1 Deg useggʷas n řmewt n ujeǧid Ɛuzziya ẓriɣ SIDI iqqim x řɛarc yuɛřan ittwasgeɛɛden uca afray n warruḍ nnes ittcur Zzawect Tameqqrant. ^■   2 Tiwa nnes bedden isarafiyyen, lmalakat nni ittbanen am daysen timessi, ɣarsen setta n wafriwen. Qaɛ ijj ɣares setta n wafriwen. S tnayen n wafriwen iřeḥḥef aɣembub nnes, s tnayen iřeḥḥef iḍaren nnes u s tnayen tuɣa iṭṭaw. ^□  ■   3 Iřaɣa ijj x wenneɣni, inna: “Amqeddas, Amqeddas, Amqeddas d SIDI n řɛeskarat. Marra tammurt teccur s uɛuǧi nnes!”, ^■   4 ařami nhezzen dsusa n tnebdatin n tewwart s tmijja n wenni iřaɣan uca Taddart teccur s ddexxan.

5 Xenni nniɣ necc: ‘”Axeyyeb i necc, ad hellkeɣ, maɣar necc d aryaz bu-iyencicen xemjen u zeddɣeɣ jar řgens n ayt n bu-iyencicen xemjen, u waxxa amenni tiṭṭawin inu ẓrint Ajeǧid, SIDI n řɛeskarat.” 6 Iḍwa-dd ijj zeg isarafiyyen ɣari. Yarbu řefḥem itteḥduduqen deg ufus nnes nni tuɣa iksi s tjeqqaḍt zeg uɛalṭar. 7 Netta iḥada zzayes aqemmum inu, inna: “Xzar, iḥada řefhem itteḥduduqen wanita iyencicen nnek. Temmeksi řmuɛṣiyyet nnek u ddenb nnek ittwasseṣřeḥ.” ^■  

8 Awarni i uya sřiɣ i tmijja n Sidi inu, teqqar: “Man wen i ɣa ssekkeɣ u wi i ɣa yuyuren maḥend ad izwar i Neccin?” Xas uca nniɣ: “Xzar, aqa ayi da, sekk ayi!” 9 Xenni inna: “Uyur uca tinid i řgens-a: ‘Waxxa ad tesřem s teynit, war t tfehhmem!’, uca: ‘Waxxa teẓrim mliḥ, war t tessinem!’ ^■  

10 Seqseḥ uř n řgens-a, uca belleɛ as imezzuɣen, seřseq as tiṭṭawin maḥend s tiṭṭawin nnes war ittwiři u s imezzuɣen nnes war ittesři u s wuř nnes war ittessen, ařami war iddikkwiř uca ad ittwasgenfa.’ ” ^■  

11 Xenni nniɣ: “Ař meřmi, a Sidi inu?” Netta yarra-dd: “Ař i ɣa ttwaxarrbent tneddam, war daysent ittɣimi ɛad umezduɣ, uřa d tudrin, war daysent ittɣimi ɛad bnadem, uca ad tiři temmurt tareddeǧ, ad tedweř d řxirbet.

12 Maɣar SIDI ad issbeɛɛed iwdan ɣar řaggʷaj, uca ad tiři temmurt texwa aṭṭas.

13 Maca ad dayes teqqim ɛad ict n teɛcart, maca uřa d man aya ad tᵉttwacc, maca am mammec ɣar tcejjart n yigg u ɣar tcejjart n řbeǧuḍ awarni řami tent i ɣa zedmen, ad iqqim ɛad jjdeɛ, ammu i ɣa yiři jjdeɛ nnes d zzariɛet tamqeddest.”