1 “... Deg wass nni ad cebbarent sebɛa n temɣarin deg ijj n weryaz, ad qqarent: ‘Neccin ad necc aɣrum nneɣ u ad nessyarḍ ixef nneɣ, ejj aneɣ ad neksi isem nnek waha, ksi řefḍiḥet xaneɣ.’ ”

2 “Deg wass nni ad idweř UƔEDDU n SIDI d telwizt icewwaren, u Řɣiǧet n temmurt d řɛezz d ucewwar i min innejmen n Israil. 3 Min iqqimen n Ṣihyun d wenni iqqimen di Urcalim ɛad, ad asen inin: ‘D amqeddas!’, kuř ijj di Urcalim wenni ittwazemmemen i tudart. 4 Xmi i ɣa issird Sidi řexmej n yessis n Ṣihyun u ad isrir zi řwest n Urcalim idammen s Arruḥ n řeḥkam u s Arruḥ n wecmaḍ, 5 xenni ad igg SIDI deg uziř ijj n useymu x marra Tazeddiɣt x wedrar n Ṣihyun u x tmesmunin nnes u s ǧiřet ddexxan d tissiqt n tmessi ittceɛciɛen, maɣar tiwa marra min iɛuǧen ad tiři tqidunt i udurri n tesřit. 6 Ad yiři uɛiccu i tiři s uziř zi řeḥmu u i wemcan n tarewřa d udurri zi řḥemřet d wenẓar.”