1 “Ad dd-teffeɣ Tseṭṭa zi jjdeɛ n Yassa u Taɣeddut zeg iẓewran nnes ad dd-tawi řɣiǧet. ^■   2 Ad xas yarsa Arruḥ n SIDI, Arruḥ n tiɣit d řeɛqeř, Arruḥ n ccwar d jjehd, Arruḥ n tussna d tiggʷudi zi SIDI. ^■   3 Arḍa nnes ggur ad yiři di tiggʷudi n SIDI. War icarreɛ ɛlaḥsab min ttwařant tiṭṭawin nnes, war iḥekkem ɛlaḥsab min ttesřan imezzuɣen nnes. 4 Ad icarreɛ imuqřiřen s tsegda u ad iḥkem imwaḍɛen n temmurt s řḥeqq, maca tammurt ad tt iwwet s uzeǧaḍ n uqemmum nnes u s uṣuḍi n uqemmum nnes ad ineɣ aɛeffan. 5 Tasegda ad tiři d abyas n tejɛinnatin nnes u tidett d abyas x tmeṣṣaḍin nnes.

6 Ad izdeɣ wuccen ɣar izmar, aɣiras ad ijen ɣar iɣayḍ ameẓyan. Ayenduz d wayrad ameẓyan d řmař iṣeḥḥen ad iřin munen uca aḥenjir ameẓyan ad ten indeh. ^□  ■   7 Tayenduzt d ddub ad hdan jmiɛ, uca imeẓyanen nsen ad jnen ɣar wayawya uca ayrad ad yecc řum am ufunas. 8 Aḥḍiḍ ad irar zzat i wexbuc n třefsa u anibu ad igg afus nnes deg weḥfur n ufiɣar.

9 War tteggen řɣar u war tteggen areddeǧ x wedrar amqeddes inu marra, maɣar tammurt teccur s tussna n SIDI am mammec dřen waman tisi n řebḥar.

10 Deg wass nni ad ibedd Weẓwar n Yassa am tɛeǧant i weyduden. Ɣares ad sseqsan řegnus uca arraḥet nnes ad tiři tcewwar.” ^■  

11 “Deg wass nni ad issgeɛɛed Sidi inu afus nnes ict n twařa nneɣnit, ḥima ad isellek min iqqimen n řgens nnes zi Accur, Miṣra, Fatrus, Kuc, Ɛilam, Cinɛar d Ḥamat u zi tegzirin n řebḥar. ^□  

12 Netta ad issbedd taɛeǧant i řegnus u ad ijarw ɛawed imenneɛraq n Israil, ḥima ad issmun inni ittwazeǧɛen zi Yahuda zi arebɛa n tɣemmura n temmurt.

13 Xenni ad iggʷej wasam n Ifrayim u inni iḥeṣṣaren Yahuda ad ttwaqeḍɛen. Ifrayim war ittisem ɛad zi Yahuda u Yahuda war iḥeṣṣar ɛad Ifrayim.

14 Ad ffɣen ɣar řɣarb axmi ṭṭawen x tɣarḍin n Ifilisṭiniyyen uca munen ad keccḍen ayt n ccarq. Ad sswiẓẓḍen ifassen nsen ɣar Idum d Mu’ab uca ayt n Ɛammun ad asen ṭṭaɛen.

15 Ad iḥarrem SIDI iřes n řebḥar n Miṣra uca Netta ad issgeɛɛed afus nnes x yeɣzar n Lfuraṭ s uḥaduq n Arruḥ nnes u ad t iwet ař ɣa idweř sebɛa n tɣezratin uca ad yarr aqa zemmaren ad kken x webrid s sandaliyat.

16 Ad din yiři webrid iseggmen i min iqqimen n řgens nnes nni i ɣa iceṭṭen zi Accur, am mammec tuɣa iǧa webrid i Israil umi dd-igeɛɛed zi Miṣra.” ^■