1 “Ttexseɣ ad ɣennjeɣ izři i llif inu, izři n llif inu x umarjuɛ nnes n uḍiř:

Llif inu ɣares ijj n umarjuɛ n uḍiř

x ijj n wedrar i dd-ittwassgeɛɛden

am ijj n yicc ittudumen s tadunt

am mammec ittudum uzeǧif n ijj n mmis dehnen t s zzect. ^□   2 Netta inqec i-t u iṣeffa i-t zeg iẓra,

iẓẓu t s tzayarin icenɛen.

Netta issbedd ijj n lburj di řwest nnes.

Inqec dayes tasirt n uḍiř.

Xenni tuɣa issitim, aḥwic n tzayart ad dd-yawi aḍiř,

maca netta yiwi-dd aḍiř asemmam.”

3 “Xenni řexxu, a imezdaɣ n Urcalim, d kenniw iryazen n Yahuda, ḥekmem jar ayi d umarjuɛ inu n uḍiř! 4 Min zemmareɣ Necc ɛad ad ggeɣ i umarjuɛ inu n uḍiř nni war d as t ggiɣ ɛad? Mayemmi ssitimeɣ aqa ad dd-yawi aḍiř mliḥ, umi dd yiwi mɣir aḍiř asemmam?” ^■  

5 “Xenni řexxu, Necc xseɣ ad awem ssecneɣ min ɣa ggeɣ ak-d umarjuɛ inu n uḍiř: Necc ad kkseɣ afray nnes i t iḥḍan, ḥima ad t řeqḍen qaɛ, ad hedmeɣ řḥiḍ nnes d ahdam ař xas i ɣa ɛefsen. ^■   6 Ad t ggeɣ d řexřa, war t zebbaren niɣ ad t carzen, maca tazeggʷart d isennanen ad dinni ɣemyen u Necc ad umureɣ iseynuten maḥend war d as tticen anẓar. 7 Maɣar amarjuɛ n uḍiř n SIDI n řɛeskarat d taddart n Israil u iryazen n Yahuda d taɣeddut min xef yarḍa. Iraja řḥeqq, maca xzar, tuɛeffna, iraja tasegda, maca xzar, tɣuyyit.” ^■  

8 “Uct x yenni ittseddan taddart ɣar taddart u arennyen iyyar ɣar yeyyar, ař tafed war da iǧi wemcan ɛad u kenniw waha i izeddɣen di řwest n temmurt! ^■   9 Inna ayi SIDI n řɛeskarat deg imezzuɣen inu: ‘S tidett, aṭṭas n tudrin ad dewřent d řxirbet, tudrin timeqqranin d tinni icnan, maḥend war daysent izeddeɣ ɛad uřa d ijj.’

10 Minzi ɛecra n ifeddanen n umarjuɛ n uḍiř ad awyen mɣir ijj n ubatu, u ijj n uḥumir n zzarriɛet ad yawi mɣir ijj n ifa.” ^□  

11 “Uct x yenni ikkaren zic, arezzun x ccrab u ttɣiman wsewsen ař tbambast, ař ten issiḥma binu! ^■  

12 Řgambri d lharpa d ubendir d temja d binu aqa aten ɣar zzradi nsen, maca min ittegg SIDI war ɣares xezzaren, tameggit n ifassen nnes, war tt ttwiřin.

13 S uyenni ad ittwandeh řgens inu di lmenfa, minzi war ɣares teǧi tussna. Tarwa n taṣiřet n řgens ad heyyfen uca ad yaẓeɣ ubarru nsen s ufadi. ^■  

14 S uyenni i ɣa tarzem řaxart aṭṭas tmijja nnes, ad yarzem aqemmum nnes nhřa řeqyas, maḥend ad dayes ihwa řɛezz nnes d ubarru nnes d ddriz nnes d marra inni dayes ineggzen ammu s řefraḥet.

15 Xenni ad ixnes bnadem uca kuř aryaz ad ittwassehwa, uca tiṭṭawin n ayt n bu-nnfaxet ad dewřent xezzarent ɣar swadday.

16 Maca SIDI n řɛeskarat ad ittwassɛuǧa s řḥeqq uca s tsegda ad ittwaqeddes Arebbi d amqeddas.

17 Ad hedden dinni izmaren am ttheddan x tkessawt nsen, uca ibarraniyyen ad ccen řexrabi n ayt bu-wagřa.” ^■  

18 “Uct x yenni ɣarsen dd-ijebbden řmuɛṣiyyet s tesɣunin uřa d ddenb s iseɣwan iqebbuzen n ukarru,

19 inni iqqaren: ‘Ejj i-t ad yazzeř, ejj i-t ad t igg deɣya ḥima ad t nẓar, uca ccwar n Umqeddes n Israil ejj i-t ad ixecc, ad dd-yas, ḥima ad t nessen!’ ”

20 “Uct x yenni, min war iḥřin qqaren as iṣbeḥ u min iṣebḥen war iḥři, inni itteggen taǧest d tfawt u tafawt d taǧest, inni itteggen min yarzigen d miẓid u min iziḍen d amarzag.”

21 “Uct x yenni umi ittɣiř asen aqa aten d imiɣisen i yixef nsen, u uct x yenni iḥessben ixef nsen d ifehhamen!” ^■  

22 “Uct x yenni iǧan d ayt n bu-teɣruḍt ɣar tsessit n binu u x yeryazen imeḥḍen ɣar weḥray n ccrab, 23 inni ittsarraḥen i uɛeffan s terzeft iɣeccen uca kksen tasɣart i imseggaden.” ^■  

24 “S uyenni, am mammec ittett iřes n tmessi iɣeǧ u am mammec ihekkwa wurum s uceɛɛař, ammu i ɣa ixṣar weẓwar nsen u tanewwact nsen ad tᵉḍuw am tɛejjajt, maɣar nitni nḍaren Ccariɛa n SIDI n řɛeskarat u sseḥqaran zeg wawařen n Umqeddas n Israil. ^■  

25 S uyenni yarɣa weɣḍab n SIDI x řgens nnes uca iksi xas afus nnes. Aqa iwta i-t ařami arjijen idurar u řxecbat nsen meddent x imesraq am wefraḍ. S marra aya war yarexxu weɣḍab nnes, maca afus nnes iqqim isarreḥ. ^■  

26 Maɣar ad issgeɛɛed taɛeǧant i řegnus nni iǧan di řaggʷaj, u zeg uneggaru n temmurt ad t iṣeffar ɣares. Xzar, ittas-dd deɣya s tezřa. 27 War ɣares yuḥiř uřa d ijj, uřa d ijjen ma inqarḍ, uřa d ijjen ma innudem niɣ iṭṭes, uřa ɣar ijjen war ifsi abyas x tejɛinna nnes niɣ iqeṭṭes as ijj n ufiřu n tsiřa. 28 Fřitcat nnes qeḍɛent u marra řeqwas nnes ttwameḥḥḍen. Ticeḍyin n yeysan nnes banent qesḥent am uqayas, tijarrarin nnes am tḥaryaḍt. 29 Zzhir nnes am zzhir n teyradt, u izemmar ad izehhar am iyraden imeẓyanen. Ad yarruǧed, ad iṭṭef taymart nnes uca ad tt ijarr u war ggur ad yiři wi t ɣa ifekken. 30 Deg wass nni ad izehhar ḍidd řgens amecnaw zzhir n řebḥar. Ad xezzaren ɣar temmurt, aqa-tt mɣir d taǧest d řeḥṣaret, uca tafawt ad tebbarcen s iseynuten ibbarecnen.” ^■