz d usemɣar n Ikaldaniyyen, ad tedweř am mammec řami tuɣa AREBBI issneqřeb Sadum d Ɛamurra. ^■   20 I řebda war ittɣimi din uřa d ijj, war dayes zeddɣen ɛad zi jjiř ař jjiř. Aɛrab war dinni iccit aqiḍun nnes ɛad u imeksawen war ttejjin ad tareyyeḥ din tḥimart nsen ɛemmarṣ. 21 Řewḥuc n řexřa ad zzřen dinni u tizeddiɣin nsen ad ccurent s mukat, yessis n nnɛamet ad zedɣent dinni uca iɣayḍen ijennen ad dinni negzen. 22 Ad ssmiɛɛiwen ifisen ijj ɣar wenneɣni di lqelɛat nnes ittwajjen uřa d uccanen n řexřa di řeqṣur n řehzuṭ. Řweqt nnes ad dd-taweḍ deɣya u ussan nnes war ttzuggarten ca.”