1 “Uct x yenni issuffuɣen řumurat iɣeccen, inni ittarin tiweṣṣa iḥeṣṣaren, 2 ḥima ad ssḥeyyden imezřaḍ x tesɣart nsen u ḥima ad acaren tasɣart n yinni ittwaḥṣaren n řgens inu, ařami i ɣa dewřent tijjař d takeccaḍt nsen u iyujiřen d taymart.

3 Maca min texsem ad teggem deg wass n uxeǧeṣ u ɣar ureddeǧ nni dd ɣa yasen zi řaggʷaj? Wi ɣar i ɣa tarewřem ḥima ad tafem twiza u mani i ɣa tejjem aɛuǧi nwem? 4 War din min ɣa ggen mɣir ad uḍaren x ifadden waha jar imeḥbas u ad wḍan jar inni ittwanɣen. S marra aya war yarexxu weɣḍab nnes, maca afus nnes iqqim isarreḥ.”

5 “Uct x Accur, azeǧaḍ n weɣḍab inu, aqa-t d aɛmud deg ifassen nsen, aqa-t asxeḍ inu! ^■   6 Ad t ssekkeɣ ɣar řgens iccuren s nnifaq u Necc ad t umureɣ x řgens i x idduqqez weɣḍab inu, maḥend ad acaren tukkarḍa u maḥend ad t keccḍen qaɛ u ad t ɛarran i uneɛfas am tɛejjajt x imesraq. 7 Maca netta s yixef nnes war d as ittɣiř ammu u uř nnes ittxarreṣ mammec nneɣni, maɣar netta ɣares deg wuř mɣir řekḥeḍ u maḥend ad iqḍa x řegnus u war iǧi drus waha. 8 Maɣar iqqar: ‘Ma war ǧin řḥukkam inu d ijeǧiden marra? 9 Ma war imsar i Kalnu amecnaw min imsaren i Karkamic? Ma war imsar i Ḥamat amecnaw min imsaren i Arfad? Ma war imsar i Samarya amecnaw min imsaren i Dimacq?

10 Am mammec afus inu iṭṭef tigeldawin n l’aṣnam nni zi ɛdunt řexyařat nsen ineqcen řexyařat n Urcalim d Samarya,

11 ma war tteggeɣ ammu ɛawed, am mammec i t ggiɣ ak-d Samarya d l’aṣnam nnes, uřa ak-d Urcalim d řexyařat nnes n ṣṣanam?’ ”

12 “Maca xmi i ɣa ikemmeř Sidi marra řxedmet nnes x wedrar n Ṣihyun u di Urcalim, xenni ad xeǧṣeɣ Necc řɣiǧet n ukebbar deg wuř n ujeǧid n Accur uřa d aɛeffar yuffen di tiṭṭawin nnes,

13 maɣar netta inna: ‘Aya ggiɣ t s ufus inu ijehden u s tiɣit inu, maɣar necc ɣari řeɛqeř. Iymiren n řegnus kkseɣ ten, u řeɛwayeḍ nsen keccḍeɣ ten, u am jjiheř ɣeḍřeɣ řḥukkam nsen.

14 Amecnaw řɛucc, ammu yufa ufus inu agřa n řegnus, jarweɣ marra tammurt am mammec jarwen timeǧařin immenḍaren. Uřa d ijj war issenhezzi afriwen, war din wenni yarezmen ajeqmim niɣ ijaw.’ ”

15 “Ma ittfeyyec ccaqur qibač i wenni zzayes ittceqqaren? Niɣ ittneffex řmencar zzat i wenni zzayes ittqessen? Aya iři axmi aɛmud ittḥenneḍ aryaz nni t issgeɛɛden, niɣ axmi aɛmud issgeɛɛed bab nnes nni war iǧin d akeccuḍ.

16 S uyenni ad issekk Sidi inu, SIDI n řɛeskarat, bu-deǧis jar iryazen nsen iqebbuzen u Netta ad issireɣ timessi sadu aɛuǧi n Accur am ijj n řḥaduq n tmessi. ^■  

17 Tafawt n Israil ad tedweř d timessi u Amqeddes nnes d aceɛɛař nni i ɣa icemḍen u ad tecc isennanen d tzeggʷart nnes deg ijj n wass waha.

18 Netta ad yecc aɛuǧi n wezɣar nnes u n řɛirst iṣebḥen nnes, s marra řeɛmar d weysum i daysen, uca ad yiři am umeḥřuc ittraḥen iɣeǧi.

19 Min iqqimen n tcejjura n wezɣar nnes ad yiři drus waha, aḥenjir izemmar ad ten iḥseb.”

20 “Deg wass nni ad yiři min iqqimen n Israil d inni inejmen zi taddart n Yaɛqub war ttɛemmiden ɛad x wenni ten iccaten, maca ad iɛemmed Israil x SIDI, Amqeddas n Israil, s řaman iccur. 21 Min iqqimen ad dd-idweř, min iqqimen n Yaɛqub ad dd-idweř ɣar Arebbi ijehden. 22 A Israil, waxxa řgens nnek ammu iwseɛ am iǧi n řebḥar, ad zzaysen dd-idweř mɣir min iceṭṭen. Akeḥḥeḍ bayen, tasegda tewseɛ. ^■   23 Maɣar Sidi inu, SIDI n řɛeskarat, ad iqḍa x man aya uca ad igg min yuran, di marra tammurt.” ^■  

24 “S uyenni, ammu i iqqar Sidi inu, SIDI n řɛeskarat: ‘A řgens inu wenni izeddɣen di Ṣihyun, war tteggʷed ca zi Accur xmi cek iccat s uzeǧaḍ uca ikessi-dd xak aɛmud, amecnaw mammec imsar di Miṣra. 25 Maɣar ɛad mɣir cwayt, xenni ad ikemmeř wesxeḍ inu uca ad yiři weɣḍab inu x ureddeǧ nsen. 26 Maɣar SIDI n řɛeskarat ad iḥenneḍ tiwa nnes arekkuḍ, amecnaw mammec iwta Midyan ɣar teṣḍart n Ɣurab. Taɣɣarct nnes ad tiři tesswiẓẓaḍ tiwa i řebḥar u Netta ad tt issgeɛɛed am mammec t igga di Miṣra. ^■   27 Deg wass nni ad iwḍa řeḥmeř n Accur x teɣruḍt nnek u taɣnact nnes x yiri nnek. Azayřu ad ittwabeṭṭeř s ijiman iseḥḥen.”

28 “Ad dd-yas ɣar Ɛayyat, iɛdu x Mijrun, issars dduzan nnes di Mixmac. 29 Nitni ɛeddun x tsunta, ad ssensen di Jabaɛ. Rama tᵉttarjiji, tarweř Jibɛa n Cawul. 30 Sɣuyy s tmijja ijehden, a yeǧis n Jallim! Arr řbař, Layca, a cem Ɛanatut, meskina! 31 Tandint n Madmina tarweř, imezdaɣ n Jibim ffɣen maḥend ad afen řaman. 32 Ass-a ɛad ad ibedd di Nub. Netta ad iksi afus nnes issaggʷad ɣar wedrar n tyeǧit n Ṣihyun, ɣar tewrirt n Urcalim.”

33 “Xzar, Sidi, SIDI n řɛeskarat, ad iqess řefruɛ s uɣiř. Inni s tiddi yuɛřan ad ttwazedmen, uca inni issgeɛɛden ixef nsen ad ttwassehwan. 34 Cbarq n wezɣar ad ittwaqřeɛ s wuzzař uca Lubnan ad iwḍa s ufus n Umzemmar.” ^□