1 “Řgens i iddaren di taǧest, ad iẓar tafawt tameqqrant. Tiwa nni izeddɣen di temmurt n tiři n řmewt ad tareɣ-dd tfawt. ^■   2 Cek temmarnid di řgens u tessemɣared řefraḥet. Nitni ad farḥen zzat i wudem nnek am mammec farḥen ɣar tmeyra, am mammec arecgen xmi beṭṭan takeccaḍt.

3 Maɣar azayřu n ddqeř nnes d weɛmud x tɣarḍin nnes d uzeǧaḍ n uweqqaf nnes, aqa tarẓid t amecnaw deg wass n Midyan. ^■  

4 Maɣar kuř řbuṭa nni yudfen deg uzehhar n umenɣi u kuř apartessu nni marɣen deg idammen, ad ittwasarɣ, ad yiři d macca i tmessi.

5 Maɣar ittwaru aneɣ-dd Uḥenjir, immewc aneɣ Tmimit uca řeḥkamet tᵉttwasars x teɣruḍt nnes u ttřaɣan as Isem nnes: Řeɛjeb, Amcawar, Arebbi Ijehden, Tbabat n Řebda, Řḥakem n Řehna. ^■   6 I řemɣaret n řeḥkamet nnes u i řehna nnes war ittiři qeṭṭu x řɛarc n Dawud u x tgeldit nnes, ḥima ad tᵉttwaḍmen u ad tᵉttwassejhed s řḥeqq d tsegda, zi řexxu ař i řebda. Cḍaret n SIDI n řɛeskarat ad igg aya.” ^■  

7 “Sidi inu issekk awař x Yaɛqub uca iwḍa di Israil.

8 Marra řgens ad t issen, Ifrayim d imezdaɣ n Samarya nni iqqaren s nnfaxet u s wuř iccuren s ukebbar: 9 ‘Reḥyuḍ n llajur wḍan, maca ad ten nebna ɛawed s tṣuḍar ittwassuydan. Urtan n řexřa ttwazedmen, maca ad neẓẓu ticejjura n tengelt deg wemcan nsen!’

10 Ad xas issekkar SIDI iɣrimen n Raṣin u Netta ad issehweř řɛedyan nnes xas.

11 Aram zi ccarq u Ifilisṭiniyyen zi ḍeffar, ařami nitni ad ṣarḍen Israil qaɛ. S marra aya war yarexxu weɣḍab nnes, maca afus nnes iqqim isarreḥ. ^□  ■  

12 Maɣar řgens war dd-idikkwiř ɣar wenni t iwtin u nitni war arezzun SIDI n řɛeskarat.

13 X uya ad iqess SIDI zi Israil azeǧif d ukennas, taseṭṭa n tini d uɣanim, deg ijj n wass.

14 Awessar d wenni umi ɣa yiři ccan, aqa aten d azeǧif, uca anabi nni isseřmaden ixarriqen, netta d akennas.

15 Maɣar imgewwaden n řgens-a d imɣekkʷayen u inni zzaysen ittwanedhen ad ttwaṣarḍen.

16 S uyenni war ifarreḥ Sidi inu x iḥudriyyen nsen, u war yareḥḥem x iyujiřen d tejjař nsen, maɣar marra nitni d imnafqen d iɛeffanen u kuř aqemmum issawař tubbuheřya. S marra aya war yarexxu weɣḍab nnes, maca afus nnes iqqim isarreḥ. ^■  

17 Maɣar tuɛeffna tareqq am tmessi, tᵉttett isennanen d tzeggʷart, tessreqqa ixeccaben n wezɣar, ařami ttgeɛɛaden di ddexxan. ^□  ■  

18 S uduqqez n ufugem n SIDI n řɛeskarat ad issqusbar tammurt uca řgens ad yiři d macca n tmessi. Uřa d ijjen war ittḥiwiř x wenneɣni.

19 Waxxa bnadem inehhec ɣar yeffus, ad iqqim iǧuz. Waxxa ittett ɣar uzeřmaḍ, war ttyiwinen nitni. Kuř ijj ad iṣarḍ aysum n uɣiř nnes. 20 Manassa ad iṣarḍ Ifrayim u Ifrayim ad iṣarḍ Manassa uca tnayen idsen munen ad iřin ḍidd i Yahuda. S marra aya war yarexxu weɣḍab nnes, maca afus nnes iqqim isarreḥ.”